ကိုရိုနာဗိုင်းရပ်စ်ကမ္ဘာ့ကပ်ရောဂါကြောင့် တရားဝင်လုပ်သားအခြေအနေဆုံးရှုံးနိုင်သည့်ရွှေ့ပြောင်းလုပ်သားများအတွက် မှတ်ပုံတင်ရန်အချိန် ၆ လထပ်တိုးပေးရန် ထိုင်းအစိုးရအဖွဲ့ထံ အလုပ်သမားဝန်ကြီးဌာနကတောင်းဆိုမည်ဖြစ်သည်။
ကိုရိုနာဗိုင်းရပ်စ်စစ်ဆေးမှု ရလဒ်များအပါအဝင် အလုပ်ပါမစ်သက်တမ်းတိုးရန်လိုအပ်သော အချိန်နှင့်တပြေးညီတင်သွင်းရမည့် စာရွက်စာတမ်းများမရနိုင်သည့် ရွှေ့ပြောင်းလုပ်သားများ၏ တရားဝင်မှုအခြေအနေကိုထိန်းထားနိုင်ရန် သက်တမ်းတိုးပေးရေးစီစဉ်ခြင်းဖြစ်ကြောင်း အလုပ်သမားဝန်ကြီး ဆူချာ့ ချွန်ကလင်က ဗုဒ္ဓဟူးနေ့တွင်ပြောသည်။
ယခုနှစ်အတွင်းသက်တမ်းမတိုးနိုင်ပါက တရားဝင်ရွှေ့ပြောင်းလုပ်သား ၁.၇ သန်းသည် တရားဝင်အလုပ်လုပ်ခွင့်ဆုံးရှုံးနိုင်ကြောင်းလည်းပြောသည်။
အလုပ်မရှိသူများအပါအဝင် တရားမဝင်ရွှေ့ပြောင်းလုပ်သားများအနေနှင့် အာဏာပိုင်များထံမှတ်ပုံတင်ရန်လိုအပ်ပြီး ပါမစ်ကို ဝန်ကြီးဌာနဝက်ဆိုက်တွင် ဇန်နဝါရီ ၁၅ ရက်မှ ဖေဖော်ဝါရီ ၁၃ ရက်အထိ လျှောက်ထားနိုင်သည်။
မှတ်ပုံတင်ပြီးသူများအနေဖြင့် ထိုင်းတွင် ၂ နှစ်ကြာနေထိုင်အလုပ်လုပ်ခွင့်ရှိပြီး မှတ်ပုံတင်သူများအနေဖြင့် တရားမဝင်နေထိုင်ခြင်းအတွက် ပြစ်ဒဏ်ခံရမည်မဟုတ်ချေ။
တရားမဝင်ရွှေ့ပြောင်းလုပ်သားများ၏ ဇီဝအချက်အလက်များကောက်ယူခြင်းကို ဧပြီ ၁၆ ရက်နောက်ဆုံးထားပြီးအဆုံးသတ်မည်ဟု ဗုဒ္ဓဟူးနေ့က ဝန်ကြီးဌာနနှင့်အစည်းအဝေးတွင် အမျိုးသားလုံခြုံရေးအဖွဲ့များက အဆိုပြုသည်။
ပါမစ်သက်တမ်းတိုးလိုသည့် ရွှေ့ပြောင်းလုပ်သားတိုင်းကို ပြည်သူ့ကျန်းမာရေးဝန်ကြီးဌာနက သတ်မှတ်ထားသည့် ဆေးရုံများတွင် ကိုရိုနာဗိုင်းရပ်စ်ရှိ၊ မရှိ အခကြေးငွေဖြင့် စစ်ဆေးပေးမည်ဟုလည်း ဝန်ကြီးကပြောသည်။