မဲခေါင်၊ မေ ၂၂
ကွန်ဂိုဒီမိုကရက်တစ်သမ္မတနိုင်ငံ (DR Congo) မှာ ပြီးခဲ့တဲ့ မေ ၁၉ ရက် တနင်္ဂနွေ မနက် ၄ နာရီက သမ္မတအိမ်တော်နဲ့ အနီးအနားက စီးပွားရေးဝန်ကြီးတို့ နေအိမ်တွေကို လက်နက်ကိုင်တစ်စု ဝင်ရောက်စီးနင်းပြီး အာဏာသိမ်းဖို့ ကြိုးစားခဲ့တာ မအောင်မြင်ခဲ့ဘဲ ၆ ယောက်သေဆုံးကာ ဖမ်းဆီးရမိသူတွေထဲ အမေရိကန်သား ၃ ယောက်နဲ့ ဗြိတိန်သား တစ်ယောက်ပါဝင်နေခဲ့ကြောင်း သိရှိရပါတယ်။
ကွန်ဂိုမြို့တော်ကင်ရှာဆာ ကွန်ဂိုမြစ်ကမ်းဘေးမှာရှိတဲ့ သမ္မတဖိလစ်ရှီဆီခီဒီ နေအိမ်ဝန်းကို အနည်းဆုံး ကား ၇ စီးနဲ့ လက်နက်ကိုင်တွေ ဝင်ရောက်လာခဲ့ပြီး မြစ်အတွင်းကနေ တက်လာတဲ့သူတွေနဲ့ပေါင်းရင် ဒါဇင်ပေါင်းများစွာချီတဲ့ သူတွေဟာ ခြံအတွင်းဝင်ရောက်ကာ လုံခြုံရေးရဲတပ်ဖွဲ့တွေကို ပစ်ခတ်သတ်ဖြတ်လို့ အာဏာသိမ်းမှု အောင်မြင်ပြီ ဆိုပြီး ဖေ့စ်ဘုတ်ကနေ Live လွှင့်ခဲ့ကြပါတယ်။
ဒါပေမဲ့ မကြာခင် ကွန်ဂိုလုံခြုံရေးတပ်တွေရောက်လာပြီး တစ်နာရီကြာ အပြန်အလှန်ပစ်ခတ်ပြီးနောက် အာဏာသိမ်းမှုမအောင်မြင်ခဲ့ဘဲ အာဏာလုဖို့ကြံသူ အနည်းဆုံး အယောက် ၅၀ ကို ဖမ်းဆီးရမိခဲ့ကြောင်းနဲ့ သမ္မတနဲ့ မိသားစုဟာ ထိခိုက်ဒဏ်ရာရမှုမရှိခဲ့ကြောင်း၊ အိမ်တော်ဝန်းစောင့် လုံခြုံရေး ၂ ယောက်နဲ့ အာဏာသိမ်း အဖွဲ့က ၄ ယောက် စုစုပေါင်း ၆ ယောက်သေဆုံးခဲ့တယ်လို့ ကွန်ဂိုအစိုးရပြောရေးဆိုခွင့်ရှိသူက ထုတ်ပြန်ပါတယ်။
သမ္မတ အိမ်တော်နဲ့ ၁ . ၂ မိုင်အကွာမှာသာရှိတဲ့ စီးပွားရေးဝန်ကြီးအိမ် စီးနင်းမှုလည်း မအောင်မြင်ခဲ့ဘဲ ဖမ်းဆီးရမိသူတွေထဲမှာ အာဏာသိမ်းဖို့ ဦးဆောင်ကြံစည်တဲ့ ကွန်ဂို-အမေရိကန်သား ခရစ်ရှန်မာလန်ဂါ (၄၁ နှစ်) ရဲ့သား မာဆယ် (၂၁ နှစ်) ကိုပါ ဖမ်းဆီးရမိခဲ့ပါတယ်။
မာဆယ်ဟာ သမ္မတအိမ်တော်ဝင်းထဲ ဝင်ရောက်ပြီးနောက် ဇိုင်ယာအလံတော်ကို လွှင့်ထူပြီး ဇိုင်ယာ သက်တော်ရှည်ပါစေ၊ မိုဘူတူရဲ့ ကလေးတွေလည်း သက်တော်ရှည်ပါစေ၊ ဖိလစ်ကျဆုံးပြီ။ ငါတို့ အောင်ပြီလို့ အော်ဟစ်အောင်ပွဲခံတဲ့ Live ဗီဒီယိုကို ဖေ့စ်ဘုတ်မှာတင်ခဲ့ပါတယ်။
ကွန်ဂိုနိုင်ငံ ကို ၁၉၆၅ ခုနှစ်အထိ ဇိုင်ယာနိုင်ငံလို့ ခေါ်ဆိုကြပြီး ၁၉၉၇ ခုနှစ်ရောက်မှ ဇိုင်ယာနိုင်ငံက ဖြစ်တည်လာတဲ့ အာဏာရှင် အမ်ဘူတူဆီဆီဆက်ကိုကို ဖြုတ်ချလို့ အစိုးရသစ် ပြန်လည်ဖွဲ့စည်းခဲ့တာဖြစ်ပါတယ်။
အာဏာသိမ်းခေါင်းဆောင် မာလန်ဂါဟာ လက်ရှိအစိုးရကို မိဘတွေလက်ထက်ကတည်းက တော်လှန်ခဲ့ပြီး ငယ် ဘ၀ကတည်းက အမေရိကန်မှာ ခိုလှုံနိုင်ငံသားဖြစ်ခဲ့ရာက ပြည်ပရောက် ကွန်ဂိုသားတွေကို လက်ရှိအစိုးရအပေါ် ပြန်ဖြုတ်ချပြီး အာဏာသိမ်းဖို့ ကြံစည်နေခဲ့သူဖြစ်ပါတယ်။ အခု အကြမ်းဖက်အာဏာသိမ်းဖို့ ကြိုးပမ်းမှုကို အမေရိကန်နဲ့ဗြိတိန်တို့က ရှုတ်ချခဲ့ပြီး သူတို့နိုင်ငံသားတွေ ပါဝင်နေမှုအတွက် ကွန်ဂိုအစိုးရနဲ့ ပူးပေါင်းပြီး အပြစ် ပေးအရေးယူသွားမယ်လို့ ထုတ်ပြန်ခဲ့ပါတယ်။
MKF – 001
Ref:Thesun
