မဲခေါင်၊ သြဂုတ် ၂၃
ကုန်ဈေးနှုန်းကျဆင်းဖို့ မြို့နယ်တွေမှာ လော်စပီကာနဲ့ လိုက်လံအော်နေတဲ့ စစ်ကောင်စီက ကုန်ဈေးနှုန်းကြီးမြင့်မှုကို လိုအပ်တဲ့ မူဝါဒတွေ ချမှတ်ပြီး ထိန်းညှိသွားမယ်လို့ စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက သြဂုတ် ၂၂ ရက် သတင်းစာရှင်းလင်းပွဲမှာ ပြောပါတယ်။
ပြည်တွင်းရှိ ဆန်၊ စပါး ဈေးနှုန်းများအပြင် ဆီဈေး၊ သား၊ငါးဈေး၊ ကြက်သွန် (ဖြူ/နီ)၊ ငြုပ်၊ ဟင်းသီးဟင်းရွက်ဈေးနှုန်းများ အပါအဝင် အထွေထွေကုန်ဈေးနှုန်း ကြီးမြင့်မှုကို ရင်ဆိုင်နေရတယ်လို့ သူက သတင်းစာရှင်းလင်းပွဲမှာ ဝန်ခံပြောဆိုပါတယ်။
ပြည်တွင်း ဆန်ဈေးနှုန်း မြင့်တက်နေခြင်းက ကမ္ဘာ့ဆန်ဈေးကွက်အတွင်း ဆန်စပါးအဓိကတင်ပို့နေတဲ့ နိုင်ငံကြီးတွေက ဆန်စပါးတင်ပို့မှု လျော့ချတာကြောင့် လို့ ဆိုပါတယ်။
“ ဒါနဲ့ပတ်သက်ပြီး ကမ္ဘာမှာ ဆန်စပါးဈေးနှုန်းကြီးမြင့်လာနိုင်တယ်ဆိုတဲ့ မျှော်လင့်ချက်နဲ့ ဈေးနှုန်းဆွဲတင်နေတာတွေရှိတယ်” လို့ ဗိုလ်ချုပ်ဇော်မင်းထွန်းက ပြောပါတယ်။
တရိပ်ရိပ်မြင့်တက်နေတဲ့ ကုန်ဈေးနှုန်းကြီးမြင့်မှုကို ထိရောက်စွာ ကိုင်တွယ်ဖြေရှင်းနိုင်ခြင်းမရှိတဲ့အတွက် ပြည်သူအများ စားဝတ်နေရေးခက်ခဲများစွာဖြင့်ကြုံတွေ့နေတာလို့ စီးပွားရေးလေ့လာသူတွေက ပြောထားပါတယ်။
“ အနာကဖြစ်နေတာ၊ ဘယ်နားလည်း အရင်ရှာကုရမှာကို သူတို့က စီးပွားရေးကဏ္ဍတစ်ခုက အော်လိုက် အဲ့တာကို ညှိနှိုင်းပြီးလိုက်လုပ်ပေးလိုက်၊ အဲ့တာကြောင့် အခြားကဏ္ဍဘာထိခိုက်နိုင်မလည်း မစဉ်းစားဘူး၊ သူရဲ့အားနည်းချက်က ရေတိုနည်းနဲ့ဖြေရှင်းတာဘဲ၊ သူတို့ပနာသင့် စီးပွားရေးတွေကတော့ အဆင်ပြေတယ်၊ ပြည်သူလူထုက နွံနစ်သထက်နစ်ဖြစ်နေပြီ၊ အခုနိုင်ငံရဲ့ဘယ်ကဏ္ဍဘဲဖြစ်ဖြစ် နိုင်ငံရေးအပေါ်မှာ တိုက်ရိုက်အချိုးကျနေသလိုဖြစ်နေတယ်၊ မူဝါဒပေါင်းကလည်း ရွှေ၊ဒေါ်လာဈေးလိုဘဲ၊ အချိန်နဲ့အမျှပြောင်းလဲနေတာဘာစီးပွားရေးကို တည်ငြိမ်အောင်လုပ်ဆောင်လို့ရမလဲ” လို့ စီးပွားရေးလုပ်ငန်းရှင်တစ်ဦးက ပြောပါတယ်။
ဒေါ်လာရပေါက်နည်းနေတဲ့ စစ်ကောင်စီက ပြည်ပတင်ပို့မှုနဲ့ ၊တင်သွင်းခွင့်ကို ထပ်မံတင်းကြပ်လာနိုင်တာကြောင့် သွင်းကုန်များဈေးကြီးမြင့်လာပြီး မှောင်ခိုဈေးကွက်ကြီးသထက်ကြီးလာနိုင်တယ်လို့ လုပ်ငန်းရှင်များက သုံးသပ်ပြောဆိုထားပါတယ်။
MK-006
#MeKongNews
#စစ်ကောင်စီ
#ကုန်ဈေးနှုန်း
#လော်စပီကာ
#ဇော်မင်းထွန်း