မဲခေါင်၊ နို၀င်ဘာ ၂၈
ရှမ်းပြည်နယ် တောင်ပိုင်း၊ ဓနု ကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ်မှာ စစ်ကောင်စီက လူငယ်တွေကို စက်ပြင်နဲ့ ကာယသင်တန်း ဗန်းပြပြီး ပျူစောထီး သင်တန်းပေး အင်အားစုဆောင်းဖို့ ကြိုးစားပေမယ့် တက်ရောက်သူ နည်းပါးလို့ မအောင်မြင်ခဲ့ဘူးလို့ ဒေသခံတွေက ပြောပါတယ်။
ပင်းတယမြို့နယ်၊ တံတားကြီးကျေးရွာ၊ တပ်ကုန်းဘုန်းကြီးကျောင်းမှာ ပြီးခဲ့တဲ့ နိုဝင်ဘာလ ၂၀ ရက်နေ့က စစ်ကောင်စီတပ် အင်အား ၃၀ ခန့်က ရွာကလူငယ်၂၀ ခန့်ကို စုဝေးခိုင်းပြီး စက်ပြင်နဲ့ ကာယသင်တန်း တက်ပြီး ၎င်းတို့နဲ့ လိုက်ခဲ့ရမယ်လို့ ဖိအားပေးခဲ့တယ်လို့ ဒေသခံတွေက ဆိုပါတယ်။
“စက်ပြင် သင်တန်း၊ ကာယ သင်တန်း တက်ရမယ်ဆိုပြီး လူငယ်၊ လူလတ်ပိုင်း ၂၀ ကို အတင်းခေါ်ပြီး ဘုန်းကျောင်းမှာ ခေါ်ပြောတာ။ တကယ် သင်တန်းလည်း စရော တက်မယ့်သူ တဖြည်းဖြည်းလျော့ပြီး အခု ၃ ယောက်ပဲကျန်တယ်” လို့ ဒေသခံ တစ်ဦးက ပြောပါတယ်။
စစ်ကောင်စီတပ်က စက်ပြင်သင်တန်း ပထမအဆင့် ရွာဘုန်းကြီးကျောင်းမှာ တစ်လတက်ပြီးပါက နောက်တဆင့် တက်ဖို့ မြို့ကို သွားရမယ်လို့ စည်းရုံးခဲ့တာလို့ သိရပါတယ်။
ဒေသခံတွေကတော့ ဒီသင်တန်း အကြောင်းပြပြီး ပျူစောထီးအဖြစ် စစ်အင်အား စုဆောင်းမှာ စိုးရိမ်တဲ့ အတွက် နိုဝင်ဘာ ၂၃ ရက်နေ့မှာ ပျူစောထီးရွာလို့ နာမည်ကြီးတဲ့ အုံအက်ရွာက ရွာသား အများစု အပါအဝင် ၁၇ ဦး နှုတ်ထွက်သွားတာကြောင့် ကျန်ရှိတဲ့ တံတားကြီးရွာသား ၃ ဦးကိုသာ စက်ပြင်သင်တန်း ဆက်ပေးနေရတယ်လို့ သိရပါတယ်။
အရင်ကလည်း ဓနုဒေသက ကျေးရွာတွေမှာ အခုလို သက်မွေးပညာ သင်တန်း အမည်ခံပြီး ပျူစောထီး သင်တန်းတွေ ဖွင့်လှစ်ကာ စစ်အင်အား စုဆောင်းတာတွေ ရှိခဲ့တယ်လို့ ဒေသခံတွေက ပြောပါတယ်။
CJ-001