မဲခေါင်၊ ဇူလိုင် ၁၈
ဇူလိုင် ၁၃ ရက်နေ့က ပန်ဆယ်ဗေးနီးယားပြည်နယ် စည်းရုံးဟောပြောပွဲမှာ အမေရိကန် သမ္မတဟောင်း ရီပါဘလစ်ကန်ပါတီ အကြီးအကဲ ဒေါ်နယ်ထရမ့်ကို အထက်တန်းကျောင်းသားလေးက သေနတ်နဲ့ပစ်ခတ်လုပ် ကြံမှုနောက်ကွယ်မှာ စေခိုင်းသူဟာ အီရန်ဖြစ်တယ်လို့ ဇူလိုင် ၁၆ ရက်နေ့က CNN သတင်းက ဖော်ပြလာခဲ့မှုကို အီရန်အစိုးရက ဒေါသတကြီး ငြင်းပယ်သွားခဲ့ပါတယ်။
CNN ရဲ့ ဖော်ပြမှုက ထရမ့်ကို အီရန်ဘက်က လုပ်ကြံဖို့ ဒီအခင်းမဖြစ်ပွားခင်ကတည်းက စီစဉ်နေကြောင်း လူသားအရင်းအမြစ် တစ်ခုကနေ သိရှိထားလို့ လုံခြုံရေးမြှင့်တင် ထားရှိပေးခဲ့ရတယ်လို့ ဖော်ပြခဲ့တာဖြစ်ပြီး တခြားသော အမေရိကန်မီဒီယာတွေကပါ ထရမ့်လုပ်ကြံမှုကို အီရန်က အကွက်ချစီစဉ်တာလို့ ဖော်ပြမှုတွေ ရှိလာခဲ့ပါတယ်။ နောက်တော့မှ CNN ဟာ အခု အထက်တန်းကျောင်းသားလေး သေနတ်နဲ့ အနည်းဆုံး ၈ ချက် ပစ်ခတ်လုပ်ကြံမှု ကတော့ အီရန်ရဲ့ အကြံအစည်နဲ့မသက်ဆိုင်တဲ့ သီးခြားကိစ္စလို့ ဖော်ပြသွားပါတယ်။
အမေရိကန်အမျိုးသားလုံခြုံရေးကောင်စီက ၂၀၂၀ ပြည့်နှစ်က အီရန်ရဲ့ အရှေ့အလယ်ပိုင်းဒေသဆိုင်ရာ ပြည်ပတော်လှန်ရေးအစောင့်တပ် အကြီးအကဲ ကာဆမ်ဆိုလီမာနီကို အိမ်နီးချင်း အီရတ်နိုင်ငံ၊ ဘဂ္ဂဒက်မြို့အပြင်မှာ ဒရုန်းနဲ့ ပစ်ခတ်လုပ်ကြံ ရှင်းလင်းလိုက်မှုကြောင့် ဒီစီမံကိန်းကို အမိန့်ပေးခဲ့တဲ့ ဒေါ်နယ်ထရမ့်နဲ့ သူ့ စီမံခန့်ခွဲရေး အဖွဲ့အကြီးအကဲတွေကို လက်စားချေရှင်းလင်းဖို့ အီရန်ဘက်က စီမံကိန်းချထားတာဖြစ်တယ်လို့ ထုတ်ပြန်ခဲ့ သေးပါတယ်။
ဒါပေမယ့် အခု အထက်တန်းကျောင်းသားလေးက ဒေါ်နယ်ထရမ့် နားရွက်ထိသွားစေတဲ့ လုပ်ကြံမှုနဲ့ပတ်သက်ပြီး အမေရိကန်မီဒီယာတွေ စွပ်စွဲချက်ဟာ အထောက်အထားကင်းမဲ့ပြီး အန္တရာယ်ရှိတဲ့ ဆိုးဆိုးရွားရွား စွပ်စွဲမှုသာဖြစ်ကြောင်း အီရန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ နက်ဆာကာနာနီက ဒေါသတကြီး ငြင်းဆန်သွားခဲ့ပါတယ်။
ဒါပေမယ့် ကာဆမ်ဆိုလီမာနီကို သတ်ဖြတ်ခဲ့ခြင်းအတွက် အမိန့်ပေးသူ ဒေါ်နယ်ထရမ့်ကို တရားစီရင် နိုင်ရေးကိုတော့ ခိုင်မာတဲ့ဆုံးဖြတ်ချက် ချမှတ်ထားကြောင်း ကာနာနီက ဆက်လက်ပြောကြားသွားပါတယ်။
Ref: brecorder
MKF-001
