မဲခေါင်၊ အောက်တိုဘာ ၁၄
‘ဝ’ တပ်ဖွဲ့ – UWSA ရဲ့ ဒုဥက္ကဌ ၃ ယောက်ထဲက တစ်ယောက်ရဲ့ သားအပါအဝင် ထိပ်ပိုင်းခေါင်းဆောင် ၂ယောက်ရဲ့ သားတွေကို တရုတ်က ဖမ်းထားတယ်လို့ မဲခေါင်က စုံစမ်းသိရပါတယ်။
သူတို့ ၂ယောက်ကို အောက်တိုဘာလ အစပိုင်းက တရုတ်က ဖမ်းထားတာဖြစ်ပြီး အွန်လိုင်းငွေလိမ်လုပ်ငန်းတွေဖြစ်တဲ့ ကျားဖြန့် လုပ်ငန်းတွေနဲ့ ဆက်စပ်လို့ ဖမ်းထားတာလို့ UWSA ထိပ်ပိုင်းခေါင်းဆောင်တွေနဲ့ ရင်းနှီးတဲ့ သတင်းရင်းမြစ်တစ်ဦးက မဲခေါင်ကိုပြောပါတယ်။
“SSPP နဲ့ TNLA ဆွေးနွေးပွဲလုပ်နေတုန်းကတည်းက ဖမ်းထားတာ။ တရုတ်က ကျားဖြန့်ကိစ္စကို တင်းတင်းကြပ်ကြပ်ကိုင်နေတာ” လို့ သူက ပြောပါတယ်။
ဖမ်းဆီးခံထားရတဲ့ ၂ယောက်နဲ့ ပတ်သက်ပြီး အသေးစိတ်အချက်အလက်တွေကိုတော့ မဲခေါင်က စုံစမ်းနေဆဲဖြစ်ပါတယ်။
တရုတ်အစိုးရဟာ အဲဒီ ၂ယောက်ကို ဖမ်းဆီးပြီးတဲ့နောက်မှာ နောက်ထပ် ‘ဝ’ အရာရှိ ၂ ဦးဖြစ်တဲ့ အိုက်ပန်းနဲ့ အိုက်ဟော့ကိုလည်း ဝရမ်းထပ်ထုတ်ထားပါတယ်။
ဝရမ်းထုတ်ခံထားရတဲ့ အိုက်ပန်းဟာ UWSA ရဲ့ ဆောက်လုပ်ရေးဌာနမှူးဖြစ်ပြီး အိုက်ဟော့ကတော့ မိုင်းလင်းခရိုင်ရဲ့ ခရိုင်မှူးဖြစ်ပါတယ်။
အွန်လိုင်းငွေလိမ်လုပ်ငန်းတွေဖြစ်တဲ့ ကျားဖြန့်လုပ်ငန်းတွေဟာ တရုတ်-မြန်မာနယ်စပ်နေရာတွေနဲ့ ကရင်ပြည်နယ်ထဲက ရွှေကုက္ကိုလ်မြို့တွေမှာ တရုတ်လူမျိုးတွေ အကြီးအကျယ်လုပ်ကိုင်နေတာ ဖြစ်ပြီး ဒေသအာဏာပိုင်တွေနဲ့ ပြည်သူ့စစ်တွေကလည်း ငွေကြေးရယူကာ အဲဒီလုပ်ငန်းတွေကို ကာကွယ်ပေးထားတာ ဖြစ်ပါတယ်။
UWSA ထိန်းချုပ် နယ်မြေတစ်ခုဖြစ်တဲ့ မိုင်းပေါက်မြို့မှာဆိုရင် အွန်လိုင်းငွေလိမ်လုပ်ငန်းတွေအတွက် လူကုန်ကူးခံရတဲ့ မြန်မာနိုင်ငံသားတွေလည်း အများအပြားရှိတယ်လို့ လူကုန်ကူးခံရသူတွေရဲ့ ပြောဆိုချက်တွေအရ သိရပါတယ်။
MK – 004
#MeKongNews
#UWSA
#တရုတ်
#အိုက်ပန်း