မဲခေါင်၊ မတ် ၄
ရှမ်းပြည်နယ်ရဲ့ မြို့တော် တောင်ကြီးမြို့ရှိ နိုင်ငံကူး လက်မှတ် ထုတ်ပေးရေးရုံးကို ဖေဖော်ဝါရီ ၂၇ ရက်နေ့က ပြန်လည် ဖွင့်လှစ်ခဲ့ရာ နေ့စဉ် လူဦးရေ ကန့်သတ် လုပ်ပေးနေတဲ့ အတွက် ကိုယ်တိုင် လုပ်ဖို့ မလွယ်ကူဘဲ ပွဲစားထံ အပ်နှံမှသာ အဆင်ပြေတယ်လို့ ပတ်စပို့ သွားလုပ်ခဲ့သူတွေက ပြောပါတယ်။
လက်ရှိ တောင်ကြီး ပတ်စပို့ရုံးမှာ တစ်ရက် လူဦးရေ ၁၀၀ သာ ကန့်သတ် လုပ်ပေးနေတဲ့ အတွက် ပွဲစားတွေထံသာ အပ်နှံနေရပြီး တိုင်းရင်းသားတွေ အနေနဲ့ ပွဲစားခ ကျပ် ၃ သိန်းပေးရကာ သွေးနှော မှတ်ပုံတင် ကိုင်ဆောင်ထားသူတွေ အနေနဲ့ ကျပ် ၆ သိန်းအထိ ပေးရတယ်လို့ ကိုယ်တိုင် ကြုံတွေ့ခဲ့ရသူ တစ်ဦးက ပြောပါတယ်။
“ရုံးနောက်လမ်းထဲမှာလည်း လူတွေ ပြည့်နေတယ်။ ကိုယ်တိုင် လုပ်ဖို့ တိုးဖို့က မလွယ်ဘူး။ နေ့တိုင်း သွားတိုးနေတာထက် အများစုက ပွဲစားပဲ အပ်လိုက်ကြတယ်။ ပွဲစားက ရုံးက ရဲတွေနဲ့ ပေါင်းရိုက်တာဆိုတော့ စာရွက်စာတမ်းပေး၊ ဓာတ်ပုံရိုက်ပြီးရင် ထားခဲ့ရုံပဲ။ တိုင်းရင်းသား မှတ်ပုံတင်က ၃ သိန်းပေးရတယ်။ ကျနော်က သွေးနှောတော့ ၆ သိန်း ပေးရတယ်” လို့ သူကပြောပါတယ်။
တောင်ကြီးရုံးမှာ ရှမ်းပြည်နယ်မှာ နေထိုင်တဲ့ အိမ်ထောင်စုစာရင်း ရှိသူတွေ ပတ်စပို့ ပြုလုပ်နိုင်ပြီး အရင်က ကိုယ်တိုင်လုပ်ပါက ကျပ် ၅၀,၀၀၀ ခန့်သာ ကျသင့်ပြီး ပွဲစားအပ်ပါက ကျပ် ၂ သိန်းသာ ပေါက်ဈေးရှိခဲ့ရာက အခု ပတ်စပို့ရုံး ပြန်ဖွင့်ပြီးနောက် ပွဲစားခတွေ ဈေးတက်လာတာလို့ ဆိုပါတယ်။
လက်ရှိ ပတ်စပို့ ကိုယ်တိုင်လုပ်ဖို့ ရက်ချိန်းယူပါက ၆ လပိုင်းအကုန်မှသာ ရက်ချိန်း ရတော့မှာ ဖြစ်ပြီး ပွဲစားထံ အပ်နှံပါက အများဆုံး အချိန် ၂ ပတ်အတွင်း စာအုပ်ရတဲ့ အတွက် ငွေကြေးတတ်နိုင်သူ အများစု ပွဲစားကိုသာ အပ်နှံကြကာ အရင် ရုံးမပိတ်ခင်က QR ကုတ် ရက်ချိန်းရခဲ့သူတွေကိုတော့ ရက်ချိန်း အစားထိုး လုပ်ပေးနေတယ်လို့ သိရပါတယ်။
နိုင်ငံတဝှမ်း ပတ်စပို့ရုံးတွေကို စနစ် အဆင့်မြှင့်တင်ဖို့လို့ အကြောင်းပြပြီး စစ်ကောင်စီက ပြီးခဲ့တဲ့ ဇန်နဝါရီလ ၂ ရက်က ပိတ်သိမ်းခဲ့ရာ အခု ပြန်ဖွင့်ပေးချိန် လူအများအပြား လာလျှောက်နေတဲ့ အတွက် အခုလို ပွဲစားခတွေ မြင့်တက်နေတာ ဖြစ်ပါတယ်။
စစ်တပ် အာဏာသိမ်းပြီးနောက်ပိုင်း ရှမ်းပြည်နယ်မှာ စိုက်ပျိုးရေးနဲ့ ခရီးသွားလုပ်ငန်း ကျဆင်းခဲ့ပြီး ဒေသခံ အများစု စားဝတ်နေရေး ကျပ်တည်းလာတဲ့ အတွက် လူငယ် အများစု အလုပ်လုပ်ဖို့ ပြည်ပကို ထွက်ခွာနေရာ ပတ်စပို့ လျှောက်ထားသူ အဆမတန် များပြားလာတာ ဖြစ်တယ်လို့ တောင်ကြီး ဒေသခံတွေက သုံးသပ်ပါတယ်။