မဲခေါင်၊ မတ် ၇
ထိုင်းနိုင်ငံ တောင်ပိုင်း၊ ဆောင်ခလာခရိုင်က လူတွေစားဖို့ မွေးထားတဲ့ မိကျောင်းမွေးကန်ဟာ လွန်ခဲ့တဲ့ တစ်နှစ်က ပိုင်ရှင် သေဆုံးပြီးနောက် လူသူမသိ စွန့်ပစ်ထားတဲ့ အနေအထားကြောင့် မိချောင်းတွေ အချင်းချင်း ကိုက်သတ် စားသောက်ရတဲ့အဖြစ် ရောက်ခဲ့ရပါတယ်။
ဆောင်ခလာခရိုင် ရွာတစ်ရွာက ခြံဝန်းထဲမှာ ရေကန်အကျဉ်း၊ အကျယ်မျိုးစုံနဲ့ မိချောင်း အကောင် ၁၉၀ အထိ မွေးမြူထားခဲ့တာဖြစ်ပြီး ပိုင်ရှင် သေဆုံးပြီးနောက် အစာကျွေးသူမရှိလို့ ဆာလောင်ကြတဲ့ မိချောင်းတွေဟာ အချင်းချင်း ကိုက်သတ်စားသောက်ရာက အကောင်ပေါင်းများစွာ သေဆုံးပြီး အရိုးတွေ ကျနေတာကိုပါ ဒေသခံတွေက ဒီရက်ပိုင်းမှ တွေ့မြင်သိရှိခဲ့တာ ဖြစ်ပါတယ်။
မျက်မြင် ဒေသခံတွေက မိုးရာသီ ရေလျှံချိန်ရောက်ရင် ဒီမိချောင်းမွေးကန်ကနေ မိချောင်းတချို့ လွတ်ထွက်လာပြီး ရွာထဲရောက်လာလို့ လူတွေ ကြောက်ရွံ့ထိတ်လန့်ကြရကြောင်း၊ ပိုင်ရှင်မရှိတော့လို့ အစာငတ်ပြီး မိချောင်းတွေ စသေဆုံးပြီး နောက်ပိုင်း အချင်းချင်း ကိုက်ဖြတ်စားသောက်ကြတာ ဖြစ်တယ်လို့ ဆိုပါတယ်။
ဆောင်ခလာခရိုင်၊ ငါးလုပ်ငန်းဦးစီးဌာနက တာဝန်ရှိသူ တစ်ဦးဟာ ဖေဖော်ဝါရီ ၂၇ ရက်နေ့မှာ ဒီအိမ်ကို ဝင်ကြည့်ခဲ့ပြီး မွေးထားတဲ့ မိချောင်း ၁၉၀ မှာ ၁၀၀ လောက်ပဲ အသက်ရှင်ကျန်ရစ်တယ်လို့ အတည်ပြုခဲ့ပါတယ်။
ဒီမိချောင်းမွေးကန်ကို ချွန်ဘူရီခရိုင်က ပုဂ္ဂလိကကုမ္ပဏီ တစ်ခုက ထူထောင်ပေးထားပြီး မိချောင်း ၂ နှစ်သား အရွယ်ရောက်ရင် အရေခွံကို ရောင်းဖို့ခွာယူပြီး အသားကို လူစားဖို့ ရောင်းစားတာဖြစ်ကြောင်းနဲ့ ကျန်ရစ် မိကျောင်းတွေကို ဘယ်လိုဆက်ထားမလဲ ဆိုတာကို ကုမ္ပဏီနဲ့ ညှိနှိုင်းနေတယ်လို့ အဆို ပါတာဝန်ရှိသူက ဆိုပါတယ်။
Ref:Dailystar
MKF-001
