မဲခေါင်၊ ဇွန် ၂၀
ထိုင်ဝမ်ဒေသတွင်း သတင်းတွေအရ ပြီးခဲ့တဲ့တစ်ပတ် ဇွန် ၁၃ ရက်နေ့ မနက် ၅ နာရီလောက်မှာ တရုတ်ရဲ့ တန် ၁၁၀၀၀ အလေးချိန်ရှိ ရေဒါဖမ်းမရတဲ့ ကိုယ်ပျောက် ရေငုပ်သင်္ဘောကြီး ထိုင်ဝမ်ရေလက်ကြား နှစ်နိုင်ငံနယ်နိမိတ် သတ်မှတ်ဇုန်နား ရေပေါ်မိနစ်အတော်ကြာ ပေါ်လာခဲ့တယ်လို့ သိရှိရပါတယ်။
တရုတ်အစိုးရရဲ့ ထုတ်ဖော်ပြောဆိုထားမှုမှာ ထိုင်ဝမ်ရေလက်ကြားထဲ ပေါ်လာတဲ့ Jin class ရေငုပ်သင်္ဘောမျိုး ၆ စီး ရှိကြောင်းသိရပြီး ဒီသင်္ဘောပေါ်မှာ နျူကလီးယားထိပ်ဖူး ၁၂ လုံးတပ် ဒုံးကျည်တွေ တင်ဆောင်ပစ်ခတ် နိုင်ကြောင်း သိရှိရပါတယ်။
မနက်အစောပိုင်း တံငါသည်တွေ ငါးဖမ်းထွက်တုန်း ၁၃၅ မီတာရှည်ပြီး ဒေါ်လာ သန်း ၇၅၀ တန်တယ်ဆိုတဲ့ ဒီရေငုပ်သင်္ဘောကြီးဟာ နှစ်နိုင်ငံ ရေပိုင်နက်ကြား ဘွားကနဲပေါ်လာပြီး မရှေးမနှောင်းမှာပဲ တရုတ်စစ်သင်္ဘောတစ်စင်း အရင်ရောက်လာလို့ နှစ်ဖက်ချိတ်ဆက် လုပ်ဆောင်မှုတွေ မိနစ်ပိုင်းကြာလုပ်ပြီးမှ ထပ်ရောက်လာတဲ့ စစ်သင်္ဘောအများအပြားနဲ့ တရုတ်ကုန်းမကြီးဘက် ပြန်မောင်းသွားခဲ့တယ်လို့ မျက်မြင်တံငါသည်တွေက ပြောဆိုကြပါတယ်။
တရုတ်ဟာ လွတ်လပ်နိုင်ငံအဖြစ် ရပ်တည်တဲ့ ထိုင်ဝမ်ကို ချက်ချင်း သိမ်းနိုင်တယ်လို့ ခြိမ်းခြောက်ထားသလို မေလကုန်ပိုင်းက စစ်အင်အား အလုံးအရင်းနဲ့ ကျူးကျော် သိမ်းပိုက်မှုအဆင့် စစ်ရေးလေ့ကျင့်မှုတွေကို ထိုင်ဝမ်ကျွန်းနား လုပ်ဆောင်ခဲ့ပါသေးတယ်။
ပြီးခဲ့တဲ့ ဇွန် ၁၄ ရက်မှာလည်း ၂၄ နာရီအတွင်း ထိုင်ဝမ်ကျွန်းနားမှာ စစ်သင်္ဘော ၂၇ စီး၊ စစ်လေယာဉ် ၆၂ စီးအထိ အင်အားသုံး လှည့်လည် ခြိမ်းခြောက်ခဲ့လို့ ထိုင်ဝမ်ဘက်က အချုပ်အခြာအာဏာကို ထိပါးရင် တုံ့ပြန်ဖို့ အသင့်ပြင်ထားကြောင်း ပြန်လည်ထုတ်ပြန်ပါတယ်။
တရုတ်သမ္မတ ရှီကျင်းဖျင်ဟာ နိုင်ငံစစ်အင်အားကို ၂၀၃၀ ပြည့်နှစ်မှာ တိုက်ချင်းပစ် ဒုံးပိုင်ဆိုင်မှုအရေအတွက် အမေရိကန်နဲ့ရုရှားကို မီရမယ်လို့ ပစ်မှတ်ထားပြီး ဒုံးကျည်များစွာ ထုတ်လုပ်နေသလို ၂၀၄၉ ခုနှစ်မှာ ကမ္ဘာ့ စစ်အင်အားအကြီးဆုံး နိုင်ငံဖြစ်စေဖို့ တိုးတိုးတိတ်တိတ်နဲ့ နျူကလီးယားထိပ်ဖူးပေါင်းများစွာကို အရှိန်အဟုန် မြင့်ထုတ်လုပ်နေပါတယ်။
ဆွီဒင်နိုင်ငံ စတော့ဟုမ်း၊ နိုင်ငံတကာငြိမ်းချမ်းရေးလေ့လာမှု အင်စတီကျု(SIPRI) ရဲ့ အကြီးအကဲ ခရစ္စတန်ဆန် က တရုတ်ဟာ ပြီးခဲ့တဲ့ ၁၂ လအတွင်း နျူကလီးယား ထိပ်ဖူးပေါင်း ၁၀၀ ထုတ်လုပ်ခဲ့လို့ အချိန်ပိုင်းအတွင်း နျူးကလီးယားထိပ်ဖူး အများဆုံးထုတ်လုပ်တဲ့ နိုင်ငံဖြစ်နေကြောင်းနဲ့ လက်ရှိမှာ ထိပ်ဖူးပေါင်း ၅၀၀ ကျော်ပိုင်ဆိုင် ထားပြီဖြစ်ကြောင်း သုံးသပ်ခဲ့ပါတယ်။
နေတိုးအကြီးအကဲ စတိုလ်တန်ဘာ့ဂ်ကလည်း ဒီတစ်ပတ်ထဲ နျူကလီးယားကာကွယ်ရေး ဝန်ကြီးဌာနများ အစည်းအဝေးပွဲကို အရေးပေါ် ကျင်းပမှာဖြစ်ပြီး တရုတ်၊ ရုရှားနဲ့ မြောက်ကိုရီးယားဆိုတဲ့ နျူကလီးယားပိုင် နိုင်ငံတွေမှာ ထိပ်ဖူးတွေ အလုံးအရင်း ထုတ်လုပ်နေချိန် နေတိုးမဟာမိတ်တွေမှာ ဒီလက်နက်မရှိတာက ပိုပြီး အန္တရာယ်များစေတာကြောင့် မူဝါဒပြင်ဆင်ပြီး နျူးကလီးယားထိပ်ဖူးတွေ ထုတ်လုပ်ဖို့ ဆွေးနွေးရမှာ ဖြစ်ကြောင်း ထုတ်ဖော်ပြောဆိုခဲ့ပါတယ်။
Ref:Thesun
MKF-001
