မဲခေါင်၊ ဇူလိုင် ၃
အမေရိကန် ဘဏ္ဍာရေးသုတေသန Forbes မဂ္ဂဇင်းနောက်ဆုံး ထုတ်ပြန်လိုက်တဲ့ ကမ္ဘာ့အချမ်းသာဆုံး ပုဂ္ဂိုလ်များစာရင်းမှာ ထိုင်းနိုင်ငံရဲ့ အချမ်းသာဆုံးနေရာကို Red Bull အားဖြည့်အချိုရည် ပူးတွဲပိုင်ရှင်ဖြစ်တဲ့ ချာလမ်းယိုဗစ်ဒရာ မိသားစုက ရပ်တည်သွားနိုင်ပြီး အရင် အချမ်းသာဆုံးဖြစ်တဲ့ CP Group ရဲ့ ချီအာရာဗန်နွန့် ညီအစ်ကိုများအုပ်စု က ဒုတိယ အချမ်းသာဆုံးနေရာကို ကျဆင်းသွားခဲ့ပါတယ်။
![](https://mekongnewsmm.com/wp-content/uploads/2024/07/signal-2024-07-03-172914_003.jpeg)
ထိုင်းနိုင်ငံရဲ့ အချမ်းသာဆုံးပုဂ္ဂိုလ် အယောက် ၅၀ စာရင်းရဲ့ စုစုပေါင်း ကြွယ်၀ချမ်းသာမှုက မနှစ်ကထက် ၁၅ ရာခိုင်နှုန်း ကျဆင်းသွားပြီး ချာလမ်းယိုဗစ်ဒရာမိသားစုရဲ့ ကြွယ်၀မှုက မနှစ်ကထက် ဒေါ်လာ ၂.၆ ဘီလီယံ ပိုတိုးလာပြီး စုစုပေါင်း ဒေါ်လာ ၃၆ ဘီလီယံနဲ့ အချမ်းသာဆုံး စာရင်းဝင်သွားခဲ့တာဖြစ်ပါတယ်။
မနှစ်ကတစ်နှစ်တည်း Red Bull ရဲ့ ကမ္ဘာလုံးဆိုင်ရာ ရောင်းအားက ပုလင်းနဲ့ သံဗူးနှစ်မျိုးစလုံး ၁၂ ဘီလီယံကျော် ရောင်းခဲ့ရလို့ ဝင်ငွေ ဒေါ်လာ ၁၁ ဘီလီယံအထိ ရှိခဲ့တာကြောင့်လည်း အချမ်းသာဆုံး စာရင်းကို တက်လှမ်းသွားနိုင်တာဖြစ်ပါတယ်။
ချာရိုအန်ပေါ့ခ်ဖန်းအုပ်စုလို့ ခေါ်တဲ့ CP Group ဟာ ဆယ်စုနှစ်တစ်ခုအတွင်း ထိုင်းနိုင်ငံရဲ့ အချမ်းသာဆုံးအဖြစ် ထိပ်ဆုံးက ရပ်တည်ခဲ့ပေမယ့် မနှစ်က ကြွယ်၀မှု ဒေါ်လာ ၃၄ ဘီလီယံကနေ ဒီနှစ် ဒေါ်လာ ၂၉ ဘီလီယံသာ ချမ်း သာတော့တဲ့အထိ နိမ့်ကျသွားလို့ အဆင့် (၁) နေရာကို ဖယ်ပေးလိုက်ရတာပဲဖြစ်ပါတယ်။
တတိယနေရာကိုတော့ ထိုင်းနိုင်ငံရဲ့ အဖျော်ယမ္ပကာလုပ်ငန်းကို လက်ဝါးကြီးအုပ်ထားနိုင်တဲ့ Thai Beverage ကပဲ ရယူထားပြီး မနှစ်ကထက် ဒေါ်လာ ၃ . ၆ ဘီလီယံ လျော့နည်းသွားပေမယ့် ဒေါ်လာ ၁၀ ဘီလီယံနဲ့ တတိယအချမ်းသာဆုံးအဖြစ် ရပ်တည်သွားနိုင်တာဖြစ်ပါတယ်။
စတုတ္ထနေရာမှာ နိုဝင်ဘာလက လန်ဒန် Selfridges စတိုးဆိုင်လုပ်ငန်းရဲ့ အဓိက ရှယ်ယာရှင်အဖြစ်ပါ ရင်းနှီးမြှုပ်နှံနိုင်ခဲ့တဲ့ Central Group မိသားစုက ကြွယ်၀မှု ဒေါ်လာ ၉.၉ သန်း၊ စွမ်းအင်နဲ့ တယ်လီကွန်းတိုင်ကွန် ဆရတ် ရတ်တာနာဗာဒီက ကြွယ်၀မှု ဒေါ်လာ ၉.၂ ဘီလီယံနဲ့ အသီးသီးရပ်တည်သွားပါတယ်။
အဆိုးရွားဆုံး ကြွယ်၀မှု လျော့နည်းသွားတဲ့ ထိုင်းသူဌေးကတော့ ပြန်လည်ဆန်းသစ်စွမ်းအင်နဲ့ လျှပ်စစ်ကားလုပ်ငန်းတွေလုပ်တဲ့ Energy Absolute အမှုဆောင်ချုပ် ဆွမ်ဖုတ်အူနိုင်းဖြစ်ပြီး မနှစ်က အချမ်းသာဆုံး အဆင့် (၁၀)အတွင်း ဝင်ခဲ့ပေမယ့် လုပ်ငန်းမအောင်မြင်မှုကနေ ကြွေးဖိစီးမှုကြောင့် အဆင့် (၃၂) နေရာကို ထိုးဆင်းသွားခြင်းဖြစ်ပါတယ်။
အာရှမှာ ပြီးခဲ့တဲ့နှစ်အတွင်း စီးပွားရေးကျဆင်းခြင်းကြောင့် ကြွယ်၀သူတွေ ပိုင်ဆိုင်မှု လျော့ကျလာခဲ့တာဖြစ်ပြီး ထိုင်းစတော့ခ်ရှယ်ယာစျေးကွက် SET မှာ ဘတ်ငွေတန်ဖိုးကျဆင်းခြင်းကြောင့်လည်း ထိုင်းအချမ်းသာဆုံး အယောက် ၅၀ ရဲ့ စုစုပေါင်း ကြွယ်၀မှု ကျဆင်းမှုနှုန်းဟာ ၁၂ ရာခိုင်နှုန်း (ငွေအားဖြင့် ဒေါ်လာ ၁၅၃ ဘီလီယံ) အထိ ကျဆင်းသွားရတာဖြစ်ပါတယ်။
Ref:Bangkokpost
MKF-001