မဲခေါင်၊ ဖေဖော်ဝါရီ ၂၇
ရှမ်းပြည် တောင်ကြီး – တာချီလိတ်ကားလမ်း ကို စစ်ကောင်စီက ပိတ်ထားလို့ ရှောင်ကွင်းလမ်းဖြစ်တဲ့ ဟိုပုံး-ပင်လုံ-မိုင်းပွန်ရှောင်ကွင်း လမ်းဘက်ကိုပါ စစ်ကာင်စီကထပ်ပိတ်လိုက်လို့ ကားများသွားလာ လို့မရတော့ဟု ကားဂိတ်တွေထံက သိရပါတယ်။
ယနေ့ ဖေဖော်ဝါရီ ၂၇ ရက် မနက် ၁၀ နာရီခန့်အထိ သွားလာလို့ရနေတဲ့ ဟိုပုံး-ပင်လုံ-မိုင်းပွန်ရှောင်ကွင်းလမ်းမှာ စစ်ကောင်စီက တိုက်ပွဲဖြစ်လို့ဆိုကာ ထပ်ပိတ်လိုက်တဲ့အတွက် ယင်းရှောင်ကွင်းကို အသုံးပြုသွားလာနေတဲ့ ခရီးသည်တွေ သွားလာလို့မရတော့ကြောင်း သိရပါတယ်။
ဒီမနက်ခင်းလေးပဲ အနီးအနားရွာသားတွေပြောတာက PNO သေနတ်ဖောက်သံကြားတာရှိတယ်၊ အချက် ၅၀ ကျော် စက်သေနတ်ကြီးနဲ့ ဆွဲတာနေမမယ်လို့ ဒေသခံတဦးက မဲခေါင်ကို ပြောပါတယ်။
တောင်ကြီးမှ တာချီလိတ်-မိုင်းဆတ် ကားလမ်းပေါ်ရှိ မြို့တွေကို သွားလာနေရတဲ့ ကားတွေအနေနဲ့ ရှောင်ကွင်လမ်းကို အားကိုးနေရာက ယခုလို ထပ်မံပိတ်လိုက်တာဖြစ်လို့ အခြား မိုးနဲ၊ ဒုဌဝတီဘက်ကသွားလို့ရပေမယ့် ခရီးဝေးကာ ပိုလမ်းကြမ်းတာနဲ့ ခရီးသည်ပြည်သူတွေ ပိုဒုက္ခရောက်စေတယ်လို့ ကားဂိတ်မှူးတွေက ပြောကြပါတယ်။
ကားဆရာတွေလဲ အသက်စွန့်သွားရတာ၊ လမ်းကကြမ်းနဲ့ ဆီကလဲလမ်းမြို့ နမ့်စန်တို့လွယ်လင်တို့ ပြတ်နေကြပြီဆိုတော့ ကားခသာ မတက်နိုင်တာ၊ ခုလဲ လမ်းပိတ်ပြီတော့ ဘာလိုလုပ်ရမလဲ မသိဘူးလို့ တောင်ကြီး ယာဉ်ဂိတ်မှူးတစ်ဦးက မဲခေါင်ကို ပြောပါတယ်။
ကားခမှာ ယင်း ရှောင်ကွင်းလမ်းက သွားပါမှ အန်စာတုံးက လူ ၁ ဦး ၇ သောင်းကျပ်ရှိသော်လည်း ပရိုဘောက် ယာဉ်ငယ်တွေမှာ ၁ ဦး ၂ သိန်း၊ ၂သိန်းခွဲအထိ ရှိခဲ့ပြီး ယခုလို ထပ်မံပြီး လမ်းပိတ်တာက ခရီးသွားတွေအတွက် ပိုမိုဆိုးရွားစေမယ်လို့ သူကပြောပါတယ်။
အဆိုပါ လမ်းမှာ လမ်းသားကြမ်းတမ်းပြီး တောင်ဆင်းတောင်တက်မြင့်မား ရှည်လျားတဲ့အတွက် ဘရိတ်မနိုင်တာတွေကြောင့် ကားအများအပြား တိမ်းမှောက်ကာ လူသေဆုံးဒဏ်ရာရတာတွေ ဖြစ်နေခဲ့တာပါ။
ပြီးခဲ့တဲ့ ဖေဖော်ဝါရီ ၂၁ ရက်ကတဲက စစ်ကောင်စီနဲ့အပေါင်းပါတွေက မိုင်းပွန်မြို့အနီးက နမ့်ဗော်ခံးရွာကို လေယာဉ်နဲ့ဗုံးကြဲတာ၊ မဲနယ်တောင်၊ ဆနင်းဒေသတွေကို လက်နက်ကြီးနဲ့ပစ်တာတွေအပြင် တောင်ကြီး-တာချီလိတ် ပြည်ထောင်စုကားလမ်းကိုပါ ပိတ်ထားခဲ့တာ ရက်တစ်ပတ်ခန့် ရှိသွားပြီဖြစ်ပါတယ်။
