မဲခေါင်၊ မေ ၂၂
ရှမ်းပြည်နယ် တောင်ပိုင်း၊ မောက်မယ်မြို့နယ်မှာ RCSS နဲ့ PNLO တိုက်ပွဲ ဖြစ်ပွားပြီးနောက် RCSS တပ်ဖွဲ့တွေက ပအိုဝ်း ကျေးရွာ ၂ ရွာရှိ လူထုကို လူသားဒိုင်းအဖြစ် အသုံးပြုခဲ့တယ်လို့ ဟိုနမ့် ဒေသခံတွေက ပြောပါတယ်။
မေလ ၂၀ ရက်နေ့ မနက် ၄ နာရီခွဲမှာ အင်အား ၁၀၀ ဝန်းကျင်ရှိတဲ့ RCSS တပ်ဖွဲ့ဟာ မောက်မယ်မြို့နယ်၊ ဟိုနမ့်အုပ်စု၊ ထီဖက်နမ်ကျေးရွာ မြောက်ဘက်မှာရှိတဲ့ PNLO တပ်စခန်းကို လာရောက် တိုက်ခိုက်လို့ တိုက်ပွဲ ၂ နာရီခန့် ဖြစ်ပွားခဲ့တယ်လို့ PNLO က ထုတ်ပြန်ပါတယ်။
အဲ့ဒီတိုက်ပွဲ အပြီး RCSS တပ်ဖွဲ့တွေက နမ့်ယမ်နဲ့ လွယ်ခွင်ကျေးရွာတွေထဲကို ဆုတ်ခွါ တပ်စွဲပြီး PNLO တပ်ဖွဲ့ဝင်တွေ လိုက်မတိုက်ခိုက်နိုင်အောင် အဲ့ဒီ ရွာ ၂ ရွာက လူထုကို လူသားဒိုင်းအဖြစ် အသုံးပြုခဲ့တာ ဖြစ်တယ်လို့ ဒေသခံတွေက ပြောပါတယ်။
“သူတို့ တိုက်ပွဲဖြစ်တဲ့ နေရာကနေ ဆုတ်လာတော့ အဲ့ဒီရွာထဲကို ဝင်နေတယ်။ ပြီးတော့ ရွာသားတွေကို တစ်ယောက်မှ ရွာအပြင် မပေးထွက်ဘူး။ ရှောင်လည်း မပေးရှောင်ဘူး။ အကုန်ရွာထဲမှာပဲ နေခိုင်းတယ်။ ၂ ရွာစလုံးကလည်း ပအိုဝ်းရွာတွေ ဆိုတော့ ပအိုဝ်းတပ်ဖြစ်တဲ့ PNLO တွေလိုက်လာရင် သူတို့ကို ပစ်လို့မရအောင် ရွာသားတွေကို အကာအကွယ်ယူတဲ့ ပုံစံ လုပ်တာထင်တယ်” လို့ ဟိုနမ့် ဒေသခံ တစ်ဦးက ပြောပါတယ်။
RCSS တပ်ဖွဲ့ဟာ ရွာထဲကို ဆုတ်ခွါသွားပြီး အင်းအားဖြည့်တင်းကာ ရွာသားတွေကို အကာအကွယ် ယူထားတယ်လို့ PNLO တာဝန်ရှိသူ တစ်ဦးက အတည်ပြု ပြောပါတယ်။
“ရွာသားကို ဒိုင်းသဖွယ် အသုံးပြုနေတာလေ။ ကျွန်တော်တို့က ပအိုဝ်းတပ်ဆိုတော့ ရွာထဲထိ လိုက်ပစ်ရင်လည်း PNLO က ပအိုဝ်းရွာကို ပြန်ပစ်နေတယ်ဆိုပြီး စွပ်စွဲမှာလေ။ အဲ့ဒါကြောင့် သူတို့ကို ရွာသားတွေကို အပြင်မပေးထွက်၊ တိုက်ပွဲလည်း မပေးရှောင်ဘဲ ရွာထဲမှာပဲ သူတို့စုထားတာပေါ့။ ရွာသားတွေကို ပြန်ပေးဆွဲ တယ်လို့ ပြောရမလား၊ ဓားစာခံ လုပ်တယ်လို့ ပြောရမလား အဲ့လိုသဘောပဲ” လို့ PNLO တပ်မှူး တစ်ဦးက ပြောပါတယ်။
အခုလို RCSS က ရွာတွေထဲ တပ်ဝင်စွဲတာ၊ ရွာသားတွေကို အပြင်ပေးမထွက်တာတွေနဲ့ ပတ်သက်ပြီး RCSS ပြောရေးဆိုခွင့်ရှိသူတွေကို ဆက်သွယ် မေးမြန်းပေမယ့် ဖုန်းလက်ခံ ဖြေတာ မရှိခဲ့ပါဘူး။
မောက်မယ်မြို့နယ်၊ မယ်ဟိုနမ့်ကျေးရွာအုပ်စုဟာ အရင်က PNO ပြည်သူ့စစ်နဲ့ PNLO တပ်ဖွဲ့တွေသာ ရှိတဲ့နေရာ ဖြစ်ပေမယ့် ၂၀၂၂ ခုနှစ်ကစပြီး မြောက်ပိုင်းကနေ ဆုတ်ခွာလာတဲ့ RCSS က PNO ပြည်သူ့စစ်နဲ့ သဘောတူညီမှု ပြုလုပ်ပြီး ဝင်ရောက် လှုပ်ရှားနေတာ ဖြစ်ပါတယ်။
ဟိုနမ့်အုပ်စုမှာရှိတဲ့ လွယ်ဆမ်စစ်၊ ပင်တခွါး၊ နမ့်ဟိတ် စတဲ့ PNO ပြည်သူ့စစ်စခန်းတွေမှာ RCSS က ၂၀၂၂ ခုနှစ်ကုန်ပိုင်း ကတည်းက ဝင်ရောက် တပ်စွဲထားပါတယ်။
ပြီးခဲ့တဲ့ မတ်လနဲ့ ဧပြီလမှာလည်း မောက်မယ်မြို့နယ် ကဒူးကြီးဒေသမှာ RCSS က နယ်မြေ ကျူးကျော်လာလို့ PNLO နဲ့ တိုက်ပွဲ ဖြစ်ပွားခဲ့ပါသေးတယ်။
ဒါ့အပြင် RCSS က ထောင်ထားတဲ့ မိုင်းကို ဒေသခံ ၃ ဦးက နင်းမိလို့ ဒဏ်ရာအပြင်းအထန် ရရှိခဲ့တယ်လို့လည်း PNLO ကပြောဆိုထားပါတယ်။
RCSS နဲ့ PNLO ဟာ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ်-NCA မှာ လက်မှတ် ရေးထိုးထားတဲ့ အဖွဲ့တွေ ဖြစ်ပါတယ်။
CJ-002
#MeKongNews
#မောက်မယ်မြို့နယ်
#RCSS
#PNLO