မဲခေါင်၊ မတ် ၂၀
ရန်ကုန်၊ သာကေတမြို့နယ်၊ (၈) ရပ်ကွက်၊ သာသနာ့ရိက္ခတ ဓမ္မာရုံဘေး ဖွင့်လှစ်ထားတဲ့ ကြံရည်ဆိုင်မှာ ဆိုင်ပိုင်ရှင် ဖြစ်သူနဲ့ သူငယ်ချင်းဖြစ်သူ အမျိုးသား သေနတ်နဲ့ အပစ်ခံရလို့ နေရာမှာ သေဆုံးခဲ့တယ်လို့ ဒေသခံ တစ်ဦးက မဲခေါင်သတင်းကို ပြောပါတယ်။
မနေ့ မတ်လ ၁၉ ရက်၊ ည ၇ နာရီ ဝန်းကျင်က ဧရာဝဏ်လမ်းနဲ့ နဝရတ်လမ်းထောင့်မှာ ဖွင့်လှစ်ထားတဲ့ အအေးဆိုင်ကို မဘသနဲ့ ပျူစောထီး ခေါင်းဆောင် တင်လင်းထိုက် (ခေါ်) လင်းလင်း ရဲ့ အဖွဲ့တွေက လာရောက် ပစ်ခတ်သွားတာ ဖြစ်တယ်လို့ မျက်မြင်တွေ့သူ တွေက ပြောပါတယ်။
“ အအေးရောင်းတဲ့ အကိုနဲ့ လင်းလင်း တပည့် ရဲစိန်နဲ့ ရန်ဖြစ်ဖူးတယ်။ နောက်ပြီး မနှစ်က ရဲစိန် ပစ်သတ်ခံရပြီး သေတာကို လင်းလင်း တို့က မကြေနပ်ဘူး။ ရပ်ကွက်ထဲမှာ အအေးဆိုင်ပိုင်ရှင် ကိုညိုကြီး တို့ကြောင့် သေရတာ ဆိုပြီး ရပ်ကွက်ထဲမှာ သတင်းလွှင့်နေတာ။ အခု လာပစ်တာလည်း လင်းလင်း တို့အဖွဲ့က ကောင်တွေဆိုတာ မြင်တဲ့သူတွေ ရှိတယ်။ အရင်နေ့က ရဲ ၃ ယောက် အသတ်ခံရလို့ ဒီကောင်တွေ အဖွဲ့ကို စစ်တပ်က သေနတ်တွေ ပေးထားတာ” လို့ ရပ်ကွက်နေ ပြည်သူ တစ်ဦးက ပြောပါတယ်။
သေနတ်နဲ့ လာရောက် ပစ်ခတ်လို့ အအေးဆိုင်ပိုင်ရှင် ကိုမောင်ဇော ်(ခ) ကိုညိုကြီး နဲ့ သူငယ်ချင်းဖြစ်သူ သင်္ဘောသား ကိုဝေဖြိုးအောင် တို့နေရာမှာ သေဆုံးခဲ့ပြီး ကျည်ခွံ ၆ ခု ကျန်ခဲ့တယ်လို့ သူကပြောပါတယ်။
“ သာကေတ (၆) နဲ့ (၇) ရပ်ကွက်မှာ နေတဲ့ ဘောမ တစ်သိုက် ပျော်နေတာ ရှိတယ်။ သူတို့လူတွေ အသတ်ခံရတာကို သူတို့နဲ့ မတည့်တဲ့ သူတွေတိုင်လို့ အသတ်ခံရတာ ဆိုပြီး ပြန်လုပ်တာ။ ကိုဝေဖြိုးအောင် ဆို သင်္ဘောက ပြန်ဆင်းလာတာ မကြာသေးဘူး။ သူ့သူငယ်ချင်းဆိုင် လာပြီး စကားပြောနေတုန်း အသတ်ခံရတာ။ စစ်တပ်က သူ့တို့ကောင်တွေ သတ်တော့ ဖြစ်သလိုလေးစစ်ပြီး ပြန်တာ။ သူတို့လူတွေ အသတ်ခံရတုန်းက မီးဖြတ်ပြီး တစ်ရပ်ကွက်လုံး အိမ်ပေါက်စေ့ ဝင်စစ်တယ်။ လမ်းတွေ ပိတ်ပြီး စစ်တယ်။ ခုအဲဒါမျိုး လုပ်တာ တစ်ခုမှ မရှိပါဘူး” လို့ ရပ်ကွက်နေ ပြည်သူ တစ်ဦးက ပြောပါတယ်။
စစ်တပ် ဝါဒဖြန့် မီဒီယာတွေမှာတော့ ပြည်သူ ၂ ဦးကို သတ်ဖြတ်သွားသူတွေဟာ PDF အမျိုးသား ၂ ဦးဖြစ်ပြီး ဆိုင်ကယ်နဲ့ လာရောက် ပစ်ခတ်ခဲ့တာ ဖြစ်တယ်လို့ ဖော်ပြနေပေမယ့် ရပ်ကွက်နေ ပြည်သူတွေကတော့ ပစ်သတ်သူတွေဟာ မဘသနဲ့ ပျူစောထီး ခေါင်းဆောင် တင်လင်းထိုက် (ခေါ်) လင်းလင်း ရဲ့ တပည့်တွေ ဖြစ်တယ်လို့ အခိုင်အမာ ပြောဆိုပါတယ်။
ပြီးခဲ့တဲ့ ရက်ပိုင်းက သာကေတမြို့နယ် (၉) ရပ်ကွက်မှာ ရဲ ၃ ယောက် သေနတ်နဲ့ ပစ်သတ်ခံရပြီးနောက် မဘသနဲ့ ပျူစောထီး တွေကို စစ်ကောင်စီတပ်တွေက သေနတ်တွေ ထုတ်ပေးထားတယ်လို့ သိရပါတယ်။
MK-005
#မ.ဘ.သ
