မဲခေါင် ၊ ဇူလိုင် ၂၁
မောက်မယ်မြို့နယ်၊ ဟိုနမ့်ဒေသ နဲ့ ကဒူးကြီးဒေသမှာ ရှမ်းပြည်ပြန်လည်ထူထောင်ရေးကောင်စီ RCSS က ကျေးရွာတွေထဲကို တပ်အင်အား တိုးချဲ့လာတာကြောင့် ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO နဲ့ တိုက်ပွဲဖြစ်မှာကို စိုးရိမ်နေတယ်လို့ ဒေသခံတွေကပြောပါတယ်။
RCSS တပ်ဖွဲ့ တွေ အင်အား တစ်ရာခန့်ဟာ ဇူလိုင်လ ၁၂ ရက်နေ့မှာ မောက်မယ်မြို့နယ် ပုံးအောင်ဖက်ကနေပြီး ဟိုနမ့်ကျေးရွာအုပ်စုက ကျေးရွာတွေထဲကို အင်အားတိုးချဲ့လာခဲ့တယ်လို့ ဟိုနမ့်ဒေသခံတွေကပြောပါတယ်။
RCSS တပ်ဖွဲ့က အင်အား ဖြည့်တင်းတဲ့ ဟိုနမ့်အုပ်စုဟာ စစ်ကောင်စီလက်အောက်ခံ PNO ပြည်သူ့စစ်လည်းရှိပြီး PNO ပြည်သူ့စစ်ဂိတ်ကို ဖြတ်ကျော်ပြီး အင်အားတိုးချဲ့လာတာဖြစ်တယ်လို့ ဒေသခံသတင်းရင်းမြစ်တွေကပြောပါတယ်။
ပြီးခဲ့တဲ့ ဇွန်လထဲမှာလည်း RCSS နဲ့ PNO ပူးပေါင်းအဖွဲ့က ဟိုနမ့်ကျေးရွာအုပ်စု ထီဖက်နမ်ဖက်မှာရှိတဲ့ PNLO တပ်စခန်းတစ်ခုကို လာရောက်တိုက်ခိုက်ခဲ့ဖူးပါတယ်။ ဒါကြောင့် RCSSက အခုလို အင်အားဖြည့်တင်းလာမှုအပေါ် တိုက်ပွဲပြန်လည်ဖြစ်ပွားမှာကို ဒေသခံတွေက ကြောက်လန့်နေတာပဲဖြစ်ပါတယ်။
“ဟိုနမ့်ဖက်မှာက အင်အားဖြည့်လာတာ ၁၀၀ လောက်တော့ရှိတယ်။ ဟိုရွာဝင်လိုက် ဒီရွာဝင်လိုက် ပြီးရင် ပြန်သွားလိုက်ဆိုတဲ့ ပုံစံနဲ့လာတာ။ ဒီမှာက PNO ပြည်သူ့စစ်လည်းရှိတယ်။ PNLO လည်းရှိတယ်။ ဒါကြောင့် ထိပ်တိုက်တွေ့ပြီး တိုက်ပွဲထပ်ဖြစ်မှာကို ဒေသခံတွေက စိုးရိမ်တာ” လို့ ဟိုနမ့်အုပ်စု ဒေသခံတစ်ဦးကပြောပါတယ်။
ထို့အတူ မောက်မယ်မြို့နယ် ကဒူးကြီးဒေသမှာလည်း ကဒူးကြီးကျေးရွာအုပ်စု နောင်ခိုင်းကျွေးရွာ ဘုန်းကြီးကျောင်း နဲ့ စာသင်ကျောင်း၊ ရန်ကင်းကျေးရွာစာသင်ကျောင်းတွေထဲမှာ တပ်စွဲထားတဲ့ RCSS တပ်ဖွဲ့တွေက ဖိုးဝီးကားသုံးစီးနဲ့ အင်အားဖြည့်တင်းလာတယ်လို့လည်း ဒေသခံတွေကပြောပါတယ်။
RCSS တပ်ဖွဲ့က အင်အားဖြည့်တင်းလာတဲ့ နေရာရဲ့ အနီးက တောင်ကုန်းပေါ်မှာ ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO တပ်ဖွဲ့တွေလည်းရှိတာကြောင့် နှစ်ဖက်တပ်ဖွဲ့တွေ အချိန်မရွေး တိုက်ပွဲဖြစ်နိုင်တဲ့ အခြေအနေဖြစ်ပါတယ်။
“တစ်ဖက်က တောင်ကုန်းပေါ်မှာ တစ်ဖက်က ရွာထဲမှာဆိုတော့ တိုက်ပွဲဖြစ်ရင် ရွာထိမှာလေ။ ရွာထဲမှာ တိုက်ပွဲမဖြစ်ဖို့ ဆုတောင်းပါတယ်” လို့ ဒေသခံတစ်ဦးကပြောပါတယ်။
RCSS နဲ့ PNLO အဖွဲ့ဟာ နှစ်ဖွဲ့စလုံး တစ်နိုင်ငံလုံးပစ်ခတ်တိုက်ခတ်မှုရပ်စဲရေးစာချုပ် NCA ကို လက်မှတ်ရေးထိုးထားတဲ့ အဖွဲ့တွေ ဖြစ်သလို နှစ်ဖွဲ့စလုံး စစ်ကောင်စီနဲ့ တွေ့ဆုံဆွေးနွေးနေတဲ့အဖွဲ့ဖြစ်ပေမယ့် နယ်မြေအငြင်းပွားမှု နယ်မြေကျူးကျော်လမှု ပြဿနာတွေကြောင့် မကြာခဏ တိုက်ပွဲဖြစ်ပွားနေပါတယ်။
CJ-002
#MeKongNews
#RCSS
#မောက်မယ်
#ဒေသခံ
#PNLO