မဲခေါင်၊ မတ် ၂၂
ရှမ်းပြည်နယ် တောင်ပိုင်း၊ ပင်လောင်းမြို့နယ် တောင်မဲသင်း၊ ပင်ပွံ၊ နမ်းနိန်းရွာတွေက ဒေသခံ ၁၅ ဦးကို တိုက်ပွဲကြားကနေ ပြည်သူ့ကာကွယ်ရေးတပ်တွေ ကယ်ထုတ်နိုင်ခဲ့တယ်လို့ NUG က ဒီကနေ့ ထုတ်ပြန်လိုက်ပါတယ်။
ပြီးခဲ့တဲ့ မတ်လ ၈ ရက်၊ မနက် ၈ နာရီခန့်က တောင်စလုံးရွာ ဘုန်းကြီးကျောင်းနဲ့ ရွာထိပ် စေတီမှာ စစ်ကောင်စီတပ် ရောက်ရှိနေတယ်လို့ သိရလို့ ကျေးရွာ အတွင်း ကျန်ခဲ့တဲ့ ဒေသခံတွေကို ပြည်သူ့ကာကွယ်ရေး ပူးပေါင်း တပ်ဖွဲ့တွေ ကယ်ဆယ်ခဲ့တယ်လို့ ဆိုပါတယ်။
တိုက်ပွဲကြောင့် အလောတကြီး ထွက်လာရလို့ ရိက္ခာပြန်ယူတဲ့ ဒေသခံ ပအိုဝ်း တိုင်းရင်းသား တစ်ဦးနဲ့ ပြည်သူ့ ကာကွယ်ရေးတပ်ဖွဲ့ တွေ့ဆုံရာက ကျေးရွာ အတွင်း မပြေးနိုင်တဲ့ သက်ကြီးရွယ်အိုတွေ၊ မကျန်းမာသူတွေနဲ့ စိတ်ကျန်းမာရေး ချို့တဲ့သူတွေ ကျန်ခဲ့တယ် ဆိုတာ သိရတယ်လို့ ဆိုပါတယ်။
ဒါ့ကြောင့် ရွာထဲက မပြေးနိုင်သူတွေကို ပူးပေါင်းတပ်ဖွဲ့တွေ ကယ်ဆယ်ခဲ့ရာ ဒေသခံ ပြည်သူ ၁၅ ဦးအထိ ကယ်ဆယ်နိုင်ခဲ့တယ်လို့ ဖော်ပြထားပါတယ်။
စစ်ကောင်စီတပ်စွဲထားတဲ့ နေရာက မီတာ ၁၀၀ မှ ၅၀၀ အတွင်းသာ ရှိတာကြောင့် ခက်ခက်ခဲခဲ အသက်စွန့် ကယ်ခဲ့ရတယ်လို့ NUG က ဆိုပါတယ်။
ကယ်ဆယ်ပြီးနောက် စိတ်မကျန်းမာသူ၊ သက်ကြီးရွယ်အို၊ နာမကျန်းသူတွေကို ဆေးတပ်ဖွဲ့က ကျန်းမာရေး စောင့်ရှောက် ပေးခဲ့သလို စားနပ်ရိက္ခာ အနည်းအကျဉ်း ဝေမျှပေးနိုင်ခဲ့တယ်လို့ သိရပါတယ်။
လက်ရှိ ကယ်ဆယ်ခဲ့တဲ့ ရွာသူ ရွာသားတွေ လုံခြုံဘေးကင်း ကျန်းမာလျက်ရှိပြီး တိုက်ပွဲအတွင်း ကွဲကွာခဲ့ရတဲ့ မိသားစုတွေနဲ့ ပြန်လည် ဆုံစည်းနိုင်ရေး ချိတ်ဆက် ပေးခဲ့တယ်လို့ ပြောပါတယ်။
အဆိုပါ ပြည်သူ ၁၅ ဦးကို PNDF က တစ်ဦး ငွေကျပ် ၂၀,၀၀၀ ပေးအပ်ခဲ့ပြီး သယ်ယူ ပို့ဆောင်ပေးတဲ့ လူမှုကူညီရေးအသင်း အတွက် ခရီးစရိတ် ၃၀,၀၀၀ ကျပ် ထောက်ပံ့ ကူညီခဲ့တယ်လို့ NUG က ဆိုပါတယ်။
အဆိုပါ တိုက်ပွဲ အတွင်း ကူညီကယ်ဆယ်မှုတွေကို ပြည်သူ့ကာကွယ်ရေး ပူးပေါင်းတပ်တွေ ဖြစ်တဲ့ ပအိုဝ်း အမျိုးသား ကာကွယ်ရေးတပ်ဖွဲ့-PNDF၊ ကရင်နီ အမျိုးသားများ ကာကွယ်ရေးတပ်-KNDF၊ နေပြည်တော် ပြည်သူ့ကာကွယ်ရေးတပ်ဖွဲ့-NPT PDF၊ (၁၀၀၃) တပ်ရင်းတို့ ပူးပေါင်း လုပ်ဆောင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
MK-007