မဲခေါင်၊ အောက်တိုဘာ ၃၀

ငြိမ်းချမ်းရေးနိုဘယ်ဆုရှင် ဒေါ်အောင်ဆန်းစုကြည်၏ ကျန်းမာရေးကောင်းမွန်ကြောင်း မြန်မာစစ်အာဏာပိုင်များက အာမခံပြောကြားခဲ့သည်ဟု မြန်မာနိုင်ငံဆိုင်ရာ အာဆီယံအထူးကိုယ်စားလှယ် ဖိလစ်ပိုင်နိုင်ငံခြားရေးဝန်ကြီး ထရီဆာ လာဇာရိုက ဆိုသည်။

လာဇာရိုသည် စစ်ကောင်စီနိုင်ငံခြားရေးဝန်ကြီး ဦးတင်မောင်ဆွေနှင့် ယမန်နေ့ကတွေ့ဆုံရာတွင် အကျဉ်းချခံထားရသည့် ဒီမိုကရေစီခေါင်းဆောင် ဒေါ်အောင်ဆန်းစုကြည်၏ အခြေအနေကိုလည်း ထည့်သွင်းမေးမြန်းခဲ့ခြင်းဖြစ်သည်။

“ဒေါ်အောင်ဆန်းစုကြည်ရဲ့ အခြေအနေကို ကျမ မေးမြန်းခဲ့ပါတယ်။ သူ့ရဲ့အခြေအနေ ကောင်းမွန်နေတယ်ဆိုတဲ့ အတော်လေး အပြုသဘောဆောင်တဲ့ တုံ့ပြန်မှုကို ရရှိခဲ့ပါတယ်” ဟု လာဇာရိုက ပြောကြားသည်။

ဖိလစ်ပိုင်နိုင်ငံက ယခုနှစ်တွင် အာဆီယံအလှည့်ကျဥက္ကဋ္ဌတာဝန် ရယူခဲ့ပြီးနောက်ပိုင်း ဒေါ်အောင်ဆန်းစုကြည် လွတ်မြောက်ရေးနှင့် ပိုမိုကောင်းမွန်သည့် ဆက်ဆံကုသမှုရရှိရေးအတွက် လာဇာရိုက တိတ်တဆိတ် ကြိုးပမ်းတိုက်တွန်းခဲ့သည်။

ယင်းကြိုးပမ်းမှုများတွင် ဒေါ်အောင်ဆန်းစုကြည်အတွက် လုံလောက်သည့် ဆေးကုသမှုရရှိရေး တောင်းဆိုခြင်းလည်း ပါဝင်သည်။

လာဇာရိုနှင့် အခြားအာဆီယံနိုင်ငံခြားရေးဝန်ကြီးများက ဒေါ်အောင်ဆန်းစုကြည်နှင့် တွေ့ဆုံခွင့်ရရှိရန် ဆန္ဒရှိခဲ့ကြသော်လည်း မြန်မာနိုင်ငံသို့ မသွားရောက်မီ ဖိလစ်ပိုင်သံတမန်အား ပေးအပ်ခဲ့သည့် ခရီးစဉ်အစီအစဉ်တွင် ဒေါ်အောင်ဆန်းစုကြည်နှင့် တွေ့ဆုံရန် ထည့်သွင်းထားခြင်းမရှိပေ။

သို့ရာတွင် လူသားချင်းစာနာမှုအကူအညီများ ပိုမိုဝင်ရောက်ခွင့်ရရှိရေးကို အဓိကဦးစားပေးအဖြစ် သတ်မှတ်ကာ အရေးကြီးသည့် မြန်မာနိုင်ငံခရီးစဉ်ကို ဆက်လက်ဆောင်ရွက်ခဲ့သည်။

အသက် ၈၁ နှစ်အရွယ် ဒေါ်အောင်ဆန်းစုကြည်ကို နေပြည်တော်ရှိ နေအိမ်အကျယ်ချုပ်သို့ ဧပြီလအတွင်း ပြောင်းရွှေ့ထားခဲ့သည်။

ပြီးခဲ့သည့် အောက်တိုဘာ ၂၂ ရက်တွင် ၎င်းသည် လန်ဒန်တွင် နေထိုင်သည့် သားဖြစ်သူ ကင်မ်အဲရစ်နှင့် မိနစ် ၂၀ ကြာ ဖုန်းပြောဆိုခွင့် ရရှိခဲ့သည်။

ယင်းမှာ ၅ နှစ်ကျော်အတွင်း ပထမဆုံးအကြိမ် တိုက်ရိုက်ဆက်သွယ်ပြောဆိုခွင့် ရရှိခဲ့ခြင်းဖြစ်သည်။

စိတ်ခံစားမှုများ ပြင်းထန်ခဲ့သည့် ဖုန်းပြောဆိုမှုကို လန်ဒန်မြို့ရှိ မြန်မာသံရုံးမှတစ်ဆင့် စီစဉ်ပေးခဲ့ခြင်းဖြစ်သည်။

၂၀၂၁ ခုနှစ်တွင် မင်းအောင်လှိုင် ဦးဆောင်သည့် စစ်တပ်က ဒေါ်အောင်ဆန်းစုကြည်၏ ဒီမိုကရေစီအစိုးရကို ဖြုတ်ချခဲ့ပြီးနောက် မြန်မာနိုင်ငံတွင် ပြည်တွင်းစစ်မီး တောက်လောင်နေခဲ့သည်။

ယင်းပဋိပက္ခကြောင့် လူပေါင်းတစ်သိန်းကျော် သေဆုံးခဲ့ပြီး လူဦးရေ ၅ ဒသမ ၂ သန်းခန့် အိုးအိမ်စွန့်ခွာ ထွက်ပြေးခဲ့ရကြောင်း သတင်းများက ဖော်ပြသည်။

စစ်တပ်အာဏာသိမ်းပြီးနောက် စစ်အာဏာပိုင်များက လူပေါင်း ၃ သောင်းကျော်ကို ဖမ်းဆီးခဲ့ကြောင်းလည်း Human Rights Watch က ထုတ်ပြန်ထားသည်။

ထက်ခိုင်
#MeKongNews
#လူထုခေါင်းဆောင်
#ဒေါ်အောင်ဆန်းစုကြည်
#အာဆီယံအထူးသံ
#စစ်အုပ်စု
#အာမခံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)