မဲခေါင်၊ နိုဝင်ဘာ ၁၃
ကြားကာလ ပြည်သူ့အုပ်ချုပ်ရေး အကောင်အထည်ဖော်နေတဲ့ NUG ထိန်းချုပ်ဒေသတွေက ပုဂ္ဂလိက ဘဏ်တွေမှာ အပ်နှံထားတဲ့ ပြည်သူတွေရဲ့ အပ်နှံငွေတွေ ဆုံးရှုံး နစ်နာမှု မရှိစေဖို့ ကြားကာလ ဗဟိုဘဏ် အနေနဲ့ အချိန်နဲ့တပြေးညီ ဆောင်ရွက်နေတယ်လို့ ဒီနေ့ နိုဝင်ဘာ ၁၃ ရက် မနက်ပိုင်းမှာ NUG က အသိပေးပါတယ်။
ကြားကာလ ဗဟိုဘဏ် တည်ထောင်ခြင်းဆိုင်ရာ ဥပဒေကဲ့သို့ အာဏာတည်တဲ့အမိန့်၊ အပိုဒ် (၃) မှာ ဖော်ပြထားတဲ့အတိုင်း ပြည်သူတွေရဲ့ နစ်နာဆုံးရှုံးမှုတွေကို အချိန်မီ ကုစားနိုင်ဖို့ ပြည်သူ့အုပ်ချုပ်ရေး စတင်တဲ့ ဒေသတွေမှာ ပြည်သူ့အုပ်ချုပ်ရေး လုပ်ငန်းစီမံချက် (SOPs – Standard Operating Procedures) ထုတ်ပြန်ပြီး တာဝန်ယူ၊ တာဝန်ခံမှု ရှိစေဖို့ စီစဉ်နေတယ်လို့ ဆိုပါတယ်။
အဆိုပါ လုပ်ငန်းစီမံချက်မှာ သိမ်းပိုက် နယ်မြေတွင်းက ပုဂ္ဂလိက ဘဏ်တွေရဲ့ ပရဝုဏ်၊ အဆောက်အအုံ၊ ဘဏ်ဝန်ထမ်း၊ ဘဏ်အတွင်းရှိ ငွေသား၊ ဘဏ်ငွေတိုက်၊ စာရင်းမှတ်တမ်းတွေ၊ စာချုပ်စာတမ်းတွေ၊ ပေါင်နှံ စာရွက်စာတမ်းတွေ၊ ဘဏ်အတွင်းရှိ စက်ပစ္စည်း ကိရိယာတွေ၊ ရုံးသုံး Software ၊ Hardware တွေနဲ့ စပ်လျဉ်းပြီး ဆောင်ရွက်ရမယ့် ကိစ္စတွေကို အသေးစိတ် ဖော်ပြထားပြီး အထူးကြပ်မတ် စီမံနေရှိတယ်လို့ NUG ကပြောပါတယ်။
ပြည်သူ့အုပ်ချုပ်ရေး ဖော်ဆောင်နေတဲ့ ဒေသတွေမှာ အခြေအနေ တည်ငြိမ်တာနဲ့ ထိန်းသိမ်း ပြုစုထားတဲ့ စာရင်း၊ ဇယား၊ မှတ်တမ်းတွေနဲ့အညီ ပြည်သူ အပ်နှံငွေတွေကို ပြည်သူထံ ပြန်လည်ရရှိစေဖို့ စီမံမှာဖြစ်ပြီး NUG အနေနဲ့ ပြည်သူ့အကျိုးစီးပွားကို အစဉ်ရှေ့တန်းတင် ဆောင်ရွက်နေတယ်လို့လည်း ထုတ်ပြန်ချက်မှာ ဖော်ပြထားပါတယ်။
လက်ရှိ NUG လက်အောက်ခံ ပြည်သူ့ကာကွယ်ရေးတပ်ဖွဲ့တွေ အပါအဝင် မဟာမိတ် ပူးပေါင်းတပ်တွေနဲ့အတူ မြို့သိမ်းတိုက်ပွဲတွေ ဆင်နွှဲလျက်ရှိပြီး စစ်ကိုင်းတိုင်း အထက်ပိုင်းက ကောလင်းမြို့၊ ခမ်းပါတ်မြို့နဲ့ စစ်ကောင်စီ စခန်းတချို့ကို သိမ်းပိုက်ထားတယ်လို့ NUG ကာကွယ်ရေးဝန်ကြီးဌာနက ထုတ်ပြန်ထားခဲ့ပါတယ်။
NUG ဟာ ပြည်သူ့အုပ်ချုပ်ရေးအဖွဲ့-ပအဖ၊ ပြည်သူ့လုံခြုံရေးအဖွဲ့-ပလဖ နဲ့ ပြည်သူ့ကာကွယ်ရေးအဖွဲ့-ပကဖ စတာတွေ ဖွဲ့စည်းပြီး ကြားကာလ ပြည်သူ့အုပ်ချုပ်ရေး အစီအစဉ်ကို ၂၀၂၁ ခုနှစ် ကတည်းက စတင် အကောင်အထည် ဖော်ခဲ့တာ ဖြစ်ပါတယ်။
MK-009
#MeKongNews
#NUG
#ပြည်သူ့ကာကွယ်ရေးတပ်
#ပုဂ္ဂလိကဘဏ်
