မဲခေါင်၊ အောက်တိုဘာ ၅

စင်ကာပူနိုင်ငံဟာ သေးငယ်တဲ့ကျွန်းနိုင်ငံလေးဖြစ်လို့ ယာဉ်ကြောပိတ်ဆို့မှုတားဆီးကာကွယ်ရေး စနစ်ကို ၁၉၉၀ ပြည့်နှစ်က ၁၀ နှစ်စာ ကားပိုင်ဆိုင်ခွင့်စနစ် Certificate of Entitlement (COE) ကို ထုတ်ပြန်ခဲ့ရာ အခု COE ဈေးနှုန်းတွေ စံချိန်တင်မြင့်တက်နေလို့ မိသားစု ကားတစ်စီးပိုင်ဆိုင်ဖို့ အမေရိကန်ဒေါ်လာ ၁၀၆၆၁၉ ဒေါ်လာ အထိ သုံးစွဲနေရကြောင်း သိရှိရပါတယ်။

ကားကိုယ်ပိုင်ဝယ်လိုတဲ့ စင်ကာပူသားတိုင်းဟာ COE ရမှ ဝယ်ခွင့်ရှိပြီး အစိုးရက ၂ ပတ်တစ်ခါ COE တွေကို နံပါတ်အရေအတွက် ကန့်သတ်ပြီး ရောင်းချပေးတာဖြစ်ပါတယ်။

အခွန်နဲ့ ကားတင်သွင်းခွန်ကိုလည်း မြင့်မားစွာ သတ်မှတ်ထားတာကြောင့်စင်ကာပူနိုင်ငံဟာ ကမ္ဘာပေါ်မှာ ကားတစ်စီးတန်ကြေး အမြင့်ဆုံးနိုင်ငံအဖြစ် စံချိန်တင် နေတာဖြစ်ပါတယ်။ ဥပမာ တိုယိုတာ Camry Hybrid ကားတစ်စီးပိုင်ဖို့ စင်ကာပူမှာကုန်ကျစားရိတ်က အခွန်တွေနဲ့ COE ခအပါအဝင်ဆို စင်ကာပူဒေါ်လာ ၂၅၀၀၀၀ ရှိပြီး အမေရိကန်မှာ ဒီလိုကားဝယ်တဲ့ဈေးထက် ၆ ဆအထိမြင့်မားနေပါတယ်။

ကားငယ်တွေ၊ မော်တော်ဆိုင်ကယ်နဲ့ လုပ်ငန်းသုံးယာဉ်တွေအတွက် COE တန်ကြေးအမျိုးအစားတွေ အမျိုးမျိုး ရှိပြီး ကိုဗစ်ကပ်ဆိုးကာလအပြီး ဝယ်လိုအားတွေ အရမ်းမြင့်တက်လာလို့ အစိုးရက နောက်နှစ်မှာ ပိုမိုတင်းကြပ် ဈေးကြီးတဲ့ COE စနစ်ကို ထုတ်ပြန်မယ်ဆိုတာကြောင့် ဒီလပိုင်းတွေထဲ ကားဈေးနှုန်းက စံချိန်တင်မြင့်တက်လာ ခဲ့တာဖြစ်ပါတယ်။

ဈေးအပေါဆုံးကားတစ်စီးတန်ကြေးက လက်ရှိမှာ စင်ကာပူဒေါ်လာ ၁၀၄၀၀၀ ရှိပြီး ၂၀၂၀ ကထက် ၃ ဆ ပိုဈေးတက်လာတာဖြစ်ပါတယ်။

စင်ကာပူနိုင်ငံသားတွေထဲမှာ လက်ရှိကားဈေးကြောင့် နိုင်ငံရဲ့ ပျမ်းမျှလစာနှုန်း စင်ကာပူဒေါ်လာ ၇၀၀၀၀ ရရှိ သူတွေ ကားတစ်စီးပိုင်ဆိုင်နိုင်ဖို့ အလွန်ခက်ခဲတဲ့အနေအထားရှိနေပါတယ်။

ယာဉ်ကြောပိတ်ဆို့မှု ပြဿနာကို ရှင်းလင်းဖို့ ကားဟောင်းတွေကို လမ်းပေါ်ကဖယ်ရှားမှုတွေလုပ်နေသလို နောက် ၁၀ စုနှစ်စာအတွက် ခရီးသွား လာရေးအဆင်ပြေစေဖို့ ရထားလမ်းကွန်ရက်သစ်ကို စင်ကာပူဒေါ်လာ ၆၀ ဘီလီယံသုံးစွဲပြီး မနှစ်ကတည်းကစလို့ စီမံကိန်းစတင်နေပြီဖြစ်ပါတယ်။

စင်ကာပူနိုင်ငံမှာ လူဦးရေ ၅ . ၅ သန်းနေထိုင်ပြီး မနှစ်ကနှစ်ကုန်စာရင်းအရ ကိုယ်ပိုင်ကား ၁ သန်းသာ ရှိကြောင်း သိရပါတယ်။

Ref:BBC
MKF-001

#MeKongNews

#စင်ကာပူ

#ကား

#တန်ကြေး

#ပိုင်ဆိုင်ခွင့်

#ဒေါ်လာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)