နယူးဒေလီ၊ ဇန်နဝါရီ ၂၉
အိန္ဒိယလေတပ်ရဲ့ဂျက်လေယာဉ် ၂ စင်း လေပေါ်မှာတိုက်မိတာကြောင့် လေယာဉ်မှူး ၁ ယောက်သေဆုံးခဲ့ပါတယ်။
လေယာဉ် ၂ စင်းဟာ အိန္ဒိယနိုင်ငံအလယ်ပိုင်းမှာ စစ်ဆင်ရေးပျံသန်းလေ့ကျင့်မှုပြုလုပ်နေစဉ် တိုက်မိခဲ့တာလို့ အိန္ဒိယလေတပ်က ထုတ်ပြန်ပါတယ်။
လေယာဉ် ၂ စင်းစလုံး မာဒယာပရာဒေ့ရှ်ပြည်နယ်မှာရှိတဲ့ ဂွိုင်လောလေတပ်စခန်းကနေပျံသန်းလာပြီး အနောက်ဘက်မိုင် ၃၀ လောက်အကွာမှာပျက်ကျခဲ့တာပါ။
ပျက်ကျရတဲ့အကြောင်းရင်းကိုစုံစမ်းစစ်ဆေးဖို့ အိန္ဒိယလေတပ်က ညွှန်ကြားထားပါတယ်။
ပျက်ကျတဲ့လေယာဉ်တွေဟာ လေယာဉ်မှူး ၂ ယောက်လိုက်ပါသွားတဲ့ ရုရှားထုတ် ဆူခွိုင်း အက်စ်ယူ-၃၀ လေယာဉ်နဲ့ လေယာဉ်မှူး ၁ ယောက်လိုက်ပါသွားတဲ့ မီရေ့ဂျ်-၂၀၀၀ လေယာဉ်တွေဖြစ်ပါတယ်။
လေယာဉ်အပျက်အစီးတွေကို ရာဇသံပြည်နယ်၊ ဘာရတ်ပူမြို့နဲ့ မာဒယာပရာဒေ့ရှ်ပြည်နယ်က မိုရီနာမြို့တို့မှာတွေ့ခဲ့တယ်လို့ အိန္ဒိယမီဒီယာတွေက သတင်းဖော်ပြပါတယ်။
ပါဒါဂါ့သစ်တောထဲမှာ ဒဏ်ရာရနေတဲ့လေယာဉ်မှူး ၁ ယောက်ကို အသက်ရှင်လျက်တွေ့ရတယ်လို့ အပျက်အစီးတွေတွေ့ရတဲ့နေရာမှာရှိနေတဲ့ ရဲအရာရှိ ဒါမန်ဒါ ဂါအူက အေအက်ဖ်ပီသတင်းအေဂျင်စီကိုပြောပါတယ်။
လေတပ်ရဲ့ကူညီကယ်ဆယ်ရေးလုပ်ငန်းတွေကိုကူညီဖို့ ဒေသအာဏာပိုင်တွေကို ညွှန်ကြာထားတယ်ဆိုပြီး မာဒယာပရာဒေ့ရှ်ပြည်နယ်ဝန်ကြီးချုပ် ရှီဗရာ ဆင်း ချောင်ဟန်ကပြောပါတယ်။
၂၀၂၂ ခုနှစ်၊ အောက်တိုဘာလမှာလည်း တရုတ်-အိန္ဒိယနယ်စပ်က အရူနာချယ်ပရာဒေ့ရှ်ပြည်နယ်မှာ အိန္ဒိယလေတပ်ရဟတ်ယာဉ်ပျက်ကျပြီး စစ်သား ၅ ယောက်သေဆုံးခဲ့သလို ၂၀၂၁ ခုနှစ်၊ ဒီဇင်ဘာလမှာလည်း တမိနာဒူပြည်နယ်က တောင်ကုန်းတခုကို ရဟတ်ယာဉ်ဝင်တိုက်မိပြီး ပေါက်ကွဲလို့ အိန္ဒိယကြည်းတပ်ဦးစီးချုပ် ဗိုလ်ချုပ် ဘီပင် ရာဝတ်အပါအဝင် လူတဒါဇင်ကျော်သေဆုံးခဲ့ပါတယ်။
Source – BBC
#ဥက္ကာ #MeKongNews
Photo – Reuters
