မဲခေါင်၊ ဇန်နဝါရီ ၂၇
ရှမ်းပြည်နယ်အရှေ့ပိုင်း၊ မိုင်းဆတ်မြို့နယ်မှာ ၄ ဒသမ ၁၃ ဘီလီယံကျော်တန်ဖိုးရှိ မူးယစ်ဆေးဝါးနဲ့ လက်နက်ခဲယမ်းတွေ ဖမ်းဆီးရမိခဲ့တယ်လို့ စစ်ကောင်စီလက်အောက်ခံ မူးယစ်ဆေးဝါးတားဆီးနှိမ်နင်းရေးတပ်ဖွဲ့က မနေ့က သတင်းထုတ်ပြန်ထားပါတယ်။
မိုင်းဆတ်မြို့နယ်၊ မိုင်းတွမ်း(တောင်ပေါ်)ကျေးရွာ အုပ်စု၊ ပူနားကိုကျေးရွာအနီးရှိ ရာဘာခြံကို သတင်းအရ ဇန်နဝါရီလ ၂၂ရက်၊ ညနေ ၃ နာရီဝန်းကျင်အချိန်က ဝင်ရောက်ရှာဖွေရှာဖွေခဲ့တယ်လို့ သိရပါတယ်။
အဲဒီခြံအတွင်းရှိ တစ်ထပ်တိုက်အတွင်းမှာ ကျဘို၊ ကျရှော တို့၂ဦးကို ငွေကျပ် ၄ ဒသမ ၁၃ ဘီလီယံကျော်တန်ဖိုးရှိ စိတ်ကြွရူးသွပ်ဆေးပြား ၆ ဒသမ၅သန်း၊ အိုက်စ်(မက်သ်အဖက်တမင်း) ၁၉၂ကီလို၊ ပစ္စတို ၁လက်၊ HK 33 သေနတ် ၁လက်၊ M-16 သေနတ် ၁လက်၊ K-12 သေနတ် ၁လက်၊ တစ်လုံးထိုးသေနတ် ၁လက်၊ ကျည်မျိုးစုံ ၁၆၅၀တောင့်၊ လက်ပစ်ဗုံး ၇ လုံးတို့နဲ့အတူ ဖမ်းဆီးရမိခဲ့တာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
ဒီဖြစ်စဉ်နဲ့ပါတ်သက်ပြီး ကျဘိုနဲ့ ကျရှောတို့ ၂ဦးကို ဥပဒေအရ အရေးယူထားပြီး ကွင်းဆက်ပြစ်မှုကျူးလွန်သူတွေကို ဆက်လက်စစ်ဆေးဖော်ထုတ်နေတယ်လို့လည်း မူးယစ်ဆေးဝါးတားဆီးနှိမ်နင်းရေးတပ်ဖွဲ့(CCDAC)က ထုတ်ပြန်အသိပေးထားတာဖြစ်ပါတယ်။
ရှမ်းအရှေ့ပိုင်းက မိုင်းဆက်မြို့နယ်ထဲမှာ ဒီလိုမူးယစ်ဆေးဝါး အမြောက်အများဖမ်းဆီးရမိတာ အရင်ကလည်း ရှိခဲ့ပြီး ၂၀၁၉ခုနှစ် ဇွန်လအတွင်းက တန်ဖိုး ကျပ်ဘီလီယံနဲ့ချီတဲ့ မူးယစ်ဆေးတွေကို ဖမ်းမိတယ်လို့ စစ်တပ်က ထုတ်ပြန်ခဲ့ပါတယ်။
ရှမ်းပြည်နယ်အရှေ့ပိုင်း မိုင်းဆက်ခရိုင်ဟာ အာဏသိမ်းစစ်တပ်လက်အောက်ခံ ပြည်သူ့စစ်တွေနဲ့ စစ်ကောင်စီတပ်တွေ ကြီးစိုးတဲ့ ဒေသလည်းဖြစ်ပါတယ်။
MK-008
#MeKongNews #တာချီလိတ် #ပူနားကို #မူးယစ်ဆေး