အုပ်စုဖွဲ့ရွှေမှောင်ခိုဂိုဏ်းများကို အိန္ဒိယနိုင်ငံတဝန်း အကြီးစားဖြိုခွဲမှုများပြုလုပ်ချိန်တွင် အိန္ဒိယအခွန်ငွေထောက်လှမ်းရေးညွှန်ကြားမှုဌာန(DRI)နှင့် အကောက်ခွန်ဌာနတို့က လူ ၃ ယောက်နှင့် ရူပီးငွေ ၂.၈၆ သိန်း(မြန်မာကျပ်ငွေ ၇၃၁ သိန်းကျော်) တန်ဖိုးရှိ ရွှေချောင်း ၃၅ ချောင်းတို့ကို သိမ်းဆည်းရမိခဲ့သည်။
ထိုရွှေချောင်းများကို မြန်မာနိုင်ငံဘက်မှ အိန္ဒိယနိုင်ငံ၊ မူဇာဖာပူရ်ခရိုင်ဘက်သို့ သယ်လာချိန်တွင် သိမ်းဆည်းရမိခဲ့ခြင်းဖြစ်သည်။
ရွှေချောင်းအလေးချိန်မှာ ၅ ဒဿမ ၈၅ ကီလိုဂရမ်ရှိသည်။
တနင်္ဂနွေနေ့မနက်ပိုင်းတွင် ကြားဖြတ်စစ်ဆေးခဲ့ပြီး နာရီအတော်ကြာကြာတွင်မှ DRI ကထုတ်ပြန်ခြင်းဖြစ်သည်။
ထိုရွှေချောင်းများမှာ ၂၄ ကာရတ်ရွှေချောင်းအစစ်များဖြစ်ပြီး ကားအင်ဂျင်အောက်မှဘက်ထရီများထဲတွင် တွေ့ရှိခြင်းဖြစ်သည်။
ထိုရွှေများသည် မြန်မာနိုင်ငံမှလာခြင်းဖြစ်နိုင်ပြီး မြန်မာရွှေဈေးကွက်တွင်အသုံးပြုသည့်တံဆိပ်များတွေ့ရကြောင်း သတင်းရင်းမြစ်တယောက်ကပြောသည်။
ဖမ်းဆီးခံလူ ၃ ယောက်၏ လုံခြုံရေးအတွက် ထိုသူများ၏အမည်ကို ထုတ်ဖော်ပြောဆိုခြင်းမရှိဘဲ ထိုသူများသည် ယခင်ကလည်း အိန္ဒိယဘက်သို့ ရွှေချောင်းများတရားမဝင်သယ်ယူခဲ့သည့်မှတ်တမ်းရှိကြောင်းလည်း ထိုသတင်းရင်းမြစ်က အသိပေးသည်။