မဲခေါင်၊ ဇန်နဝါရီ ၂၂
ရန်ကုန်တိုင်း၊ ရွှေပြည်သာမြို့နယ်အတွင်း ရပ်ကွက်အုပ်ချုပ်ရေးမှူးတွေ မူးရူးပြီးပြည်သူတွေကို နှိပ်စက်အနိုင်ကျင့်နေတယ်လို့ ဒေသခံတွေကပြောပါတယ်။
ဇန်နဝါရီ ၂၀ ရက် ညပိုင်းကအမှတ် ၆ ရပ်ကွက် ရွှေညာမောင် (စအဖ) ရုံးရှေ့မှာ လူနာလာသယ်တဲ့ လူမှုကူညီရေးကားတစ်စင်း ဟွန်းတီးလို့ဆိုပြီး ရုံးအတွင်းမှ အမျိုးသား ၆ယောက်ထွက်လာပြီးဝိုင်းဝန်းထိုး ကြိတ်ခဲ့တယ်လို့ မျက်မြင်တွေ့သူတစ်ဦးကပြောပါတယ်။
“ ယာဥ်မောင်းကတော့ အထိုးခံရတာနည်းတယ်။ လူနာကောက်တဲ့ကလေးကတော့ အတော်ထိသွားတယ်။ သွားတောင်ပဲ့ထွက်သွားတယ်။ မျက်နှာဆိုယောင်ကိုင်းနေတာ။ နံရိုးတွေလည်းဖြတ်ကန်ထားတော့အောင့်နေတာမသက်သာသေးဘူး။ ရုံးထဲက ၆ ယောက်ထွက်လာပြီးလုပ်တာပါ။ ၄ယောက်ကဝိုင်းပြီးထိုးတာ ကျန်တဲ့ ၂ယောက်ဆွဲတာမနိုင်ဘူး။ ပြီးတော့သူတို့အားလုံး အရက်တွေမူးနေတာ” လို့သူကပြောပါတယ်။
ဏ/၁၄ ရပ်ကွက်မှာလည်း ရပ်ကွက်အုပ်ကြီးအိမ်မဲကြီးစျေးကို သူ့ကားနဲ့ဖြတ်အလာ နနွင်းဓါတ်ခြင်ဆေးရောင်းတဲ့ အဖွားအိုစျေးဗန်းကားနဲ့ မလွတ်ဘူးဆိုပြီး စျေးဗန်းသိမ်းဆည်းသွားတယ်လို့ မျက်မြင်တွေ့သူတစ်ဦးကပြောပါတယ်။
“ အမေကြီးသနားပါတယ်ဗျာ။ ငိုပြီးဘယ်သူ့တိုင်လို့ရလဲဆိုပြီးမေးနေတာ။ ခွေးသူတောင်းစားအုပ်ကြီးက စစ်တပ်နဲ့ပေါင်းပြီးချမ်းသာနေပြီ။ ကားတွေမြေကွက်တွေဝယ်ထားပြီ။ မြေအလွတ်တွေရောင်းစားတယ်။ ကျူးဆိုပြီးနေတဲ့သူတွေမောင်းထုတ်တယ်။ အိမ်ဆောက်ရင် ၆ သိန်းတောင်းတယ်။ မီးလျှောက်ရင်၂ သောင်း တောင်းတယ်” လို့ ရပ်ကွက်နေပြည်သူတွေကပြောပါတယ်။
ရွှေပြည်သာမြို့နယ်အတွင်း ညစဥ်သေနတ်ပစ်ဖောက်သံများကြားရပြီး ရပ်ကွက်အုပ်ကြီးတွေကို စစ်တပ်ကသေနတ်ပေးထားတဲ့အတွက် ညဘက်မှာမူးရူးပြီး သေနတ်ပစ်ဖောက်မှုတွေ လုပ်နေတာဖြစ်တယ်လို့ ဒေသခံတွေကပြောပါတယ်။
MK-005
#MekongNews