မဲခေါင်၊ အောက်တိုဘာ ၃၀
အဂတိအမှုတွေနဲ့ အရေးယူခံထားရတဲ့ ဗိုလ်မှူးချူပ် မိုးမြင့်ထွန်း အမှုနဲ့ နီးစပ်ရာလုပ်ငန်းရှင်များအပြင်၊ အခြားလုပ်ငန်းရှင် အများအပြားကိုပါ ပြည်ပထွက်ခွာခွင့်ပိတ်ထားတယ်လို့ စီးပွားရေးလုပ်ငန်းရှင် အသိုင်းအဝန်းက စုံစမ်းသိရှိရပါတယ်။
စက်သုံးဆီ တင်သွင်းရောင်းချသူတွေ၊ စားအုန်းဆီ တင်သွင်းရောင်းချသူတွေ၊ ပြောင်းကုန်သည်ကြီးများ၊ ဆန် အပြင် အခြား စီးပွားရေးကဏ္ဍမှ လုပ်ငန်းကြီးအချို့ကိုလည်း ပြည်ပထွက်ခွာခွင့် တားမြစ်ထားတယ်လို့သိရပါတယ်။
စစ်ကောင်စီက ပြည်ပထွက်ခွာခွင့် ပိတ်ပင်တားမြစ်စာတွေကို စီးပွားရေးလုပ်ငန်းရှင်တွေရဲ့ အိမ်တွေအထိ ပို့ပြီးတာမြစ်ထားသလို တချို့လုပ်ငန်းရှင်တွေဟာ ထွက်ခွာခွင့်တားမြစ်ထားတာကို မသိရှိဘဲ လေဆိပ်ရောက်မှ သိတဲ့သူတွေရှိတယ်လို့ မဲခေါင်းသတင်းဌာနနဲ့ နီးစပ်တဲ့ စီးပွားရေးလုပ်ငန်းရှင်တစ်ဦးက ပြောပါတယ်။
“ဒီကြားထဲခရီးမသွားပါနဲ့၊ ဖမ်းတာဆီးတာလုပ်မှာ မဟုတ်ဘူး၊ ဘာအကြောင်းနဲ့မှ ထွက်ခွာခွင့် မရှိဘူးဆိုတဲ့သဘောပေါ့၊ သွားမယ်ဆိုလာပြော၊ လာပြောခိုင်းတယ်ဆိုတာက သွားခွင့်ပေးမယ်လို့ ပြောတာမဟုတ်ဘူးဆိုတော့ အထဲထည့်ပြီး ချောင်ပိတ်ရိုက်လည်း ခံဆိုတဲ့သဘောမှာရှိတယ်” လို့ သူက ဆက်ပြောပါတယ်။
စစ်ကောင်စီက ဖမ်းဆီးစစ်ဆေးမှာ ကြောက်သဖြင့် ပြည်ပသို့ရှောင်တိမ်းတဲ့ လုပ်ငန်းရှင်တွေရှိလာပြီးနောက် ပို့ကုန်သွင်းကုန် ကုမ္ပဏီ ၂၂ ခုမှ ဒါရိုက်တာတွေရဲ့ နိုင်ငံကူးလက်မှတ်တွေကို ပိတ်ပင်ထားတယ်လို့ သိရပါတယ်။
“အဂတိကျူးလွန်ထားတယ်ဆိုတဲ့ စစ်ဆေးမှုမှာ တစ်ချို့လုပ်ငန်းရှင်တွေကို ဖယ်ထုတ်ထားဖို့ ညွန်ကြားထားတယ်လို့ လည်းကြားတယ်။ စစ်ဆေးခံနေရတဲ့ ကဏ္ဍတွေအပြင်ဆောက်လုပ် ရေးလုပ်ငန်းသုံး သံနှင့် ဆေးပစ္စည်းတင်သွင်းတဲ့ ကုမ္ပဏီတွေ၊ ဆန်တင်ပို့နေတဲ့ကုမ္ပဏီတွေရဲ့ လုပ်ငန်းရှင်တွေကိုပါ ပြည်ပကိုမည်သည်အကြောင်းအရာနဲ့မှ ထွက်ခွာခွင့်မရှိတဲ့သဘောလုပ်ထားတယ်” လို့ ပို့ကုန်လုပ်ငန်းရှင်တစ်ဦးက ပြောပါတယ်။
စစ်ကောင်စီက ဖွဲ့စည်းထားတဲ့ ကုန်သွယ်မှုနှင့် ကုန်စည်စီးဆင်းမှု မှန်ကန်မြန်ဆန်စေရေးဗဟိုကော်မတီ အတွင်းရေးမှူး ဗိုလ်ချုပ် ရန်နောင်စိုးနဲ့ ဆက်စပ်သည်ဟုဆိုကာ ကုန်သည်စက်မှုအသင်းချုပ်မှ လုပ်ငန်းရှင်ကြီးအချို့တို့အား စစ်ကောင်စီက နေပြည်တော်တွင် ဖမ်းဆီး စစ်ဆေးနေပါတယ်။
စားသုံးဆီဈေးတွေ အဆမတန်မြင့်တက်နေမှုနဲ့ ပတ်သက်ပြီး မြန်မာနိုင်ငံစားသုံးဆီ လုပ်ငန်းရှင်များအသင်း ဥက္ကဋ္ဌအပါအဝင် လုပ်ငန်းရှင်ကြီးတွေကို စစ်ကောင်စီက နေပြည်တော်မှာ ဖမ်းဆီးစစ်ဆေးခဲ့ပါသေးတယ်။
MK-006
#MeKongNews
#စီးပွားရေး
#လုပ်ငန်းရှင်
#ပိတ်ပင်
#ပြည်ပ
#စစ်ကောင်စီ