မဲခေါင်၊ မတ် ၁၉
ရှမ်းပြည်နယ်၊ တာချီလိတ်-ကျိုင်းတုံ-တောင်ကြီး ကားခတွေ ဈေးကြီးနေတဲ့အပြင် မိုင်းပျဉ်းမြို့နယ် ၂၄ မိုင်ရွာ ဆင်မောင်းမှာ ရပ်နား ညအိပ်ရာ တည်းခိုခန်းခတွေ အဆမတန် ပေးနေရတယ်လို့ဒေသခံတွေက ပြောပါတယ်။
လက်ရှိ ကျိုင်းတုံ-တောင်ကြီး ကားခ ၃၅၀၀၀ ကျပ်ပေးရသလို တစ်ချို့ကားဂိတ်တွေ ကျပ် ၄၀၀၀၀ အထိတောင်းတယ်လို့ ကျိုင်းတုံ ဒေသခံ တစ်ဦးက မဲခေါင်သတင်းကို ပြောပါတယ်။
“အခုဆို ကားခတွေ အရမ်း ဈေးတက်နေတယ်။ ကျိုင်းတုံ-တောင်ကြီး ကားခက ပုံမှန် ၃၅၀၀၀ လောက် ဖြစ်နေပြီ။ တချို့ ကားဂိတ်တွေဆို ၄၀၀၀၀ တောင် ဖြစ်နေပြီ’’ လို့ သူကပြောပါတယ်။
ကျိုင်းတုံ-မိုင်းလား ကားလမ်း ပြန်လည်ဖွင့်ခဲ့ပြီး ထိုင်း-မြန်မာ နယ်စပ် တာချီလိတ်-မယ်ဆိုင် တံတားလည်း ပြန်လည်ဖွင့်လှစ်တာကြောင့် လက်ရှိ ခရီးသွားတွေ များလာတယ်လို့ သူကဆက်ပြောပါတယ်။
“ကျိုင်းတုံ-မိုင်းလားလမ်း ပြန်ဖွင့်တယ်။ တာချီလိတ်-မယ်ဆိုင် တံတားလည်း ပြန်ဖွင့်တယ်ဆိုတော့ ခရီးသွားတဲ့သူတွေ များလာတယ်။ အခုက ကားခတင် ဈေးကြီးတာ မဟုတ်ဘူး။ တည်းခိုခန်းခ တွေပါ တက်နေတာ။ ကျိုင်းတုံ-တာချီလိတ်-တောင်ကြီး သွားရင် များသောအားဖြင့် ဆင်မောင်းမှာ ညအိပ်ရတာ များတယ်။ ဟိုဘက်ဒီဘက် လှည့်လို့တောင် မရတဲ့ အရင်က တစ်ယောက်ခန်းကို အခု ၃ ယောက်ခန်းဆိုပြီး ခေါင်းအုံး ၃ လုံးထည့်ပြီး တစ်ယောက်ကို ၄၀၀၀ တောင်းနေကြတယ်’’ လို့ ဆိုပါတယ်။
ဒါ့အပြင် တာချီလိတ်-ကျိုင်းတုံ-တောင်ကြီးသွား ကုန်ကားတွေဟာ ၃ ဆနီးပါး ခုန်တက်သွားတဲ့ ဆီဈေး၊ ဂိတ်ကြေးတွေနဲ့ ကိုက်အောင် ကုန်ပစ္စည်းတွေ အန္တရာယ်ဖြစ်လောက်တဲ့အထိ တင်နေကြတယ်လို့ ဒေသခံတွေက ပြောပါတယ်။
MK-007