မဲခေါင်၊ စက်တင်ဘာ ၂၅
ထိုင်းနိုင်ငံ၊ ဘန်ကောက်မြို့မှာရှိတဲ့ ထိုင်းအမျိုးသားရဲတပ်ဖွဲ့ ဒုရဲချုပ်ဆူရာချာတီ ဟက်ခ်ပန်းရဲ့ သုံးထပ်တိုက်နေအိမ်ကို တာဝန်ရှိရဲအရာရှိတွေဟာ ဒီနေ့ စက်တင်ဘာ ၂၅ ရက်နေ့မှာ ဝင်ရောက်စီးနင်းခဲ့တယ်လို့ ထိုင်းသတင်းဌာနတွေမှာ ဖော်ပြပါတယ်။
အဲ့ဒီလို ဝင်ရောက်စီးနင်းခဲ့ပေမယ့် ဒုရဲချုပ်က ခြံထဲအဝင်မခံဘဲ အာဏာပြခြိမ်းခြောက်နေခဲ့ပြီးမှ ဆိုင်ဘာရာဇဝတ်စုံစမ်းရေးဗျူရို ကော်မရှင်နာ ရဲမှူးချုပ် ဝိုရာဝပ်ဝက်တနာကွန်းဘန်ချာက ကြားဝင်ပြီး စေ့စပ်ပေးလို့ အိမ်ထဲအဝင်ခံသလို စုံစမ်း စစ်ဆေးခံဖို့ လိုက်ပါခဲ့တာပါ။
ပြီးခဲ့တဲ့ ဇွန်လတုန်းက ထိုင်း လမ်ဖွန်းဝါရီယာဘောလုံးအသင်း ဥက္ကဌ ပေါင်ဆီရီကို တရားမဝင်အွန်လိုင်းလောင်းကစား စီမံကိန်းကနေ စီးပွားရှာကာ ငွေကြေးခဝါချဖို့ ဘောလုံးအသင်းဝယ်လုပ်ဆောင်တာဖြစ်တယ်လို့ စစ်ဆေး သိရှိခဲ့ရပါတယ်။
ဒါကြောင့် ဒီအမှုနောက်ဆက်တွဲအဖြစ် စက်တင်ဘာ ၂၅ ရက်မှာ ပက်ချာဘူရီ၊ ခွန်ကိန်း၊ သူဒွန်သနီ၊ ဆာရာဘူရီခရိုင်တွေက ပစ်မှတ်နေရာ ၃၀ ကို ရဲအင်အား အလုံးအရင်း အသုံးပြုပြီး စီးနင်းရာမှာ ထိုင်းအမျိုးသား ရဲတပ်ဖွဲ့ ဒုရဲချုပ် ဆူရာချာတီဟက်ခ်ပန်းအိမ်ကိုလည်း ဝင်စီးနင်းခဲ့တာဖြစ်သလို ထိပ်တန်းရဲအရာရှိ ၇ ဦး၊ ရဲမှူးကြီး တစ်ဦးတို့ကို ဖမ်းဆီးခေါ်ဆောင် စစ်ဆေးခဲ့တာဖြစ်ပါတယ်။
ဒုရဲချုပ် ဟက်ခ်မန်းကိုတော့ အိမ်အတွင်း ဝင်ရောက် စီးနင်းခဲ့ပြီးနောက် မသင်္ကာစရာ သက်သေဘာမှမတွေ့ရဘူးလို့ ထုတ်ပြန်ကာ ပြန်လွှတ်ပေးခဲ့ကာ သူ့လက်အောက်က အနီးကပ် ရဲအရာရှိတပည့် ၈ ယောက်စလုံး သူလက်တွဲခဲ့ရသလောက် ဒီလို အွန်လိုင်းလောင်းကစား၊ ဆိုက်ဘာရာဇဝတ် လုပ်ငန်းနဲ့ ငွေကြေးခဝါချမှုတွေမှာ ပတ်သက်ခဲ့တာမရှိလို့ အပြစ်မရှိနိုင်ဘူးလို့ မီဒီယာတွေကိုတောင် ရှင်းလင်း ပြောကြားသွားပါတယ်။
ဒုရဲချုပ် ဟက်ခ်ပန်းဟာ လာမယ့်ဗုဒ္ဓဟူးနေ့မှာ ရဲချုပ်အဖြစ် တင်မြှောက်ဖို့ ဆန်ခါတင် ရွေးထားတဲ့ ၄ ယောက်ထဲက တစ်ဦးဖြစ်ပါတယ်။
ဒါပေမဲ့ ထိုင်း Khaosod မီဒီယာကတော့ ဒီ ၈ ယောက်မှာ ၅ ယောက်ဟာ အပြစ်ကျူးလွန်ထားသူတွေဖြစ်တယ်လို့ ထုတ်ဖော်ရေးသားခဲ့ပါတယ်။
Ref: Khaosod
MKF-001
#MeKongNews
#ဒုရဲချုပ်
#ဟက်ခ်မန်း
#လောင်းကစား
#ငွေကြေးခဝါ
#ထိုင်းရဲ
