မဲခေါင်၊ ဒီဇင်ဘာ ၂၀

အစ္စရေးကို အသိအမှတ်မပြုတဲ့နိုင်ငံတွေထဲမှာပါဝင်တဲ့ မွတ်ဆလင်အများစုနေထိုင်ရာ မလေးရှားနိုင်ငံဟာ ဒီဇင်ဘာ ၂၀ ရက် ဗုဒ္ဓဟူးနေ့မှာပဲ ပါလက်စတိုင်းပြည်သူတွေကို အရေးမစိုက်ဘဲ ဂါဇာမှာ သွေးချောင်းစီး စစ်ပွဲ ဆင်နွှဲနေတဲ့ အစ္စရေးကြောင့် သူ့နိုင်ငံပိုင် ဘယ်ဆိပ်ကမ်းမှာမှ အစ္စရေးနဲ့ပတ်သက်တဲ့ သင်္ဘောတွေကို ဆိုက်ကပ် ခွင့်မပြုတော့ဘူးလို့ ထုတ်ပြန်ခဲ့ပါတယ်။

ပါလက်စတိုင်းဖြစ်တည်ခြင်းနဲ့အခွင့်အရေးကိုထောက်ခံတဲ့ နိုင်ငံတွေထဲမှာ မလေးရှားအပြင် အင်ဒိုနီးရှား၊ ဘရူနိုင်း၊ ဘင်္ဂလားဒေ့ရှ်၊ မော်လ်ဒိုက်နဲ့ပါကစ္စတန်နိုင်ငံတွေလည်းပါဝင်ခဲ့ပြီး အောက်တိုဘာ ၇ ရက်နေ့က ဂါဇာကို ထိန်းချုပ်ထားတဲ့ ဟားမက်စ်တွေဟာ အစ္စရေးနယ်စပ်ဖြတ်ကျော်ပြီး ပြည်သူအများစုပါဝင်တဲ့ အယောက် ၁၂၀၀ ကျော်ကို သတ်ဖြတ်၊ အယောက် ၂၄၀ ကျော်ကို ဓားစာခံအဖြစ် ပြန်ပေးဆွဲသွားခဲ့ပေမယ့် ဟားမက်စ်ဆက်ဆံမှုကို ဆက်ထိန်းထားပြီး အပြစ်ပေးစရာမရှိလို့ မလေးရှားဝန်ကြီးချုပ် အန်ဝါအီဘရာဟင်က နိုဝင်ဘာလအတွင်း လွှတ် တော်အစည်းအဝေးမှာ လူသိရှင်ကြား ပြောဆိုခဲ့ပါတယ်။

မလေးရှားအစိုးရဟာ ၂၀၀၅ ခုနှစ်က စလို့ အစ္စရေးမှတ်ပုံတင် ကုမ္ပဏီသင်္ဘောတွေကို ပြည်တွင်း ဆိပ်ကမ်းတွေမှာ ဆိုက်ကပ်ခွင့်ပြန်ပေးခဲ့ပေမယ့် အခုတော့ အန်ဝါက “အခြေခံလူသားချင်းစာနာနားလည်မှုစည်းမျဉ်း၊ နိုင်ငံတကာစည်းမျဉ်းအားလုံးကို မျက်ကွယ်ပြုပြီး ပါလက်စတိုင်းပြည်သူတွေအပေါ် အစုလိုက်သေကြေစေတဲ့ တိုက်ခိုက်မှုတွေ လုပ်ခဲ့တဲ့ အစ္စရေးရဲ့ လုပ်ရပ်ကြောင့် တုံ့ပြန်မှုအဖြစ် အစ္စရေးပိုင်၊ အစ္စရေးအလံတင် သင်္ဘောတွေ အပြင် အစ္စရေးကို သွားမယ့် ဘယ်သင်္ဘောမျိုးကိုမှ မလေးရှားဆိပ်ကမ်းတွေမှာ ဆိုက်ကပ်ခွင့်မပေးတော့ပါဘူး” လို့ ထုတ်ပြန်ကြေညာသွားခဲ့ပါတယ်။

ဒါ့အပြင် အစ္စရေးမှအပ နိုင်ငံတိုင်းက ပတ်စ်ပို့ကိုင်ဆောင်ထားသူတိုင်းကို မလေးရှားက ပြည်ဝင်ခွင့်ပြုမှာဖြစ်ပြီး ကြိုတင်သဘောတူညီချက်မရှိဘဲ ဘယ်အစ္စရေးနိုင်ငံသားမှ မလေးရှားနိုင်ငံထဲမဝင်ရလို့လည်း အန်ဝါက တစ်ဆက် တည်း ထုတ်ပြန်သွားပါတယ်။

Ref: cnn
MKF-001

#MeKongNews

#အစ္စရေး

#မလေးရှား

#သင်္ဘော

#ကမ်းကပ်ခွင့်

#ပိတ်ပင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)