မဲခေါင်၊ စက်တင်ဘာ ၁၆
ရှမ်းပြည်နယ် တောင်ပိုင်း၊ ကလောမြို့နယ်၊ ဘော်ဆိုင်းမြို့၊ ဘော်ဆိုင်းဈေးအနီး၊ ကန်ဦးရပ်ကွက်ရှိ ဘော်ဆိုင်း မီးသတ်ရုံးထဲမှာ ရပ်ထားတဲ့ ဆိုင်ကယ် ခိုးယူခံလိုက်ရတယ်လို့ ဒေသခံတွေက ပြောပါတယ်။
မနေ့ စက်တင်ဘာ ၁၅ ရက်၊ ည ၁၂ နာရီကျော်မှာ မီးသတ်ဝန်ထမ်း ဦးကျော်သူရ ဆိုသူရဲ့ ဆိုင်ကယ် ခိုးယူခံခဲ့ရတာလို့ ဆိုပါတယ်။
“သူတို့ မီးသတ်ဝန်ထမ်း အင်အားက ၃ ယောက်ပဲ ဆိုတော့ ညစောင့်ရတာ အခက်အခဲ ဖြစ်တယ် ထင်တယ်။ CCTV တပ်ထားတယ် ဆိုပေမယ့် ည ၁၂ နာရီကျော်ရင် ဖြုတ်သိမ်းတာ ဆိုတော့ အဲဒီအချိန်မှာ ပျောက်သွားတာလို့ ကြားတယ်” လို့ မီးသတ်နဲ့ နီးစပ်တဲ့ ဒေသခံ တစ်ဦးက ပြောပါတယ်။
ဆိုင်ကယ် အခိုးခံလိုက်ရတာကို မနက် အစောပိုင်းမှ သိရတာဖြစ်ပြီး ခိုးယူသူကိုတော့ ဖမ်းမိတာ မရှိသေးဘူးလို့ သူက ဆိုပါတယ်။
ဘော်ဆိုင်းမြို့ဟာ ပင်းတယမြို့ရဲ့ အရှေ့ဘက် ၁၂ မိုင်အကွာ၊ ဟဲဟိုးမြို့ရဲ့ ၁၉ မိုင် အကွာမှာ တည်ရှိပြီး ဘော်၊ ငွေ၊ ခဲ စတဲ့ သတ္တုတွေ ထွက်တဲ့ဒေသ ဖြစ်ပါတယ်။
စစ်တပ် အာဏာသိမ်းပြီး နောက်ပိုင်း စားဝတ်နေရေး ကြပ်တည်းမှုနဲ့အတူ ရှမ်းပြည်နယ် မြို့အများစုမှာ ဆိုင်ကယ် ခိုးမှုတွေ ဖြစ်ပွားနေပေမယ့် ဘော်ဆိုင်းမြို့မှာတော့ အခုဖြစ်စဉ်ဟာ ပထမဆုံးအကြိမ် ဖြစ်တယ်လို့ စုံစမ်း သိရှိရပါတယ်။
CJ-007
