မဲခေါင်၊ ဖေဖော်ဝါရီ ၂၃
ရန်ကုန်တိုင်း၊ ကြည့်မြင်တိုင်မြို့နယ်၊ ပန်းပင်ကြီးလမ်း အောက်ဘက်၊ ကျော်တံတား လမ်းထိပ်ရှိ ကုဋေကြွယ် လက်ဖက်ရည်ဆိုင်နားမှာ စစ်တပ်က ကားများရပ်ထားပြီး စစ်သားများက ပတ်ဝန်းကျင် လူတွေကို မေးမြန်းမှုတွေ ပြုလုပ်ကာ ဗုံးတွေ့တဲ့နေရာမှ ကြိုးတွေဖြုတ်ပြီး ဗုံးကို ဒီကနေ့ မနက် ၁၀ နာရီ ဝန်းကျင်မှာ ယူဆောင်သွားတယ်လို့ မျက်မြင်တွေ့သူ တစ်ဦးက မဲခေါင်သတင်းကို ပြောပါတယ်။
ဒီကနေ့ မနက်ပိုင်းက မပေါက်ကွဲသေးတဲ့ ဗုံးတစ်လုံး တွေ့ရှိခဲ့လို့ အဆိုပါနေရာသို့ စစ်ကား ၈ စီးနဲ့ ရဲကား ၂ စီး လာရောက်ပြီး မနက် ၁၀ နာရီ ၁၅ မိနစ်က ပြန်လည် ထွက်ခွာသွားကာ ကမ်းနားလမ်းမှာ ဖမ်းဆီးထားတဲ့ လူငယ် ၃ ဦးကိုတော့ စစ်ကား ၂ စီး၊ ရဲကား တစ်စီးနဲ့ တင်ဆောင်ကာ ကမ်းနားဈေးမှ နတ်စင်လမ်းဘက်သို့ ကမ်းနားလမ်းအတိုင်း မောင်းနှင်သွားတယ်လို့ သူကပြောပါတယ်။
“ အခု ကြည့်မြင်တိုင် အထက်လမ်းနဲ့ အောက်လမ်းမှာ ဖွင့်တဲ့ ဈေးဆိုင်တွေ ပိတ်ရမယ်လို့ လိုက်ပြောသွားတယ်။ ဆိုင်ခုံတွေ အကုန်ရှင်းပေးရမယ်ဆိုပြီး စည်ပင်တွေ လာပြောသွားပြီ။ သူတို့ကို သတင်မပေးလို့ အခုလို လုပ်တာပေါ့ကွာ။ ရက်အကန့်အသတ်မရှိ ပိတ်ထားရမယ်လို့ ခွေးတွေက ဟောင်သွားတာ” လို့ ရပ်ကွက်နေ ပြည်သူ တစ်ဦးက ပြောပါတယ်။
ဖေဖော်ဝါရီ ၂၄ ရက်မှ စတင်ကာ ဈေးကြီးလမ်း၊ အထက်ကြည့်မြင်တိုင်လမ်း၊ ကမ်းနားလမ်းမှာ ဖွင့်လှစ်ရောင်းချနေတဲ့ ဈေးသည်တွေရဲ့ ဆိုင်ခုံတွေ ဖယ်ပေးရမယ်လို့ စစ်တပ်နဲ့ စည်ပင်က ပြောဆိုသွားပြီး ရက်အကန့်အသတ်မရှိ ပိတ်ထားရမယ်လို့ ပြောဆိုပါတယ်။
အလားတူ ဒဂုံဆိပ်ကမ်း (၉၄) ရပ်ကွက်မှာ သေနတ်နဲ့ ပစ်ခတ်ခံခဲ့ရပြီး ရာအိမ်မှူး ၂ ဦး သေဆုံးခဲ့တဲ့ အတွက် အဆိုပါလမ်းမှာ ဖွင့်လှစ်ရောင်းချနေတဲ့ ဈေးဆိုင်ခန်းတွေကို စစ်တပ်၊ ရဲနဲ့ ပျူစောထီး လူမိုက်တွေက ဒီကနေ့ မနက်ပိုင်းမှ စတင်ကာ အင်အားသုံးပြီး ဒုတိယအကြိမ် ဝင်ရောက် ဖျက်ဆီးနေတယ်လို့ သိရပါတယ်။
MK-005
