မဲခေါင်၊ နိုဝင်ဘာ ၂
အမေရိကန်သမ္မတ ဂျိုးဘိုင်ဒန်နဲ့ တရုတ်သမ္မတ ရှီကျင်းဖျင်တို့ဟာ နိုင်ဝင်ဘာ ၁၄-၁၅ ရက်တွေမှာ ဆန်ဖရန်စစ္စကိုမှာ ကျင်းပမယ့် ၂၀၂၃ နှစ်ချုပ် အာရှ-ပစ္စိဖိတ်စီးပွားရေးပူးပေါင်းဆောင်ရွက်ရေးအဖွဲ့ (APEC) ညီလာခံမှာ တွေ့ဆုံဆွေးနွေးဖို့ရှိကြောင်း အိမ်ဖြူတော်က အောက်တိုဘာ ၃၁ ရက်နေ့မှာ ထုတ်ပြန်ကြေညာပါတယ်။
တရုတ်နဲ့ အမေရိကန်ဟာ ကမ္ဘာ့ စီးပွားရေးနဲ့စစ်ရေးအင်အား အတောင့်တင်းဆုံးနှစ်နိုင်ငံဖြစ်ပေမယ့် အမေရိကန် က အာရှ-ပစ္စိဖိတ်ဒေသမှာ တရုတ်ရဲ့ စိုးမိုးမှုကို တန်ပြန်တိုက်ခိုက်မှုတွေ လုပ်နေသလို တရုတ်ကလည်း အမေရိ ကန်ကို တွန်းလှန်ဖို့ ရုရှားနဲ့ ပိုမိုခိုင်မာတဲ့ ပူးပေါင်းဆောင်ရွက်မှုတွေကို တိုးမြှင့်လုပ်ဆောင်နေတာကြောင့် ကမ္ဘာ့ စီးပွားရေးနဲ့ စစ်ရေးအရ ကြောက်စရာအကောင်းဆုံး ပြိုင်ဆိုင်မှု ဖြစ်နေပါတယ်။
ပြီးခဲ့တဲ့ ရက်ပိုင်းက တရုတ်နိုင်ငံခြားရေးဝန်ကြီး ဝမ်ယိဟာ အမေရိကန်ကို လာရောက်ပြီး ရှီကျင်းဖျင်နဲ့ ဂျိုးဘိုင်ဒန်တို့ အပြုသဘောဆောင်တဲ့ ဆွေးနွေးပွဲလုပ်ဖို့ ရှေ့ပြေး ဆွေးနွေးမှုတွေလုပ်အပြီး အိမ်ဖြူတော်က ဂျိုးဘိုင်ဒန်နဲ့ ရှီကျင်းဖျင်တို့ ဆန်ဖရန်စစ္စကိုမှာ တွေ့ဆုံဖို့အရေးက အတည်ပြုနိုင်လုနီးနီးရှိကြောင်း အိမ်ဖြူတော် သတင်းပြန်ကြားရေးအတွင်းရေးမှူး ကာရင်းဂျင်းပီယာရီက ထုတ်ပြန်သွားတာဖြစ်ပါတယ်။
ဂျိုးဘိုင်ဒန်နဲ့ ရှီကျင်းဖျင်တို့ဟာ ၂၀၂၂ ခုနှစ် နိုင်ဝင်ဘာ ၁၄ ရက်က အင်ဒိုနီးရှားနိုင်ငံ ဘာလီကျွန်းမှာ တွေ့ဆုံခဲ့ပြီး နောက် စီးပွားရေးနဲ့ နိုင်ငံရေးတင်းမာမှုတွေမြင့်တက်လာပြီး ထပ်မံတွေ့ဆုံခဲ့ခြင်းမရှိတော့တာဖြစ်ပါတယ်။
အမေရိကန်အစိုးရ စီမံခန့်ခွဲရေး စီနီယာအရာရှိတစ်ဦးက “ဂျိုးဘိုင်ဒန်နဲ့ ရှီကျင်းဖျင်တို့ နိုဝင်ဘာလထဲ တွေ့ဆုံဖို့ မူအရ သဘောတူညီမှုရခဲ့ပြီးပါပြီ။ ဒါပေမဲ့ အရေးကြီးတဲ့ အသေးစိတ်ပြင်ဆင်မှုတွေတော့ လိုနေပါသေး တယ်။ နိုင်ငံခေါင်းဆောင် နှစ်ယောက်ဟာ အပြုသဘောဆောင်တဲ့ တွေ့ဆုံမှုဖြစ်ဖို့ မျှော်လင့်ထားပါတယ်” လို့ ပြောသွားခဲ့ပါတယ်။
တရုတ်ဘက်ကတော့ သတင်းထုတ်ပြန်ရာမှာ သမ္မတနှစ်ဦးတွေ့ဆုံရေးက ဖြစ်လာနိုင်ပေမယ့် လွယ်ကူချောမွေ့မှာ တော့မဟုတ်ကြောင်း၊ ဒီတွေ့ဆုံမှုမတိုင်ခင် ဝင်ရောက်စွက်ဖက်မှုတွေကို ဖယ်ရှားဖို့၊ အတားအဆီးတွေကို ကျော်လွှားနိုင်ဖို့၊ အများဆန္ဒကို မြှင်တင်ခြင်းနဲ့ ရလဒ်ကောင်းကို ဆောင်ကျဉ်းနိုင်ဖို့ လိုအပ်သေးကြောင်း ဝမ်ယို ကိုယ်တိုင်က ဆင်ဟွာသတင်းဌာနမှာ ပြောသွားပါတယ်။
Ref: theguardian
MKF-001
#MeKongNews
#အမေရိကန်
#တရုတ်
#ရှီကျင့်ဖျင်
#ဘိုင်ဒန်