မဲခေါင်၊ ဇန်နဝါရီ ၂၂
တရုတ်နိုင်ငံမှာ နှစ်သစ်ကူးကာလဖြစ်သလို ကိုဗစ်ကူးစက်မှုနှုန်းလည်း အမြင့်ဆုံးဖြစ်နေတဲ့အတွက် ဇန်နဝါရီ ၁၃ ရက်ကနေ ၁၉ ရက် အတွင်း ကိုဗစ်ဖြင့် ဆက်စပ် သေဆုံးသူပေါင်း ၁၃၀၀၀ ရှိခဲ့ပါတယ်။
ဒီသေဆုံးနှုန်းဟာ ဆေးရုံပေါ်မှာ သေဆုံးတဲ့နှုန်းသာဖြစ်ပြီး လက်တွေ့မှာ ၁၀ ဆ မက သေဆုံးနိုင်တယ်လို့လည်း တွက်ဆထားကြပါတယ်။ လူဦးရေ ၁ . ၄ ဘီလီယံရှိတဲ့ တရုတ်နိုင်ငံအစိုးရဟာ ကိုဗစ်ဖြစ်ပွားတဲ့ သုံးနှစ်လုံး သေဆုံးမှု ၅၀၀၀ ကျော်သာရှိတယ်လို့ တောက်လျှောက် လိမ်လည် ထုတ်ပြန်ရာကနေ ဒီဇင်ဘာ ၈ ရက်ကနေ ဇန်နဝါရီ ၁၂ ရက်နေ့ အတွင်း ဆေးရုံမှာ ကိုဗစ်ဆက်စပ်သေဆုံးမှု ၆၀၀၀၀ ရှိခဲ့တယ်လို့ ဇန်နဝါရီ ၁၄ ရက်နေ့က ဝန်ခံခဲ့ပါတယ်။
ဗြိတိန်ကျန်းမာရေးအချက်အလက်ပြုစုရေးအဖွဲ့ တစ်ဖွဲ့က တရုတ်နိုင်ငံမှာ ဒီတစ်ပတ်အတွင်း ကိုဗစ် ကြောင့်သေဆုံးနှုန်း တစ်ရက် ၃၆၀၀၀ ရှိမယ်လို့ ခန့်မှန်းထားပြီး ၂၀၂၃ ခုနှစ်အတွင်း တရုတ်နိုင်ငံမှာ ကိုဗစ် ကြောင့် လူ ၁ သန်း သေဆုံးလိမ့်မယ်လို့ လေ့လာသုံးသပ်တင်ပြထားပါတယ်။
တရုတ်နှစ်သစ်ကူးကာလမှာ သန်းပေါင်းများစွာသော တရုတ်နိုင်ငံသားတွေဟာ မွေးရပ်မြေကို ပြန်လည် လည်ပတ်ကြပြီး တရုတ်နှစ်သစ်ကူး ရက် ၄၀ ကာလမှာ ပထမ ၁၅ ရက်ဖြစ်တဲ့ ဇန်နဝါရီ ၇ ရက်နေ့ကနေ ၂၁ ရက်အတွင်း ရထားစီးခရီးသွား သန်း ၁၁၀ ရှိခဲ့ကြောင်း တရုတ်အစိုးရက ကြေညာခဲ့ပါတယ်။
တရုတ် ကူးစက်ရောဂါထိန်းချုပ်ရေးနဲ့ကာကွယ်ရေးဗဟိုအကြီးအကဲ က ဇန်နဝါရီ ၂၁ ရက်မှာ လူမှုကွန်ရက် Weibo ပေါ် ကိုဗစ်ဒုတိယလှိုင်း ရိုက်ခတ်ဖို့ မနီးစပ်သေးဘူးလို့ ရေးတင်ခဲ့ပေမယ့် နောက် နှစ်လနဲ့သုံးလအတွင်း တရုတ်နိုင်ငံ လူဦးရေရဲ့ ၈၀ ရာခိုင်နှုန်းအထိ ကိုဗစ်ကူးစက်လိမ့်မယ်လို့ ကျန်းမာရေး သုတေသီတွေက ခန့်မှန်းသုံးသပ်နေကြပါတယ်။
MKF -001
Ref: Reuter
#MeKongNews