မဲခေါင်၊ ဧပြီ ၃
ရှမ်းပြည်နယ် တောင်ပိုင်း၊ မောက်မယ်မြို့နယ်၊ ကဒူးကြီးဒေသမှာ ရှမ်းပြည် ပြန်လည်ထူထောင်ရေးကောင်စီ RCSS နဲ့ ပအိုဝ်းအမျိုးသား လွတ်မြောက်ရေး အဖွဲ့ချုပ်တို့ ဒီကနေ့ ဧပြီ ၃ ရက်နေ့မှာ တိုက်ပွဲ ပြင်းထန်ခဲ့တယ်လို့ သိရပါတယ်။
မတ် ၃၀ ရက်မှာ ကင်းလှည့်နေတဲ့ PNLO တပ်ဖွဲ့ကို RCSS က စတင် ပစ်ခတ်ရာက ၂ ရက်ဆက်တိုက် တိုက်ပွဲ ဖြစ်ပွားခဲ့ပြီးနောက် ၅ ရက်အကြာ ဒီကနေ့မှာ တိုက်ပွဲ ထပ်မံ ဖြစ်ပွားတာ ဖြစ်ပါတယ်။
ဒီကနေ့ မနက် ၁၁ နာရီက နေ့လယ် ၃ နာရီကျော်အထိ တိုက်ပွဲဖြစ်ပွားတာဟာ PNLO ရဲ့ ရှေ့ကာကင်းတပ်ကို RCSS က လာပစ်လို့ ဖြစ်တာလို့ PNLO တာဝန်ရှိသူ တစ်ဦးက ပြောပါတယ်။
“တိုက်ပွဲ စကတည်းက သူတို့က ပြန်မဆုတ်သေးဘူး။ အဲဒါကြောင့် ကျွန်တော်တို့က နယ်မြေ ရှင်းလင်းရေး လုပ်နေတာပါ။ ဒီနေ့ ဖြစ်တာကတော့ ကျွန်တော်တို့ တပ်ဖွဲ့ရဲ့ ရှေ့ကာကင်းကို လာပစ်တာကနေ စဖြစ်တာပါ။ အထိအခိုက်ကတော့ နယ်မြေ ရှင်းလင်းပြီးမှပဲ သိရမှာပါ။ ဒီနေ့တော့ တိုက်ပွဲက ပြင်းထန်တဲ့ အနေအထားပါ” လို့ PNLO တပ်မှူးက ပြောပါတယ်။
ဒီကနေ့ တိုက်ပွဲက နောင်ခိုင်းနဲ့ နမ့်ပါတဲက် ကျေးရွာ ၂ ရွာကြားမှာ ဖြစ်ပွားခဲ့တာလို့ သူကပြောပါတယ်။
အခုလို တိုက်ပွဲ ဆက်လက် ဖြစ်ပွားရတာဟာ နယ်မြေ ကျူးကျော်လာတဲ့ RCSS တပ်ဖွဲ့က အင်အား ထပ်မံ ဖြည့်တင်းပြီး ရှေ့ဆက်တိုးလာလို့ ဖြစ်တယ်လို့ PNLO တာဝန်ရှိသူ တစ်ဦးက ပြောပါတယ်။
ပြီးခဲ့တဲ့ မတ်လ ၃၁ ရက်မှာ ပစ်ခတ်မှု အနည်းငယ်ဖြစ်ခဲ့ပြီး RCSS တပ်သားတွေ ဘုန်းကြီးကျောင်းထဲ ဝင်သွားလို့ တိုက်ပွဲ ရပ်တန့်ခဲ့ပြီးနောက် ဒီကနေ့ နှစ်ဖက်တပ်ဖွဲ့ကြား ပြန်လည် ဖြစ်ပွားခဲ့တာပါ။
ဒီကနေ့ ဖြစ်ပွားတဲ့ တိုက်ပွဲနဲ့ ပတ်သက်ပြီး RCSS ပြောရေးဆိုခွင့်ရှိသူကို ဆက်သွယ် မေးမြန်းဖို့ ကြိုးစားခဲ့ပေမယ့် ဖုန်းလက်ခံ ဖြေတာ မရှိပါဘူး။
အခု PNLO နဲ့ RCSS တိုက်ပွဲ ဖြစ်ပွားနေတဲ့ နေရာမှာ ယခင် ၂၀၂၂ ခုနှစ်တုန်းက ကင်းလှည့်နေတဲ့ PNLO တပ်ဖွဲ့တွေနဲ့ RCSS တပ်ဖွဲ့တို့ ပစ်ခတ်မှု ဖြစ်ပွားခဲ့ဖူးပြီး PNLO တပ်ဖွဲ့ဝင် ၂ ဦး ဒဏ်ရာ ရခဲ့ပါတယ်။
RCSS နဲ့ PNLO တပ်ဖွဲ့ဟာ တစ်နိုင်ငံလုံး ပစ်ခတ်တိုက်ခတ်မှု ရပ်စဲရေး စာချုပ်-NCA မှာ ပါဝင် လက်မှတ် ရေးထိုးထားတဲ့ အဖွဲ့တွေ ဖြစ်ပါတယ်။
CJ – 002
#MeKongNews
#မောက်မယ်မြို့နယ်
#RCSS
#PNLO