မဲခေါင်၊ ဇွန် ၁၄
ကမ္ဘာ့အစည်ကားဆုံးနဲ့ ဝန်ဆောင်မှု အညံ့ဆုံးအဆင့် သတ်မှတ်ခံထားရတဲ့ ဖိလစ်ပိုင်နိုင်ငံ မနီလာမြို့က နီနွိုင်အာကွီနိုလေဆိပ်မှာ အသက် ၃၄ နှစ်အရွယ် ဗီယက်နမ်သူ ငုယင်သိုင်ထရန်ဆိုသူဟာ ဗီဇာရက်ကျော် ပြဿနာကြောင့် ငွေတောင်းခံမှုကို မကျေနပ်လို့ ဝတ်လစ်စလစ်နဲ့ ထွက်ခွာရာတစ်လျှောက် တန်းစီနေတဲ့လူတန်းထဲ လျှောက်သွားနေတဲ့ ဖြစ်ရပ်တစ်ခု ဖြစ်ပွားခဲ့ပါတယ်။
ဖိလစ်ပိုင်ကို အလည်အပတ် ခရီးစဉ်လာအပြီး ဗီယက်နမ် ဆိုင်ဂုံ(ဟိုချီမင်း) လေဆိပ်ကို ငုယင်သိုင်ထရန် ပြန်ဖို့လုပ်ရာမှာ လေဆိပ် လူဝင်မှုကြီးကြပ်ရေးအဖွဲ့က ဇွန်၊ ၈ ရက်မှာ ဗီဇာသက်တမ်းကုန်ပြီး ရက်ပိုနေလို့ ငွေတောင်းရာက ဒေါသထွက်ပေါက်ကွဲလို့ လေဆိပ်အိမ်သာထဲ အရင်ဝင်သွားခဲ့ပါတယ်။
ပြန်ထွက်လာရာမှာ လုံး၀ အဝတ်အစားတစ်ခုမှ မပါတော့ဘဲ ထွက်ခွာရာစီတန်းနေတဲ့ လူတန်းထဲ ခပ်တည်တည် လျှောက်သွားနေခဲ့လို့ လေဆိပ် လုံခြုံရေးဝန်ထမ်းတွေ ဗျာများပြီး လိုက်လံချော့မော့ ဖြောင်းဖျခဲ့ရတာဖြစ်ပါတယ်။
လေဆိပ် လုံခြုံရေးဝန်ထမ်းတွေဟာ ငုယင်သိုင်ထရန်ကို အဝတ်အစားတွေလိုက်ပေး၊ ရေနဲ့ အစားအစာတွေပေးပြီး ချော့မော့ ဖြောင့်ဖျနိုင်ခဲ့ပြီးနောက် လေယာဉ် ခရီးစဉ်အပေါ် အနှောင့်အယှက်မဖြစ်စေဘဲ စိတ်ပိုင်းဆိုင်ရာ ဆေးစစ်မှုလုပ်အပြီး ဟိုချီမင်းလေဆိပ်ဆီ ပျံသန်းတဲ့လေယာဉ်နဲ့ တင်ပေးလိုက်နိုင်တယ်လို့ လေဆိပ်တာဝန်ရှိသူတွေက ဆိုပါတယ်။
လေဆိပ်ဝန်ထမ်းတွေနဲ့ ငုယင်သိုင်ထရန်အကြား ဘာသာစကား အခက်အခဲကြောင့် Google Translate အသုံးပြု ပြောဆိုရာက နားလည်မှုလွဲမှားပြီး စိတ်ဆိုးသွားစေတာ ဖြစ်တယ်လို့သာ လေဆိပ်တာဝန်ရှိသူတွေက ထုတ်ပြန်ရှင်းလင်းပါတယ်။
ဖိလစ်ပိုင်ရဲ့ နီနွိုင်အာကွီနိုလေဆိပ်ဟာ ၂၀၂၂ ခုနှစ်က ခရီးသွားများပြီး business class ခရီးသွားတွေအတွက် ဝန်ဆောင်မှုအရာမှာ အနိမ့်ဆုံးအဆင့် သတ်မှတ်ချက် ၃၈ မှာ အဆင့် ၃၈ နေရာသာရတဲ့ လေဆိပ်အဖြစ် မှတ်တမ်းဝင်ပါတယ်။ ဒီနှစ်ထဲမှာ အာရှရဲ့ နံပါတ် (၄) အဆိုးဆုံး လေဆိပ်အဖြစ် နာမည်ထပ်ပျက်ခဲ့ပါသေးတယ်။
မနှစ်က စက်တင်ဘာလမှာ လေဆိပ်က အိတ်တွေ စောင့်ကြည့်ပေးရတဲ့ ဝန်ထမ်းဟာ နိုင်ငံခြားခရီးသွားတစ်ယောက် အိတ်ထဲက ဒေါ်လာ ၃၀၀ ကို ခိုးပြီး ပါးစပ်ထဲ မျိုချမှုလုပ်တဲ့ ကင်မရာမှတ်တမ်း ပေါ်ထွက်ခဲ့သလို ၂၀၁၃ ခုနှစ်က လေဆိပ်လုံခြုံရေးဝန်ထမ်းဟာ ခရီးသည်တွေရဲ့ အိတ်တွေထဲ ကျည်ဆံတွေထည့်ပြီး ငွေညှစ်ခြိမ်းခြောက်မှုတွေ ပြုလုပ်ခဲ့ကြောင်း ဖော်ထုတ်တွေ့ရှိခဲ့ရပါသေးတယ်။
မတ်လကတည်း ထွက်ခွာရာအခန်းရဲ့ ခုံတန်းတွေဘေးနဲ့ မျက်နှာကျက်တွေပေါ်မှာ ကြွက်တွေနဲ့ အန္တရာယ်ရှိတဲ့ ပိုးကောင်တွေဟာ ခရီးသည်တွေနဲ့ နီးကပ် စွာ သွားလာနေတဲ့ မှတ်တမ်းရိုက်ကူး ဖော်ပြခံခဲ့ရပါသေးတယ်။
Ref:Thesun
MKF-001
