မဲခေါင်၊ ဧပြီ ၄
ရှမ်းပြည်နယ်တောင်ပိုင်း မောက်မယ်မြို့နယ် ကဒူးကြီးဒေသ ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO ထိန်းချုပ်နယ်မြေမှာ ဖြစ်ပွားခဲ့တဲ့ PNLO နဲ့ RCSS တိုက်ပွဲမှာ နှစ်ဖက်ထိခိုက်သေဆုံးမှုရှိတယ်လို့ စုံစမ်းသိရပါတယ်။
မတ်လ ၃၀၊ ၃၁ ရက်နဲ့ ဧပြီလ ၃ ရက်တွေမှာ ဖြစ်ပွားခဲ့တဲ့ RCSS နဲ့ PNLO တို့တိုက်ပွဲမှာ PNLO တပ်ဖွဲ့ဘက်က ၃ ဦး ထိခိုက်ခဲ့ပြီး တစ်ဦးမှာ ဒဏ်ရာပြင်းထန်ခဲ့သလို RCSS ဘက်က ၈ ဦးသေဆုံးပြီး ၂ ဦး ဒဏ်ရာရတယ်လို့လည်း PNLO တာဝန်ရှိသူတစ်ဦးကပြောပါတယ်။
“ တိုက်ပွဲအတွင်းဆိုတော့ ထိခိုက်မှုက ရှိပါတယ်။ RCSS ဘက်က ၈ ဦးကျပြီး ၂ ဦးအသေးစားဒဏ်ရာရတယ်လို့ အတည်ပြုလို့ရပါတယ်။ ထိခိုက်မှုကတော့ နှစ်ဖက်စလုံးရှိတယ်” လို့ သူကပြောပါတယ်။
ထိခိုက်သေဆုံးမှုနဲ့ပတ်သက်ပြီး RCSS တပ်ဖွဲ့မှ တာဝန်ရှိသူ ဒု-ဗိုလ်မှူးကြီး စိုင်းအွမ်ခေးကို ဆက်သွယ်ပေမယ့် ဖုန်းလက်ခံ ဖြေဆိုခြင်းမရှိပါဘူး။ ဒါပေမယ့် RCSS ပြောရေးဆိုခွင့်ရှိသူက The People Voice သတင်းဌာနမှာ RCSS ဘက်က ကျဆုံးတာမရှိဘူးလို့ ပြောဆိုထားတာကို တွေ့ရပါတယ်။
အဲ့ဒီတိုက်ပွဲဖြစ်ပွားမှုနဲ့ပတ်သက်ပြီး PNLO နဲ့ RCSS နှစ်ဘက်စလုံးက နယ်မြေကျူးကျော်လာလို့ တိုက်ပွဲဖြစ်ရတာလို့ အပြန်အလှန် ပြောဆိုထားကြပါတယ်။
လက်ရှိမှာ RCSS တပ်က ရန်ကင်းကျေးရွာမှ ဖာလောင်းကျေးရွာဘက်သို့ ပြန်လည်ဆုတ်ခွာသွားတယ်လို့ သိရပါတယ်။
PNLO နဲ့ RCSS တိုက်ပွဲဖြစ်နေတဲ့ ကဒူးကြီးဒေသ ရန်ကင်းကျေးရွာ နမ့်ပါတဲက်ကျေးရွာဟာ PNLO ဌာနချုပ်နဲ့ မျဉ်းဖြောင့် ၅ မိုင်ခန့်သာ ကွာဝေးပါတယ်။
RCSS ဟာ တိုက်ပွဲမဖြစ်ပွားခင်ကတည်းက နယ်မြေကျူးကျော်လာပြီး ဒေသခံ ပအိုဝ်းတိုင်းရင်းသားတွေကို ခြိမ်းခြောက်တာ ရန်ကင်းကျေးရွာရဲ့ စာသင်ကျောင်းထဲ တပ်စွဲတာတွေ ပြုလုပ်ခဲ့တယ်လို့ PNLO တာဝန်ရှိသူကပြောပါတယ်။
“အဲ့ဒီတိုက်ပွဲဖြစ်တဲ့နေရာက တော်လှန်ရေးခေတ်ဦးကတည်းက ကျွန်တော်တို့ အာဇာနည်တွေ နေထိုင်ခဲ့တဲ့ ပအိုဝ်းတိုင်းရင်းသားတွေရဲ့ ကျေးရွာပါ။ အခုဖြစ်တဲ့နေရာက ကျွန်တော်တို့ ဌာနချုပ်နဲ့ ၁၀ မိုင်တောင် မရှိတော့တဲ့နေရာလေ။ ဒါကို ကျွန်တော်တို့ ကာကွယ်ရမှာပေါ့။ ဘယ်သူက ကျူးကျော်လဲဆိုတာ စဉ်းစားကြည့်ပေါ့” လို့ သူကပြောပါတယ်။
၂၀၁၅ ခုနှစ် ဦးသိန်းစိန်လက်ထက် တစ်နိုင်ငံလုံးဆိုင်ရာ အပစ်ခတ်ရပ်စဲရေးသဘောတူစာချုပ်(NCA) လက်မှတ်ရေးထိုးရာမှာ မောက်မယ်မြို့နယ် ကဒူးကြီးဒေသဟာ ပအိုဝ်းအမျိုးသားလွတ်မြောက်အဖွဲ့ချုပ် (PNLO/PNLA)ရဲ့ ထိန်းချုပ်နယ်မြေအဖြစ် လက်မှတ်ရေးထိုးထားတယ်လို့ သိရပါတယ်။
#MeKongNews
#RCSS
#PNLO
