မဲခေါင်၊ မတ် ၂၂
စစ်တပ်နဲ့ရဲ ထူထပ်စွာ ချထားတဲ့ ရှမ်းပြည်နယ် မြို့တော်၊ တောင်ကြီးမြို့ရှိ မြန်မာ့စီးပွားရေးဘဏ်မှာ မနေ့က ပင်စင်လာထုတ်တဲ့ ထွေအုပ် အငြိမ်းစားဝန်ထမ်း တစ်ဦး ခါးပိုက်နှိုက် ခံလိုက်ရတယ်လို့ နီးစပ်သူတွေ ထံက သိရပါတယ်။
မနေ့ မတ်လ ၂၁ ရက်၊ မနက်ပိုင်း ဘဏ်စဖွင့်စဉ် ပင်စင်ထုတ်ဖို့ သွားစောင့်နေတဲ့ အငြိမ်းစား ထွေအုပ် ဌာနခွဲ စာရေး ဝန်ထမ်းရဲ့ အရေးကြီး စာရွက်စာတမ်းတွေ ပါတဲ့အိတ် ခါးပိုက်နှိုက် ခံလိုက်ရတာလို့ ဆိုပါတယ်။
“ ပင်စင်သွားထုတ်တာ ဘဏ်ထဲမှာပဲ ဘေးအိတ်ကပ်ထဲ ထည့်ထားတဲ့အိတ် နှိုက်ခံရတာပါ။ ပိုက်ဆံ ထုတ်လို့ရတော့ သွားယူပြီး အိတ်ထဲထည့်မယ် ဆိုတော့ မရှိတော့တာ။ ပိုက်ဆံနဲ့ ဖုန်းတော့ မပါသွားပါဘူး။ မှတ်ပုံတင်က နယ်က လုပ်ထားတာ ဆိုတော့ မတွေ့ရင် နယ်ပြန်လုပ်ရမှာ” လို့ မိသားစုနဲ့ နီးစပ်သူက ပြောပါတယ်။
ပျောက်သွားတဲ့ အပြာရောင်ဇစ်ဆွဲ အိတ်ထဲမှာ ပင်စင် ထုတ်ယူခွင့်ကတ် ၂ ကတ်၊ ငွေစု စာအုပ်နဲ့ မှတ်ပုံတင် တစ်ခု ပါသွားပြီး တွေ့ရှိသူတွေ အနေနဲ့ မိသားစုကို ဆက်သွယ်ပေးကြဖို့ မေတ္တာရပ်ခံ ထားပါတယ်။
စစ်တပ် အာဏာသိမ်းပြီးနောက် တောင်ကြီးမြို့ မြန်မာ့စီးပွားရေးဘဏ် ရှေ့မှာ စုရုံး ဆန္ဒပြစဉ် ကတည်းက ဒီနေ့အထိ စစ်တပ်နဲ့ရဲ အများအပြား အချိန်ပြည့် လုံခြုံရေး ယူနေတဲ့ ကြားက အခုလို ဘဏ်တွင်းမှာ ခါးပိုက်နှိုက် ခံရမှု ဖြစ်ပွားခဲ့တာ ဖြစ်ပါတယ်။
ဓာတ်ပုံ-ပုံဟောင်း။
CJ – 001