မဲခေါင်၊ ဖေဖော်ဝါရီ ၁
ရှမ်းပြည်နယ်တောင်ပိုင်းဒေသက ပအိုဝ်းပြည်သူ့စစ် (PNO)နယ်မြေထဲမှာ တနိုင်တပိုင်အရက်ချက်သူတွေကို PNO တပ်သားတွေက ဇန်နဝါရီကစတင်ပြီး အခွန်စတင်ကောက်ခံနေတယ်လို့ ဒေသခံတွေထံကနေ သိရပါတယ်။
ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်း၊ ဆီဆိုင်၊ ဟိုပုံစတဲ့ မြို့နယ်တွေရှိ ကျေးလက်တောရွာတွေမှာ စီးပွားဖြစ်မဟုတ်ဘဲ မိသားစုနဲ့ ဆွေမျိုးအသိုင်းတွေ သောက်ဖို့အတွက် တနိုင်တပိုင်အရက်ချက်သူတွေကို PNO တပ်သားတွေက အခွန်လိုက်လံကောက်ခံနေတာဖြစ်တယ်လို့ ဆိုပါတယ်။
“ အရင်ကတော့ တစ်ခါမှမကောက်ဖူးဘူး၊ အရက်လာတောင်းသောက်ပဲရှိတယ်။ အခုက တစ်ခါချက်ရင် တစ်ခါအခွန်ပေးရမယ်ဆိုပြီး လာကောက်နေတယ်။ ဗဟိုကကောက်ခိုင်းတာ ဟုတ်၊ မဟုတ်တော့ သေချာမသိဘူး။ ကျေးရွာတာဝန်ခံတွေက လာကောက်တာ” လို့ ဒေသခံတစ်ဦးက ပြောပါတယ်။
အရက်ဖိုတစ်ဖိုကို အနည်းဆုံး ကျပ်တစ်သောင်း ကောက်ခံနေတာဖြစ်ပြီး အရက်ဖို အများအပြားနဲ့ ချက်လုပ်ကာ ကျေးရွာအတွင်းမှာသာ ရောင်းချနေသူတွေကိုတော့ ကျပ် ၃ သောင်းကနေ တစ်သိန်းကျပ်အထိ ကောက်ခံနေတာဖြစ်တယ်လို့ သိရပါတယ်။
ဒါ့အပြင် PNO ထိန်းချုပ်နယ်မြေမဟုတ်တဲ့ အင်းလေးဒေသနဲ့ ရပ်စောက်၊ တောင်ကြီးက PNO တပ်သားတွေနေထိုင်တဲ့ ပအိုဝ်းကျေးရွာအချို့နဲ့မှာလည်း အဲဒီလို လိုက်လံကောက်ခံနေတယ်လို့ သိရပါတယ်။
ပအိုဝ်းပြည်သူ့စစ်ထိန်းချုပ်ရာဒေသတွေမှာ စစ်တပ်ထုတ်ကုန်တွေဖြစ်တဲ့ မြန်မာ၊ Adman Gold နဲ့ ဒဂုံဘီယာတွေကိုသာ တင်သွင်းရောင်းချခွင့်ပြုထားပြီး ကျန်ဘီယာတွေကို တင်သွင်းရောင်းချတာ မပြုလုပ်ဖို့ ပိတ်ပင်ထားတယ်လို့လည်း သိရပါတယ်။
MK-008
#MeKongNews
#PNO
#အရက်ချက်