မဲခေါင်၊ စက်တင်ဘာ ၂၈

ထိုင်းဝန်ကြီးချုပ်သစ်ဖြစ်လာတဲ့ ဆရတ်သာသာဗီဆင်းဟာ နိုင်ငံရဲ့ ထိပ်တန်းအိမ်ခြံမြေလုပ်ငန်းရှင် ဘီလီယံနာ သူဌေးကြီးဖြစ်ပြီး သူဝန်ကြီးချုပ်အဖြစ်သာမက ဘဏ္ဍာရေးဝန်ကြီးအဖြစ်ပါ ရရှိမယ့် လစာနဲ့ ထောက်ပံ့ကြေးခံစား ခွင့်အားလုံးကို နိုင်ငံတဝန်းက လိုအပ်တဲ့ ဖောင်ဒေးရှင်းတွေဆီ လှူဒါန်းသွားမှာဖြစ်ကြောင်း အစိုးရပြောရေးဆိုခွင့်ရှိသူ ချိုင် ဝက်ချာရွန်ကီက ရှင်းလင်းပြောကြားသွားပါတယ်။

မစ္စတာချိုင်က ဝန်ကြီးချုပ်ဟာ အစိုးရသစ်စီမံကိန်းချမှတ်နေတဲ့ ပြည်သူလူထုအခွင့်အလမ်းပွင့်ရေး၊ စိတ်ချမ်းသာမှုကို တိုးတက်စေခြင်း၊ လူနေမှုအဆင့်အတန်းကွာဟချက်ကျဉ်းမြောင်းရေး၊ ကလေးငယ်များပညာရေးမြှင့်တင်ရေး လုပ်ငန်းစဉ်တွေမှာ အမြန်ဆုံးကူညီနိုင်ဖို့အရေး သူ့ခံစားခွင့်အားလုံးကို အရင်ဆုံးပေးကမ်းလှူဒါန်းခြင်းက စိတ်ဓာတ်ခွန်အားကို ဖြစ်စေပြီး ယုံကြည်မှုတိုးတက်စေတာကြောင့် လှူဒါန်းတာဖြစ်တယ်လို့ ပြောသွားခဲ့ပါတယ်။

ဆရတ်သာရဲ့ လစာဟာ ဝန်ကြီးချုပ်အဖြစ်ရော ဘဏ္ဍာရေးဝန်ကြီးအဖြစ်ပါ လစာစုစုပေါင်း ၁၂၅၅၉၀ ဘတ် ရရှိပြီး တခြားအကျိုးခံစားခွင့်ထောက်ပံ့ငွေ တစ်လ ဘတ် ၅၀၀၀၀ ရရှိပါတယ်။

ဒီငွေတွေကို ပထမဆုံးအသုတ်အဖြစ် အလေးအထားဆုံးဖြစ်တဲ့ ကလေးငယ်များဖောင်ဒေးရှင်းကို လှူဖို့ လျာထားပြီး ဝန်ကြီးချုပ်အတွက် အလုပ်လုပ်ပေးတဲ့အဖွဲ့က နောက်ထပ်လှူဒါန်းရမယ့် လိုအပ်တဲ့ဖောင်ဒေးရှင်း တွေကို တိုင်ပင်ရွေးချယ်သွားမယ်လို့ ဆိုပါတယ်။

ဆရတ်သာဟာ လစာတွေလှူရုံသာမက ရန်ပုံငွေဖောင်ဒေးရှင်း အသီးသီးနဲ့တွေ့ဆုံဆွေးနွေးပြီး အခက်အခဲပြဿနာတွေကို ဖြေရှင်းပေးဖို့လည်း ကြိုးစားသွားမှာလို့ မစ္စတာ ချိုင်က ရှင်းလင်းပြောကြားခဲ့ပါတယ်။

Ref: bangkokpost
MKF-001

#MeKongNews

#ထိုင်း

#ဝန်ကြီးချုပ်သစ်

#လစာ

#ဖောင်ဒေးရှင်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)