မဲခေါင်၊ မတ် ၁၉
ရှမ်းပြည်တောင်ပိုင်းက မြို့နယ်တွေမှာ ပြည်သူတွေအပေါ် အခွင့်ကောင်းယူနေတဲ့ လဝက၊ ထွေအုပ်၊ ရပ်ကျေး၊ ရာအိမ်မှူး၊ ဆယ်အိမ်မှုးတွေကို အမှတ် ၁၀၀၈- SSRY တပ်ရင်းက မတ်လ ၁၈ ရက်နေ့က အသိပေးစာထုတ်ပြန်ခဲ့ပါတယ်။
နိုင်ငံရေးမတည်ငြိမ်တာကို အခွင့်ကောင်းယူပြီး ပြည်သူတွေအပေါ် ခြိမ်းခြောက် ငွေတောင်းနေမှုတွေ ပြုလုပ်နေပြီး စစ်ကောင်စီတပ်ရဲ့ စစ်မှုထမ်းဥပဒေကို အကောင်အထည်ဖော်ပေးနေတာကြောင့် ထိထိရောက်ရောက် အရေးယူသွားမယ်လို့ဆိုပါတယ်။
“ အကြမ်းဖက်စစ်ကောင်စီက စစ်မှုထမ်းဥပဒေထုတ်ပြန်လိုက်ပြီးတဲ့နောက်ပိုင်းမှာ အများပြည်သူတွေက အရင်ကထက်ပိုပြီး စိုးရိမ်လာကြတယ်။အရွယ်ကောင်းသားတွေအပါအဝင် အိမ်ထောင်သည်ယောကျာ်းတွေပါ အရင်လို ခရီးသွားလာဖို့၊ နေ့တစ်ဓူဝ လှုပ်ရှားသွားလာ လုပ်ကိုင်စားသောက်ဖို့အတွက်ပါ အခက်အခဲ၊အကြပ်အတည်းတွေနဲ့ ကြုံလာရပါတယ်။ဒါကို စစ်ကောင်စီလက်အောက်ခံတွေဖြစ်တဲ့ စကစေထာက်တိုင်တွေဖြစ်တဲ့ 5ဦးကော်မတီထဲက ထွေအုပ်၊လဝက၊ရပ်ကြေးအုပ်ချုပ်ရေးမှူး စတဲ့သူတွေက ဘယ်သူသေသေ ငတေမာရင်ပြီးရောဆိုပြီး အရွယ်ကောင်းသားတွေကို စစ်ကောင်စီအောက်မှာ စစ်မှုထမ်းဖို့အတွက် နည်းပေါင်းစုံနဲ့ ပူးပေါင်းပါဝင်နေကြတာတွေကို ကျနော်တို့ သတင်းတွေကြားနေ၊ ရနေပါတယ်။” လို့ တပ်ရင်းရဲ့ ပြန်ကြားရေးတာဝန်ရှိသူတဦးက ပြောပါတယ်။
စစ်ကောင်စီထောက်တိုင်တွေရဲ့ ကိုယ်ရေးအချက်အလက်တွေ စုဆောင်းထားပြီး အခါအခွင့်သင်တာနဲ့ စစ်ကောင်စီတပ်တွေနဲ့ ထောက်တိုင်တွေကိုပါ ထိထိရောက်ရောက်အရေးယူသွားမယ်လို့ သိရပါတယ်။
“ ကျနော်တို့1008 တပ်ရင်းအနေနဲ့ စစ်ကောင်စီနဲ့သူတို့ရဲ့ဒေါက်တိုင်တွေကိုပါ အဆုံးထိတော်လှန်တိုက်ပွဲဝင်သွားမှာဖြစ်သလို စစ်ကောင်စီ လက်ပါးစေတွေကိုလည်း အဆင့်ဆင့် ထိရောက်စွာအရေးယူဆောင်ရွက်သွားမှာပါဗျ။”
စစ်ကောင်စီတပ်က ပြည်သူကို ကျွန်ပြုလိုတဲ့အတွက် စစ်မှုထမ်းဥပဒေထုတ်ပြန်ခြင်းအပေါ် ပြင်းပြင်းထန်ထန် ရှုံ့ချပြီး ကန့်ကွက်တယ်လို့သိရပါတယ်။
CJ-004