မဲခေါင်၊ ဇူလိုင် ၅
အမေရိကန်စစ်တပ် သတင်းထုတ်ပြန်ရေး ဖော်ပြချက်အရ ဂျာမနီနိုင်ငံ မန်ဟိမ်းမှာ ထားရှိတဲ့ တင့်ကား အစီး ၁၀၀၊ ခြေလျှင်တိုက်ခိုက်ရေးယာဉ် M2A4 ၁၅၂ စီးနဲ့ အလိုအလျှောက် ဟောင်ဝစ်ဇာ ထိန်းချုပ်ပစ်ခတ်နိုင်စွမ်းရှိ တိုက်ခိုက်ရေးယာဉ် M109A7 ၁၈ စီးကို နေတိုးရဲ့ အရှေ့တံခါးဖြစ်တဲ့ ပိုလန်နိုင်ငံ ပိုးဝစ်ဇ်ရွာကို ပိုဆောင်နေရာပြောင်းလဲ ချထားလိုက်ပြီ ဖြစ်ကြောင်း သိရပါတယ်။
ပိုဝစ်ဇ်ရွာမှာ အမေရိကန်ရဲ့ ဥရောပအခြေစိုက် လက်နက်ခဲယမ်းသိုလှောင်စနစ် (Army Prepositioned Stock /APS) ထားရှိပြီး ပိုလန်နဲ့အမေရိကန် စစ်တပ် ပူးပေါင်းထားတဲ့ အမှတ် ၄၀၅ ကွင်းဆက်ထောက်ပို့တပ်မဟာအတွက် ပေးပို့တာဖြစ်ပါတယ်။
စခန်းချ ထားတဲ့နေရာဟာ အမှတ် ၃၃ လေတပ်အခြေစိုက်စခန်းနဲ့နီးလို့ လိုအပ်တဲ့ စစ်ဘက်ဆိုင်ရာ ခဲယမ်း၊ အပိုပစ္စည်း၊ ဆီ၊ တခြား လိုအပ်တာတွေ ကို အမြန်ဆုံးပို့ဆောင်နိုင်တဲ့အခြေအနေကို ပြင်ဆင်ထားတာဖြစ်ကာ ရုရှားနဲ့ စတင်စစ်ဆိုင်ခဲ့ရင် ချက်ချင်း ထောက်ပို့ ပေးနိုင်မယ့် ဇုန်အဖြစ် သတ်မှတ်ပြင်ဆင်ထားတာလည်းဖြစ်ပါတယ်။
အမေရိကန်ရဲ့ စစ်ရေးစီမံကိန်းအဖြစ် ဒီစီမံကိန်းကို ချမှတ်ထားတာနှစ်ပေါင်းအတော်ကြာနေပြီဖြစ်ပြီး ၂၀၁၉ ခုနှစ် ကမှ ပိုလန်နဲ့စာချုပ်ပြီးစီးလို့ သိုလှောင်ထားရှိမယ့် နေရာ အသင့်မဖြစ်သေးလို့ ဂျာမနီမှာ စုဆောင်းထားရှိရာက အခု ပိုးဝစ်ဇ်မှာ အခြေစိုက်ထားရှိမှုတွေ စတင်လုပ်ဆောင်နေတာပဲဖြစ်ပါတယ်။
အမေရိကန်မှာ ဒီလို ပြည်ပအခြေ စိုက် လက်နက်ခဲယမ်းသိုလှောင်ရုံကြီးပေါင်း ၇ ခု ရှိပါတယ်။ APS-1 ကို အမေရိက၊ ၂ APS-2 ကို ဥရောပ၊ APS- 3 ကို ပစ္စိဖိတ်ဒေသ ဒီယေဂိုဂါစီယာကျွန်း၊ APS-4 ကို ဂျပန်နဲ့ တောင်ကိုရီးယား၊ APS-5 ကို ကူဝိတ်နဲ့ ကာတာ၊ APS-6 ကို ချာလက်စတန်၊ ကန်ဆက်စ်၊ ဂွမ်တာနာမိုပင်လယ်ကွေ၊ ကျူးဘား၊ ဒီယေဂိုဂါစီယာကျွန်းမှာထားရှိပြီး APS-7 ကို အီတလီမှာ အခြေစိုက်ထားရှိပါတယ်။
ပိုးဝစ်ဇ်က APS ကို နေတိုးလုံခြုံရေးရင်းနှီးမြှုပ်နှံမှုအစီအစဉ် ရန်ပုံငွေနဲ့ အခြေခံအဆောက်အအုံတွေ ဆောက်လုပ် တာဖြစ်ပြီး ဒေါ်လာ သန်း ၂၁၀ ကုန်ကျခံရာမှာ အမေရိကန်ဘက်က ၂၀ ရာခိုင်နှုန်းကနေ ၂၅ ရာခိုင်နှုန်းအထိ ကျခံ သုံးစွဲပေးခဲ့ပါတယ်။
ရုရှားဘက်က ဥရောပကို စတင်ကျူးကျော်လာရင် ပိုးဝစ်ဇ်စခန်းနဲ့ စတင်ထိတွေ့မှာဖြစ်ပြီး Financial Times ကဖော်ပြတဲ့သတင်းတစ်ရပ်မှာတော့ လေကြောင်းရန်ကာကွယ်ရေးစနစ်တွေ လိုအပ်ချက် များစွာရှိနေသေးတယ်လို့ ထောက်ပြထားပါတယ်။
အရေးအကြီးဆုံးကာကွယ်ရေးစနစ်ကလည်း လေကြောင်းရန် ကာကွယ်ရေးစနစ်သာဖြစ်ကြောင်း နေတိုးအကြီးအကဲတစ်ယောက်ကလည်း ဝန်ခံထားကြောင်း၊ ဆက်လက် ပြင်ဆင်သွားမှာဖြစ်ကြောင်း Financial Times ကို ရှင်းလင်းပြောကြားခဲ့ပါတယ်။
Ref: bulgarianmilitary
MKF-001
