မဲခေါင်၊ မေ ၁၃
မြန်မာနိုင်ငံ ရခိုင်ပြည်နယ်နဲ့ ဘင်္ဂလားဒေ့ရှ်နိုင်ငံ ကော့ဘဇားမြို့ကို တည့်တည့်ဝင်လာမယ့် အင်အားအလွန် ပြင်းအဆင့် မိုချာ ဆိုင်ကလုံး မုန်တိုင်းကြောင့် ဘင်္ဂလားဒေ့ရှ် အန္တရာယ်ဇုန်က ရိုဟင်ဂျာဒုက္ခသည်တွေကို မေ ၁၃ ရက် မှာ တာဝန်ရှိသူတွေက ဘေးလွတ်ရာ ရွှေ့ပြောင်းခိုင်းနေပါတယ်။
နှစ်ပေါင်း ၂၀ အတွင်း အပြင်းထန်ဆုံးမုန်တိုင်းအဖြစ် မိုချာဆိုင်ကလုံးမုန်တိုင်းဟာ မေ ၁၄ ရက်မှာ ကော့ဘဇားနဲ့ စစ်တွေကမ်းခြေကနေ ကုန်းတွင်းပိုင်းကို တစ်နာရီလေတိုက်နှုန်း ၁၀၉ မိုင်နှုန်းနဲ့ ဝင်ရောက်လာမယ်လို့ အိန္ဒိယမိုးလေဝသသတင်းဌာနက ခန့်မှန်းထားပြီး ရိုဟင်ဂျာဒုက္ခသည် ၁ သန်းရှိတဲ့ ကော့ဘဇားကို မေ ၁၄ ရက် မနက်ပိုင်းမှာ ဝင်နိုင်တယ်လို့ တွက်ဆထားပါတယ်။
ဘင်္ဂလားဒေ့ရှ် မိုးလေဝသဌာန အကြီးအကဲ အဇီဇာရာမန်က “မိုချာ ဆိုင်ကလုန်းဟာ ၂၀၀၇ ခုနှစ်က နိုင်ငံ တောင်ပိုင်းကမ်းခြေကို တိုက်ခတ်သွားပြီး လူပေါင်း ၃၀၀၀ ကျော်သေဆုံးခဲ့ရတဲ့ Sidr ဆိုင်ကလုံးပြီးရင် အပြင်းထန်ဆုံးဖြစ်လာမယ်။ ကမ်းရိုးတန်းဒေသတွေမှာ လှိုင်းအမြင့်က ၄ မီတာ (၁၃ ပေ ) အမြင့်အထိ ရှိနိုင် မှာကြောင့် နိုင်ငံတောင်ဘက်စွန်း စိန့်မာတင်ကျွန်းက ပြည်သူ ၈၀၀၀ ကို ဘေးလွတ်ရာရွှေ့ပြောင်းပေးနေရပါ တယ်။ လက်ရှိ မေ ၁၃ ရက်မနက်ပိုင်းအထိ လှေပေါင်း ၂၅၀ နဲ့ ကျွန်းသား ၁၀၀၀ ကျော်ကိုပဲ ရွှေ့ပြောင်းပေးရ သေးတယ်။ ဆက်လက် လုပ်ဆောင်နေပါတယ်”လို့ ပြောသွားပါတယ်။
ကော့ဘဇားမှာရှိတဲ့ ရိုဟင်ဂျာဒုက္ခသည် ၁ သန်းဟာ ဘင်္ဂလားဒေ့ရှ်အစိုးရက မြန်မာနိုင်ငံကို မပြန်ဘဲ အခိုင်အမာ အဆောက်အအုံနဲ့အခြေချနေထိုင်မှာကိုဆိုးလို့ ကွန်ကရစ်အဆောက်အအုံဆောက်ခွင့် ပိတ်ပင်ထားလို့ တာပေါ်လင်၊ ဝါးနဲ့ဆောက်တဲ့ နေရာတွေမှာသာ နေထိုင်ခွင့်ပြုထားပါတယ်။
ဒီ ဒုက္ခသည်စခန်းတွေဟာ နှစ်စဉ် ရေကြီး၊ မြေပြို တဲ့ဒဏ်တွေခံနေရလို့ အခု မုန်တိုင်းဝင်လာချိန် ရိုဟင်ဂျာဒုက္ခသည်တွေရဲ့ အသက်အန္တရာယ်ဟာ အလွန်စိုးရိမ်ရတဲ့ အခြေအနေမှာရှိကြောင်းလည်း ဘင်္ဂလားဒေ့ရှ် ဒုက္ခသည်များဆိုင်ရာ ဒုတိယမဟာမင်းကြီး ရှမ်ဆဒ်ဒူဇာက AFP ကို ပြောကြားသွားပါတယ်။ အန္တရာယ်ဇုန်မှာရှိတဲ့ ရိုဟင်ဂျာဒုက္ခသည်ထောင်ပေါင်းများစွာကို သူတို့ဒေသက ကွန်ကရစ်အဆောက်အအုံတွေဖြစ်တဲ့ စာသင်ကျောင်းတွေကို ပရဟိတအဖွဲ့တွေက ရွှေ့ပြောင်းပို့ဆောင်မှုတွေ လည်း ဆက်လက်လုပ်ဆောင်နေတယ်လို့ ဆိုပါတယ်။
MKF-001
#Mekongnews
#မိုခါမုန်တိုင်း
#ရိုဟင်ဂျာ
#ဘင်္ဂလားဒေ့ရှ်
Ref: digitaljournal
