မဲခေါင်၊ ဖေဖော်ဝါရီ ၆
ဂျပန်နိုင်ငံမှာ လိင်တူအခွင့်အရေးနဲ့ပတ်သက်လို့ ဆန့်ကျင်မှုတွေရှိနေချိန် လိင်တူလက်ထပ်ခွင့်ပြုဖို့မပြောနဲ့ လိင်တူစုံတွဲတွေကိုတောင် မမြင်ချင်ဘူးလို့ ထပြောလိုက်တဲ့ အတွင်းရေးမှူးကို ဂျပန်ဝန်ကြီးချုပ် ကီရှီဒါက ရာထူးက ထုတ်ပယ်လိုက်ကြောင်း ဖေဖော်ဝါရီ ၄ ရက်နေ့မှာ အတည်ပြုပြောကြားခဲ့ပါတယ်။
စီးပွားရေးနဲ့ကုန်သွယ်ရေးဝန်ကြီးဌာန အရာရှိဖြစ်တဲ့ မာဆာယိုရှီအာရာအီကို အောက်တိုဘာလက သူ့ကိုယ်ရေး အတွင်းရေးမှူးအဖြစ် ကီရှီဒါက ခန့်အပ်ခဲ့တာဖြစ်ပြီး အာရာအီက သောကြာနေ့ သတင်းသမားတွေနဲ့မေးမြန်းမှု မှာ သူတို့နိုင်ငံအတွင်း လိင်တူ လက်ထပ်ခွင့်မပြောနဲ့ လိင်တူစုံတွဲတောင် မမြင်ချင်ကြောင်း၊ ဒီလိုလက်ထပ်ခွင့် ပေးလိုက်ရင် တခြားနိုင်ငံကလိင်တူစုံတွဲများစွာ ဂျပန်မှာ လာပြီး လက်ထပ်ကြမယ်၊ ဒီလိုဆိုသူလည်း ရှက်လွန်း လို့ဒီနိုင်ငံမှာမနေတော့ဘူးလို့ ပြောကြားသွားတာဖြစ်ပါတယ်။
ဒီအကြောင်း ဟိုးလေးတကျော်ဖြစ်လာတဲ့အတွက် ကီရှီဒါက နိုင်ငံရဲ့ လူ့အခွင့်အရေးပေါ်လစီကို ကိုက်ညီမှုမရှိတဲ့ စကားကို နားလည်မှုလွဲအောင် ပြောဆိုခဲ့မှုနဲ့ အာရာအီကို ထုတ်ပယ်ကြောင်း NHK သတင်းမှာ တရားဝင် အသိ ပေးပြောကြားသွားတာဖြစ်ပါတယ်။
လွန်ခဲ့တဲ့ နှစ်ပေါင်း ၇၀ အတွင်း ဂျပန်နိုင်ငံကို ရှေးရိုးစွဲ လစ်ဘရယ်ဒီမိုကရက်တစ်ပါတီ ခေါင်းဆောင်တွေကသာ အုပ်ချုပ်ခဲ့ရာမှာ လိင်တူ၊ ဂေး၊ ဒွိလိင်လုံးစိတ်ဝင်စားသူ၊ အင်္ဂါခွဲစိတ်ပြုပြင်ထားသူ စတဲ့ LGBT အသိုင်းအဝိုင်းကို နှိမ့်ကွပ်ထားခဲ့ပြီး ၂၀၂၁ ခုနှစ် ဇူလိုင်လက ကီရှီဒါ ဝန်ကြီးချုပ်ဖြစ်လာပြီးနောက် လိင်တူသမဂ္ဂဖွဲ့စည်းဖို့ တောင်း ဆိုမှုတွေကို ထောက်ခံကြောင်း စတင်ဖြေလျှော့ပေးခဲ့ပါတယ်။
ဒါပေမဲ့ ဂျပန်ဥပဒေအရ လိင်တူ လက်ထပ်ခွင့်မရှိ သလို ပူးတွဲနေထိုင်ပါကလည်း တစ်ယောက်ပိုင်ဆိုင်မှုကို တစ်ယောက် ဆက်ခံပတ်သက်ခွင့်မရှိ၊ တစ်ယောက်ရဲ့ ရင်သွေးကို တစ်ယောက်က မိဘအရာ ဆက်ခံခွင့်မပြုထားပါဘူး။
နိုဝင်ဘာလက တိုကျိုတရားရုံးတစ်ခုကနေ လိင်တူလက်ထပ်ခွင့်ပိတ်ပင်ထားမှုကို ဖျက်သိမ်းကြောင်း ထုတ်ပြန်ခဲ့ပေမယ့် မိသားစုဖွဲ့စည်းပုံနဲ့ လူ့အခွင့်အရေး ကိစ္စရပ်တွေမှာ ရှုပ်ထွေးမှုတွေကို တရားဝင်အသိအမှတ်မပြုသေးလို့ ဝေဖန်မှုတွေ ရှိနေဆဲပါ။
ကီရှီဒါဟာ မေလမှာ ဂျီ – ၇ နိုင်ငံအဖွဲ့ကြီးရဲ့ အစည်းအဝေးကို အိမ်ရှင်အဖြစ် လက်ခံကျင်းပဖို့ရှိနေပြီး ဒီအဖွဲ့ဝင် နိုင်ငံအားလုံးဟာ လိင်တူလက်ထပ်ခွင့် သို့မဟုတ် လိင်တူ သမဂ္ဂလူ့အဖွဲ့အစည်းဖွဲ့စည်းခွင့်ပြုထားတဲ့ နိုင်ငံတွေ ဖြစ်နေတဲ့အတွက် အတွင်းရေးမှူးရဲ့ လူ့အခွင့်အရေးမျက်ကွယ်ပြုစကားကြောင့် ရာထူးက ထုတ်ပယ်ခဲ့တာလည်း ဖြစ်ပါတယ်။
MKF – 001
Ref:NHK
#MeKongNews