တရားမဝင် အွန်လိုင်းကာစီနိုကွန်ရက် စီမံခန့်ခွဲနေကြောင်း နိုင်ငံတကာဖမ်းဝရမ်းထုတ်ခံထားရသည့် အငြင်းပွားဖွယ် တရုတ်စီးပွားရေးလုပ်ငန်းရှင် အမျိုးသားတယောက်ကို ထိုင်းအာဏာပိုင်များက ထိန်းသိမ်းထားသည်။
အသက် ၄၀ ရှိနေသည့် ရှီကျီဂျန်းဟာ ၂၀၁၂ ခုနှစ်နောက်ပိုင်းကတည်းက တရုတ်အာဏာပိုင်များ လက်မှထွက်ပြေးနေသည်ဟု တရုတ်မီဒီယာများက ဖော်ပြသည်။
ကမ္ဘောဒီးယားနိုင်ငံနှင့် မြန်မာနိုင်ငံ၊ ကရင်ပြည်နယ်က ရွှေကုက္ကိုစီမံကိန်းတို့ကဲ့သို့ အငြင်းပွားဖွယ် အကြီးစားစီမံကိန်းကြီးများနှင့် လောင်းကစားရုံများသာမက ဖိလစ်ပိုင်နိုင်ငံက ထီရုံတို့ကိုလည်း ပိုင်ဆိုင်ထားကြောင်း သတင်းတွေမှာ ဖော်ပြထားသည်။
ဗုဒ္ဓဟူးနေ့ညပိုင်း၌ ထိုင်းလူဝင်မှုကြီးကြပ်ရေးဌာနက သူ့ကိုထိန်းသိမ်းပြီးနောက် သူ့ထိုင်းဗီဇာကိုလည်း ပယ်ဖျက်ခဲ့ပြီး တရားခံလွှဲပြောင်းရေးတောင်းဆိုမှုကိုလည်း ဆိုင်းငံထားကြောင်း ထိုင်းရဲများက ပြောသည်။
“ထိုင်းအစိုးရရှေ့နေက လာမယ့်တပတ်မှာ ရာဇဝတ်မှုဆိုင်ရာတရားရုံးကို ယာယီထိန်းသိမ်းခွင့် တောင်းပါလိမ့်မယ်”ဟု ထိုင်းရဲအရာရှိတယောက်က AFP သတင်းအေဂျင်စီကို ပြောသည်။
နိုင်ငံတကာရဲတပ်ဖွဲ့(အင်တာပို)က ၂၀၂၁ ခုနှစ်၊ မေလ၌ ထုတ်ပြန်ခဲ့သည့် အနီရောင်အဆင့်သတိပေးချက်၌ ရှီသည် တရုတ်နိုင်ငံတွင် ကာစီနိုလုပ်ငန်းနှင့်ဆက်စပ်သည့် ရာဇဝတ်မှုစွဲချက်များရင်ဆိုင်နေရပြီး အများဆုံးထောင်ဒဏ် ၁၀ နှစ်ကျခံရနိုင်ကြောင်း ပါဝင်နေသည်။
၂၀၁၈ ခုနှစ်၊ ဇန်နဝါရီလနှင့် ၂၀၂၁ ခုနှစ်၊ ဖေဖော်ဝါရီလတို့ကြား ရာဇဝတ်ဂိုဏ်းတခုကို ဦးဆောင်နေသည့်သံသယတရားခံက အခြားလူများနှင့်ပူးပေါင်းကာ ကုမ္ပဏီများမှတ်ပုံတင်ခဲ့ပြီး အွန်လိုင်းလောင်းကစားဝက်ဆိုက်များ သုတေသနနှင့် ဖွံ့ဖြိုးရန်လုပ်ခဲ့ကြောင်းလည်း သတိပေးချက်၌ ပါဝင်သည်။
Hongshulin၊ Yigou နှင့် Yiyou International တို့အပါအပင် အွန်လိုင်းလောင်းကစားဝက်ဆိုက်များ တည်ထောင်ခဲ့ပြီး လောင်းကစားသူ ၃၃၀၀၀၀ စုစည်းနိုင်ခဲ့ကြောင်းလည်း ပါဝင်သည်။
“တရားမဝင်လုပ်ငန်းတွေကြောင့် ရှီကျီဂျန်းရခဲ့တဲ့ဝင်ငွေ ဒေါ်လာ ၃၀.၅ သန်းကို နိုင်ငံခြားလွှဲပြောင်းပေးခဲ့ပါတယ်”ဟု လည်းပါဝင်သည်။
သိသာထင်ရှားသည့်ငွေပမာဏတခုလိမ်လည်ခံလိုက်ရသော တရုတ်သားကောင်တယောက် ကိုယ့်ကိုယ်ကို သေကြောင်းကြံခဲ့ကြောင်း ထိုင်းမီဒီယာများက ဖော်ပြသည်။
ရှီတွင် ကမ္ဘောဒီးယားနိုင်ငံကူးလက်မှတ်ရှိကြောင်း သတိပေးစာမှာပြောသော်လည်း တရုတ်နိုင်ငံ၊ ဟူနန်ပြည်နယ်တွင် မွေးဖွားခဲ့သူဖြစ်သည်။
၂၀၁၇ ခုနှစ်တွင် ကမ္ဘောဒီးယားနိုင်ငံသားဖြစ်လာကြောင်း Frontier Myanmar ကဖော်ပြသော်လည်း အခြေအနေအတိအကျ မရှင်းလင်းချေ။
အစိုးရဘဏ္ဍာတိုက်ကို အနည်းဆုံးဒေါ်လာ ၂၅၀၀၀၀ လှူဒါန်းပါက လူတယောက်ကို ကမ္ဘောဒီးယားအစိုးရက နိုင်ငံသားဖြစ်ခွင့်ပေးသည်။
တရုတ်နှင့်ထိုင်းနိုင်ငံတို့ကြား ရာဇဝတ်သားလွှဲပြောင်းရေးသဘောတူညီချက်ရှိသော်လည်း လွှဲပြောင်းရန် လပေါင်းများစွာကြာနိုင်သည်။