မဲခေါင်၊ ဖေဖော်ဝါရီ ၁၁
ကရင်နီပြည်၊ ဒီးမော့ဆိုမြို့နယ်အတွင်း စစ်ကောင်စီတပ်စွဲထားတဲ့ နေရာတစ်ခုကို ဝင်ရောက် တိုက်ခိုက်ရာ စစ်သား တစ်ဦး သေဆုံးတယ်လို့ KNDF-B07 တပ်ရင်းက ဒီကနေ့ ထုတ်ပြန်ပါတယ်။
ဒီးမော့ဆိုမြို့နယ်၊ ပူဖားကျေးရွာမှာ တပ်စွဲထားတဲ့ စစ်ကောင်စီတပ်ဖွဲ့တွေကို ဒီကနေ့ မနက် ၁၀ နာရီကျော်မှာ KNDF B (07) နဲ့ B (06) တို့ပူးပေါင်းပြီး အလစ်အငိုက် ဝင်ရောက်တိုက်ခိုက်ခဲ့တာလို့ သိရပါတယ်။
အဲဒီ တိုက်ခိုက်မှုအတွင်း လက်နက်ကြီး၊ လက်နက်ငယ်တွေနဲ့ အပြန်အလှန် ပစ်ခတ်မှု ဖြစ်ပွားခဲ့တယ်လို့ သိရပါတယ်။
အလစ်အငိုက် တိုက်ခိုက်မှုအတွင်း စစ်ကောင်စီဘက်က တစ်ဦး သေဆုံးတာကို အတည်ပြုနိုင်ခဲ့ပြီး ပူးပေါင်းတပ်မှ အထိခိုက်မရှိ ပြန်လည် ဆုတ်ခွာနိုင်ခဲ့တယ်လို့ KNDF-B07 က ဖော်ပြထားပါတယ်။
ကရင်နီပြည်နယ်မှာ စစ်ကောင်စီတပ်တွေကို ဒေသခံ ကာကွယ်ရေးတပ်တွေ မကြာခဏ တိုက်ခိုက်လျက်ရှိပြီး ဖေဖော်ဝါရီ ၉ ရက်ကလည်း လွိုင်ကော်မြို့နယ်မှာ စစ်ကောင်စီတပ်ဖွဲ့ကို KNDF နဲ့ PDF တို့ ပူးပေါင်း တိုက်ခိုက်ခဲ့တယ်လို့ သိရပါတယ်။
အဲဒီ တိုက်ခိုက်မှုမှာ ပူးပေါင်းတပ်ဖွဲ့က စစ်ကောင်စီတပ်စခန်း တွေကို မိနစ် ၂၀ ကျော်ကြာ တစ်ပြိုင်တည်း အလစ်အငိုက် တိုက်ခိုက်ခဲ့တာဖြစ်ပြီး ကယန်းသာယာ လမ်းခွဲ စခန်းမှာ စစ်သား ၂ ဦး၊ လင်ဖုံလေး လမ်းခွဲမှာ စစ်သား ၂ ဦး သေဆုံးကာ ထိခိုက်ဒဏ်ရာ ရရှိသူတွေ ရှိတယ်လို့လည်း သိရပါတယ်။
MK-003