မဲခေါင်၊ ဧပြီ ၅
ထိုင်း-မြန်မာနယ်စပ်မဲဆောက်မြို့မှာ လာရောက်ဆေးကုသနေတဲ့ Lion Battalion ဒုစစ်ကြောင်းမှူး ကိုသီဟ အပါအဝင် ပြည်သူ့ကာကွယ်ရေးတပ်ဖွဲ့ဝင် ၃ ဦးဟာ ထိုင်းအာဏာပိုင်တွေဖမ်းဆီးတာခံခဲ့ရပြီး ကရင်ပြည်နယ် နယ်ခြားစောင့်တပ် – BGF ကနေတဆင့် မြဝတီဘက်ကို ပြန်လွှဲစဉ်မှာ ဒုစစ်ကြောင်းမှူးကိုသီဟ ကျဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့ဝင်တွေထံက သိရပါတယ်။
ဒီနေ့ ဧပြီလ ၅ ရက် ညပိုင်းရတဲ့ နောက်ဆုံးသတင်းတွေအရ ဒုစစ်ကြောင်းမှူး ကိုသီဟ ကျဆုံးသွားပြီး စောဖြိုးလေးက ဒဏ်ရာအပြင်းအထန်ရထားသလို ထက်နေဝင်းကို မော်လမြိုင်စစ်ကြောရေးကို ခေါ်သွားတယ်လို့ သူတို့နဲ့နီးစပ်တဲ့ တောင်ပိုင်းတိုင်းစစ်ဒေသအခြေပြု တော်လှန်ရေးတပ်ဖွဲ့ဝင်တစ်ဦးက မဲခေါင်ကို ပြောပါတယ်။
“နောက်ဆုံးသတင်းအရ ဒုစစ်ကြောင်းမှူး ကိုသီဟကတော့ ကျောကုန်းကိုထိမှန်ပြီး ရင်ဘတ်ပွင့်ထွက်သွားပြီး ကျဆုံးတယ်ပေါ့နော်။ သေချာသလောက်ရှိတယ် မြေပြင်သတင်းအရတော့။ ကျန်တဲ့နှစ်ယောက်မှာ စောဖြိုးလေးက ဒဏ်ရာအပြင်းအထန်ရထားတယ်လို့သိရတယ်။ ထက်နေဝင်းကတော့ မော်လမြိုင် ရတခကို ဖမ်းဆီးခေါ်ဆောင်သွားပြီလို့ အခြေအနေကိုသိရတယ်” လို့ သူက ပြောပြပါတယ်။
Lion Battalion ဒုစစ်ကြောင်းမှူး ကိုသီဟ (၃၈ နှစ်)၊ ပြန်ကြားရေးတာဝန်ခံ ထက်နေဝင်း (၃၁ နှစ်) နဲ့ တပ်ဖွဲ့ဝင် စောဖြိုးလေး (၂၆ နှစ်) ၃ဦးဟာ ဧပြီ ၁ ရက်နေ့မှာ ဆေးခန်းသွားရင်း လမ်းမှားသွားတာကြောင့် ထိုင်းအာဏာပိုင်တွေရဲ့ ဖမ်းဆီးခံခဲ့ရတာဖြစ်ပြီး ဧပြီလ ၄ရက်မှာ သူတို့ကို ကရင် BGF ထံ ပြန်လွှဲပေးလိုက်တာဖြစ်ပါတယ်။
“လမ်းမှားပြီး ဘန်ကောက်တက်တဲ့လမ်းဘက်ရောက်သွားတာ။ အဲဒီမှာ တောမောင်း(လဝက)နဲ့တွေ့ပြီးဖမ်းသွားတယ်။ ကျွန်တော်တို့လိုက်ထုတ်တယ်။ မရတော့ ထိုင်းစစ်တပ်နဲ့ KNU က တာဝန်ရှိသူတွေက ညှိတယ်ပေါ့။ ညှိပြီးတော့ ၃ ရက်နေ့ ညနေမှာ သွားထုတ်တယ်။ ထုတ်တဲ့အချိန်မှာ ညနေပိုင်းဖြစ်နေတော့ မနက်မှာလာဖို့ပြောတယ်။ ဒါနဲ့ ၄ ရက်နေ့ မနက် ၁၁ နာရီလောက်ပြန်သွားတော့ သူတို့က လွှတ်လိုက်ပြီလို့ပြောတယ်” လို့ သူတို့အတွက်လိုက်ပါဆောင်ရွက်နေသူတစ်ဦးက မဲခေါင်သတင်းကိုပြောပြပါတယ်။
ထိုင်း လ.ဝ.က တွေ ပြန်လွှတ်ပေးခဲ့တာက အင်ကြင်းမြိုင် BGF ဂိတ်ကိုဖြစ်ပြီး ဒီနေ့မနက်ပိုင်း ဂိတ်အနီးမှာ ပစ်ခတ်မှုဖြစ်ပွားခဲ့ကာ လှေပေါ်လာသူ ၃ ဦးကို ပစ်ဖမ်းဖမ်းခဲ့ရာ ၃ဦးလုံး ဒဏ်ရာရရှိခဲ့တယ်လို့ ဂိတ်နဲ့နီးစပ်သူတွေပြောပြချက်အရ သိရပါတယ်။
အဲဒီနောက်မှာ သူတို့ ၃ဦးကို BGF တပ်ဖွဲ့ဝင်တွေက ဗိုလ်မှူး နိုင်မောင်မောင်ဇော်ထံကို အဝတ်မည်းအုပ်ပြီးပို့ဆောင်ခဲ့ကာ အဲ့ဒီကတဆင့် စစ်ကောင်စီဘက်ကို ပြန်ပို့ခဲ့တယ်လို့ သိရပါတယ်။
အလားတူ ပြီးခဲ့တဲ့ မတ်လ ၁ ရက်နေ့ကလည်း တာချီလိတ်ကြံ့ခိုင်ရေးရုံးကို ဗုံးခွဲမှုနဲ့ အလိုရှိသူတွေထဲက လင်မယား ၂ ဦးကို ထိုင်းနိုင်ငံ၊ ချင်းရိုင်ခရိုင်မှာ ထိုင်းဘက်က ဖမ်းပြီး စစ်ကောင်စီကို ပြန်လွှဲခဲ့တာဖြစ်ပါတယ်။
ပြီးခဲ့တဲ့ မတ်လ ၂၂ ရက်နေ့ကလည်း ထိုင်းရဲတပ်ဖွဲ့ဝင်၊ ထိုင်းစစ်တပ်နဲ့ လူဝင်မှုကြီးကြပ်ရေးတို့က မဲဆောက်မြို့မှာရှိတဲ့ မြန်မာတွေနေထိုင်ရာ တိုက်တန်းလျားနှစ်ခုကို ဝင်ရောက်စီးနင်းခဲ့ပြီး နေထိုင်သူတွေထဲမှာ CDM တွေ၊ တက်ကြွလှုပ်ရှားသူတွေ ပါ၊ မပါမေးမြန်းတာတွေလုပ်ခဲ့ကာ လူငယ်နှစ်ဦးကိုဖမ်းဆီးသွားခဲ့ပြီး ရက်ပိုင်းအကြာမှာ ပြန်လွှတ်ပေးခဲ့တယ်လို့ စစ်ဆေးခံရတဲ့ တိုက်တန်းလျားမှာ နေထိုင်သူတွေထံက သိရပါတယ်။
MK – 009
#MeKongNews
#LionBattalion
#မဲဆောက်
#BGF