မဲခေါင်၊ ဇန်နဝါရီ ၂၁
ရန်ကုန်တိုင်း၊ ဗဟန်းမြို့နယ် အတွင်းရှိ ငါးထပ်ကြီး ဘုရားနဲ့ ခြောက်ထပ်ကြီး ဘုရားကို စစ်ကောင်စီ ခေါင်းဆောင် မင်းအောင်လှိုင် လာရောက်မှာ ဖြစ်တဲ့ အတွက် လုံခြုံရေးတွေ အများအပြား ချထားတယ်လို့ ဒေသခံတွေက ပြောပါတယ်။
ဒီကနေ့ ဇန်နဝါရီ ၂၁ ရက် မနက် ၁၀ နာရီကျော်မှ စတင်ကာ ရဲနဲ့စစ်သားတွေ ကင်းပုန်းဝပ်နေပြီး ဘုရားနဲ့ အနီးတဝိုက်ရှိ အဆောက်အအုံတွေမှာလည်း စစ်တပ်က ကင်းချထားတာတွေ ရှိတယ်လို့ မျက်မြင်တွေ့သူ တစ်ဦးက ပြောပါတယ်။
“ ရွှေဂုံတိုင် တံတားပေါ်မှာ အိမ်စီးကား အဖြူနဲ့ ရပ်ပြီး ရဲ ၃ ကောင်ရှိတယ်။ ဂုံးတံတားအောက်မှာလည်း စစ်ကား တစ်စီး ရပ်ထားပြီး ရဲနဲ့စစ်သားတွေ ရှိတယ်။ ရွှေဂုံတိုင် မိဘမဲ့ ကလေးဂေဟာ ထဲမှာလည်း အင်အား အပြည့်ရှိတယ်။ ဘုရားထဲမှာတော့ အင်အားအပြည့်နဲ့ စောင့်နေကြတယ်၊ ရဲနဲ့စစ်သားတွေ အများကြီးရှိတယ်” လို့ သူကပြောပါတယ်။
လက်ရှိ အာဏာသိမ်း စစ်ခေါင်းဆောင် မင်းအောင်လှိုင် ရန်ကုန်မြို့မှာ ရှိနေပြီး ဒီကနေ့ သွားရောက်မယ့် မြို့နယ်အချို့မှာ စစ်တပ်နဲ့ရဲတွေ လုံခြုံရေး ယူထားကာ ကင်းပုန်းဝတ်တာတွေ အပြင် အရပ်ဝတ်တွေနဲ့ စောင့်ကြည့် နေတာတွေလည်း ရှိနေတယ်လို့ သိရပါတယ်။
မနေ့ ဇန်နဝါရီ ၂၀ ရက် နေ့လယ်ပိုင်းက ကမာရွတ်မြို့နယ်မှာရှိတဲ့ ငြိမ်းချမ်းရေး ဗဟိုဌာနရုံး လက်ပစ်ဗုံးနဲ့ ထုခံခဲ့ပြီး နောက်ပိုင်း ပြည်သူအချို့ကို စစ်တပ်က ရိုက်နှက် စစ်ဆေးမှုတွေ ရှိခဲ့တယ်လို့ မျက်မြင်တွေ့သူတွေက ပြောပါတယ်။
MK-005
ဓာတ်ပုံ – ပုံဟောင်း ဖြစ်ပါတယ်။