ရဲအရာရှိနှင့်အစိုးရအရာရှိ ၃၃ ယောက်ကို ဝတ္တရားပျက်ကွက်မှုနှင့် တရားမဝင်လုပ်သားမှောင်ခိုကူးရာတွင်ပါဝင်ကူညီမှုတို့ဖြင့် စုံစမ်းစစ်ဆေးမည်ဟု ထိုင်းတော်ဝင်ရဲတပ်ဖွဲ့က ပြောသည်။
ကန်ချာနာဘူရီခရိုင်၊ ဆောင်ခလာဘူရီမြို့ရှိ ထိုင်း-မြန်မာနယ်စပ်မှတဆင့် ရွှေ့ပြောင်းလုပ်သားများကိုတရားမဝင်ကုန်ကူးရာတွင် အရာရှိ ၃၃ ယောက်ပါဝင်သည်ဟု အစောပိုင်းစုံစမ်းစစ်ဆေးဖော်ထုတ်မှုတွင်သိရသည်ဟု ဒုတိယအမျိုးသားရဲချုပ် ရဲဗိုလ်ချုပ်ကြီး ဒမ်ရောင်ဆက် ကစ်တီပရာပတ်စ်က ကြာသပတေးနေ့တွင်ပြောသည်။
ထိုလူများထဲတွင် ပြန်တမ်းမဝင်သေးသည့်ရဲတပ်ဖွဲ့ဝင်များ၊ ပြန်တမ်းဝင်ရဲတပ်ဖွဲ့ဝင်များမှ ဒုတိယတပ်မှူးကြီးအဆင့်အထိ အယောက် ၂၀ ပါဝင်ပြီး ကျန်သူများသည် အစိုးရအေဂျင်စီများမှဖြစ်ကြောင်းလည်း သူကပြောသည်။
အချို့က လူကုန်ကူးခြင်းကို မသိကျွိုးကျွံပြုထားပြီး အချို့က ထိုမှုခင်းများတွင် ကိုယ်တိုင်ကိုယ်ကျပါဝင်သည်ဟုလည်း အသိပေးသည်။
ထို ၃၃ ယောက်ကို မှုခင်းစစ်ဆေးနိုင်ရန်နှင့် စည်းကမ်းချိုးဖောက်မှုဆိုင်ရာ အရေးယူမှုများလုပ်နိုင်ရန် စုံစမ်းရေးအဖွဲ့ဖွဲ့စည်းရေးအတွက် လာမည့်တနင်္လာနေ့တွင် ရဲချုပ် ရဲဗိုလ်ချုပ်ကြီး ဆူဝက် ဂျန်ယော့ဆွတ်ထံ တနင်္လာနေ့တွင်တင်ပြမည်ဟုလည်း ပြောသည်။
လာမည့်တပတ်တွင် ရွှေ့ပြောင်းလုပ်သားများကို ထိုင်းနိုင်ငံအတွင်းခိုးသွင်းပြီး ဆာမွတ်ဆာခွန်ခရိုင်သို့ပို့ဆောင်ခဲ့သည့်ဂိုဏ်းတဂိုဏ်း၏ အဖွဲ့ဝင် ထိုင်းနိုင်ငံသား ၈ ယောက်ကိုဖမ်းဆီးရေး ထိုင်းရဲတပ်ဖွဲ့က ဝရမ်းထုတ်မည်ဟုလည်း အသိပေးသည်။
ထိုင်းနိုင်ငံမှ တရားမဝင်နိုင်ငံခြားလုပ်သားများကို မှတ်ပုံတင်ရေး ပြင်ဆင်ရန် နယ်စပ်လုံခြုံရေးလှည့်ကင်းများလည်း အဆင့်မြှင့်တင်သွားမည်ဟု ပြောသည်။
ဇန်နဝါရီ ၁၅ ရက်မှ ဖေဖော်ဝါရီ ၁၃ ရက်အထိ မှတ်ပုံတင်ခြင်းလုပ်ငန်းစဉ် စတင်မည်ဖြစ်သည်။
ကိုရိုနာဗိုင်းရပ်စ်ကူးစက်မှု စစ်ဆေးခံရေးအားပေးရန်အတွက် တရားမဝင်ရွှေ့ပြောင်းလုပ်သားများကို ထိုင်းနိုင်ငံတွင် ၂ နှစ်နေထိုင်ခွင့်ပြုရန် ဇန်နဝါရီ ၂၉ ရက်တွင် ထိုင်းအစိုးရအဖွဲ့ကအတည်ပြုခဲ့သည်။
