မဲခေါင်၊ စက်တင်ဘာ ၅
စစ်ကိုင်းတိုင်း၊ မန္တလေးတိုင်းနဲ့ မကွေးတိုင်း ဆုံရာဒေသ၊ မြောင်မြို့နယ်နဲ့ ရေစကြိုမြို့နယ်ကြား၊ ရေလည်ကျွန်း ဒေသရှိ PDF တပ်ဖွဲ့တွေ မဟာမိတ် အင်အားစုအဖြစ် စက်တင်ဘာ ၁ ရက်က အောင်မြင်စွာ ဖွဲ့စည်းခဲ့တယ်လို့ သိရပါတယ်။
အဆိုပါ ရေလည်ကျွန်းဟာ ဒေသတွင်း အချက်အခြာကျတဲ့ နေရာဖြစ်ပြီး PDF များ စိုးမိုးထားမှုကို အပြတ်ချေမှုန်းဖို့ စစ်ကောင်စီက ပြင်ဆင်နေတယ်လို့ သတင်းထွက်ပေါ်နေချိန် အခုလို မဟာမိတ် ဖွဲ့စည်းခဲ့တာ ဖြစ်ပါတယ်။
“ အစည်းအဝေးကတော့ ပြီးသွားပြီ။ ဘုံသဘောတူညီချက် ၁၀ ချက်ကို ညှိနှိုင်း ဆွေးနွေးနေတာနဲ့ အချိန်တော်တော် ကြာသွားတယ်” လို့ မဟာမိတ် ဖွဲ့စည်းရေး ဦးဆောင်သူ Myingyan Black Tiger တပ်ဖွဲ့ ခေါင်းဆောင် ဗိုလ်မိုက်ခဲက ပြောပါတယ်။
ဒီဆွေးနွေးပွဲမှာ စစ်ကောင်စီကို တိုက်စစ်ဆင်ချေမှုန်းရေး အတွက် ဘုံသဘောတူညီချက် ၁၀ ချက် သဘောတူညီခဲ့ပြီး မဟာမိတ် အင်အားစု အဖြစ် တက်ရောက်ကာ ပူးပေါင်းပါဝင်ကြတဲ့ တော်လှန်ရေးတပ်ဖွဲ့ အရေအတွက်ကိုမူ လုံခြုံရေးအရ မဖော်ပြဘူးလို့ ဆိုပါတယ်။
“ ဘုံသဘောတူညီချက် ၁၀ ချက်ရယ်၊ ပူးပေါင်းပါဝင်လာတဲ့ မဟာမိတ်တွေကို လုံခြုံရေးအရ မဖော်ပြပါဘူး။ ပါဝင်တဲ့ မဟာမိတ်တွေကလည်း ဖော်ပြဖို့အတွက် ငြင်းဆိုထားပါတယ်။ ဘုံသဘောတူညီချက်ထဲက နံပါတ် ၈ အချက် တစ်ချက်တည်းကို တစ်နာရီကျော်လောက် ညှိနှိုင်းခဲ့ရတယ်” လို့ ဗိုလ်မိုက်ခဲက ပြောပါတယ်။
တော်လှန်ရေးကာလ ကြာမြင့်လာတာနဲ့အမျှ အချင်းချင်း ပွတ်တိုက်မှု တချို့ ရှိပေမယ့် ရေလည်ကျွန်းဒေသရှိ PDF တပ်ဖွဲ့များ ပူးပေါင်းမှုကို အားရကျေနပ်တယ်လို့ ဒေသခံတွေက ဆိုပါတယ်။
“ ပြည်သူဘက်က သဘောကျကြတယ်။ ကိုယ့်ဘက်က ဘယ်လောက်ပဲ ဆုံးရှုံးနစ်နာမှုရှိရှိ ကျွန်တော်တို့ တော်လှန်ရေး ရဲဘော် အချင်းချင်း စည်းလုံးနေကြတယ်။ ညီညွတ်နေကြတယ်ဆိုရင် ပြည်သူအနေနဲ့ အားတစ်ရပ်ကို ဖြစ်နေတာ။ ပြည်သူ ဆိုတာက ကျွန်တော်တို့ တော်လှန်ရေးတပ်ဖွဲ့တွေ ဘက်မှာပဲ မားမားမတ်မတ် ရပ်တည်နေတဲ့အတွက်ကြောင့်မို့လို့ အားလုံးကို အခုလို စည်းစည်းလုံးလုံး ရှိစေချင်တယ်ဗျာ” လို့ အစည်းအဝေးမှာ ပါဝင်တဲ့ ရဲဘော် တစ်ဦးက မှတ်ချက်ပြု ပြောပါတယ်။
လက်ရှိ မိုးတွင်းကာလ ရေလယ်ကျွန်းဒေသ ရေတက်ချိန်ဖြစ်လို့ ပွင့်လင်းရာသီ ဒီရေကျချိန်မှာ စစ်ကောင်စီ စစ်ကြောင်းများ ဝင်ရောက် သောင်းကျန်း၊ လုယက်မယ့် သတင်းတွေ ထွက်နေတာကြောင့် တိုက်စစ်ဖွင့် ချေမှုန်းဖို့ အတွက် Myingyan Black Tiger အဖွဲ့က ဦးဆောင်ပြီး ဒေသခံ ကာကွယ်ရေးတပ်များ မဟာမိတ် အင်အားစု ဖွဲ့စည်းဖို့ အခုလို ညှိနှိုင်း ဖွဲ့စည်းခဲ့တာ ဖြစ်ပါတယ်။
CJ-005
#MeKongNews
#ဗိုလ်မိုက်ခဲ
#MyingyanBlackTiger
#မဟာမိတ်အင်အားစု
#ရေလည်ကျွန်း
