မဲခေါင်၊ မတ် ၁၀
ရန်ကုန်တိုင်း၊ လမ်းမတော်မြို့နယ်၊ ၁၆ လမ်းရှိ ၈ လွှာတိုက်ခန်းမှာ နေထိုင်တဲ့အမျိုးသမီး တစ်ဦးရဲ့ နေအိမ်ကို မတ်လ ၈ ရက်နေ့က ဝင်ရောက်စစ်ဆေးရာ ကွက်ကီး မုန့်ထဲ ဆေးခြောက် ထည့်ပြီး ရောင်းချနေတာ ဖမ်းဆီးရမိခဲ့တယ်လို့ မူးယစ်တပ်ဖွဲ့ ရဲအရာရှိ တစ်ဦးက ပြောပါတယ်။
အဆိုပါ အမျိုးသမီးရဲ့ ဖော်ထုတ်ချက်အရ လမ်းမတော် (၁၀) ရပ်ကွက်၊ ဗဟိုရ်စည်အိမ်ယာအတွင်း နေထိုင်သူ အသက် ၂၁ နှစ်အရွယ် ဇော်လင်းနောင် ကို ဆေးခြောက်နဲ့အတူ အခြားပစ္စည်းများ ဖမ်းဆီးရမိခဲ့တယ်လို့ သူကပြောပါတယ်။
“ အွန်လိုင်းကနေ တစ်ဆင့် ရောင်းကြဝယ်ကြတာ။ ပေါက်ဈေးက အနည်းဆုံး ၆ထောင်ကနေ စပြီး ရောင်းကြတာ။ အခု အရေအတွက်ပေါ် မူတည်ပြီး ဈေးနှုန်း ကွာသွားတာ။ တစ်ချို့ကလည်း အိမ်က လူကြီးတွေကို ကျွေးပြီး စနောက်တာတွေ လုပ်ကြတယ်။ ဆေးခြောက်ရှူတာကြတော့ အနံ့ထွက်ရင် လူသိတယ်။ ကွတ်ကီးထဲ ထည့်ထားတော့ လူမသိဘူးလေ။ အဲ့လိုလေးတော့ ကွာမယ်။ တရားဝင် မဟုတ်ပေမယ့် ရောင်းနေတဲ့သူတွေလည်း ရှိနေတာပဲ” လို့ ရန်ကုန်မြို့ခံ တစ်ဦးက ပြောပါတယ်။
ကွက်ကီးမုန့်များ အတွင်း ဆေးခြောက်များထည့်ကာ ရောင်းချတဲ့ ထက်ရတနာစိုးနဲ့ ဇော်လင်းနောင်တို့ထံမှ မုန့် ၅၀ ခု၊ ဆေးခြောက်ရှူတဲ့ ဆေးဂေါက်တံ၊ ဆေးခြောက်အမှုန့် ၁၀၉ ဂရမ်နဲ့ အခြား ပစ္စည်းအချို့ကို ဖမ်းဆီးရမိထားတယ်လို့ သိရပါတယ်။
အိမ်နီးချင်း ထိုင်းနိုင်ငံမှာတော့ ဆေးခြောက်ကို တရားဝင် ရောင်းချ သုံးစွဲခွင့် ပြုထားပေမယ့် မြန်မာနိုင်ငံ ဥပဒေအရ မူးယစ်ဆေး အဖြစ် သတ်မှတ်ထားတာ ဖြစ်ပါတယ်။
MK-005