Vape သောက်တာနဲ့ဆက်စပ်ပြီး အဆုတ်ဒဏ်ရာရမှု(Evali)အတည်ပြုလူနာတယောက် ပထမဆုံးတွေ့ရှိခဲ့တယ်လို့ မဟီဒေါတက္ကသိုလ်၊ ရာမသီဘိုဒီဆေးရုံ ကိုယ်တွင်းအင်္ဂါဌာနအကြီးအကဲ ဝီနိုင်း ဝါနာနူကူး ကပြောပါတယ်။
လူနာဟာ အမျိုးသားရုံးဝန်ထမ်း ၁ ယောက်ဖြစ်တယ်လို့ ဗုဒ္ဓဟူးနေ့မှာသူကပြောတာပါ။
အလားတူဖြစ်ပွားမှုတွေတွေ့ဖူးပေမဲ့ အခုလူနာက ပထမဆုံးတယောက်ဖြစ်တယ်လို့လည်း ပြောပါတယ်။
ပြီးခဲ့တဲ့လမှာ အော့အန်တာနဲ့ အသက်ရှုကြပ်တာတွေကြောင့် အသက် ၂၀ နဲ့ ၃၀ ကြားရှိတဲ့လူနာက ဆေးရုံတက်ရောက်ခဲ့တယ်လို့ ရာမသီဘိုဒီဆေးရုံက တာနန်ချိုင်း ပတ်နက်ကပြောပါတယ်။
ပြီးခဲ့တဲ့ ၅ နှစ်က ဆေးလိပ်ဖြတ်ခဲ့တဲ့လူနာဟာ မိတ်ဆွေတွေရဲ့ညွှန်းဆိုမှုကြောင့် Vape ပြောင်းလဲအသုံးပြုခဲ့ပြီး ၆ လဆက်တိုက် Vape သောက်ခဲ့တယ်လို့ ဒေါက်တာ တာနန်ချိုင်းကပြောပါတယ်။
အီလက်ထရောနစ်စီးကရက်တွေထဲမှာပါတဲ့ဆီတွေကို ဖယ်ထုတ်ဖို့ အဆုတ်က ပိုအလုပ်လုပ်ရတယ်ဆိုပြီး မဟီဒေါတက္ကသိုလ်၊ ရာမသီဘိုဒီဆေးရုံ အသက်ရှူလမ်းကြောင်းနှင့်နာတာရှည်အဆုတ်ရောဂါကုသရေးဌာနအကြီးအကဲ နာပါရတ် အမွန်ပွတ်သီဆာသပွန်က ပြောပါတယ်။
ရောဂါဖြစ်တာဟာ ဆေးရည်တွေထဲမှာထည့်သွင်းထားပြီး ခွင့်ပြုချက်မရှိတဲ့စွဲလမ်းစေတဲ့ပစ္စည်းတွေကြောင့်လို့ Vape ဆေးရည်ထုတ်လုပ်တဲ့ကုမ္ပဏီတွေကပြောထားပေမဲ့ ရောနှောထားခြင်းမရှိတဲ့ဆေးရည်တွေအသုံးပြုပြီး Vape သောက်သူတွေလည်း Evali တွေဖြစ်နိုင်တယ်လို့ လေ့လာချက်အများအပြားမှာဖော်ပြထားပါတယ်။