မဲခေါင်၊ ဇန်နဝါရီ ၂၄
အညာဒေသခံ ပြည်သူ့ကာကွယ်ရေးတပ်ဖွဲ့ ဖြစ်တဲ့ Danger Force LPDF က ၂၀၂၂ ခုနှစ်၊ ဇွန်လ မှ ဒီဇင်ဘာလအထိ တပ်ဖွဲ့တွင်း လှူဒါန်းငွေ ရရှိမှုနဲ့ ခွဲဝေသုံးစွဲမှုတွေကို ပြည်သူတွေ သိရှိစေဖို့ ဒီကနေ့ ထုတ်ပြန်လိုက်ပါတယ်။
Danger Force တပ်ဖွဲ့ရဲ့ ရန်ပုံငွေထဲမှ ၁ ရာခိုင်နှုန်းကိုသာ ရိက္ခာ၊ ဆေးဝါးနဲ့ အဝတ်အထည်တွေအတွက် အသုံးပြုထားကာ ကျန်ပမာဏကို လက်နက်ခဲယမ်းအတွက် အဓိကထား အသုံးပြုနေတယ်လို့ သိရပါတယ်။
M-16 A1 တလက် ဝယ်ယူတာကြောင့် ရန်ပုံငွေရဲ့ တဝက်နီးပါးထိ ကုန်ကျခဲ့ပြီး အခြားတိုက်ပွဲဝင်ပစ္စည်း တွေဖြစ်တဲ့ ဒရုန်း၊ မိုင်းထုတ်လုပ်ရေးနဲ့ အီကွေ့မင့်တွေ အတွက် ကျန်ရန်ပုံငွေတဝက်ထဲမှ သုံးစွဲခဲ့ရပြီး အစွန်းထွက် ပမာဏကိုသာ နေ့စဉ်ရိက္ခာအတွက် အသုံးပြုနေတယ်လို့ Danger Force LPDF က ရှင်းလင်းတင်ပြထားပါတယ်။
၂၀၂၂ ခုနှစ် ဇွန်လမှ ၂၀၂၃ ခုနှစ် ဇန်နဝါရီလ MAC ရဲ့ လှူဒါန်းငွေ ရရှိမှု အပါအဝင် ရရှိမှုမှာ ၃၇,၆၄၆,၄၄၃ ကျပ် ဖြစ်ပြီး သုံးစွဲမှုမှာ ၃၇,၇၂၈,၈၀၀ ကျပ် ဖြစ်တယ်လို့ တပ်ဖွဲ့က အသေးစိတ်တွက်ချက် ထုတ်ပြန် အစီရင်ခံထားပါတယ်။
စစ်အာဏာရှင်စနစ် အမြစ်ဖြတ် ချေမှုန်းရေးနဲ့ ဖက်ဒရယ် ဒီမိုကရေစီ နိုင်ငံတော်သစ် တည်ဆောက်ရေး လုပ်ငန်းစဉ်တွေ အတွက် လစဉ် လှူဒါန်းပေးတဲ့ ပြည်တွင်း ပြည်ပမှ မိဘပြည်သူတွေကို Danger Force LPDF မှ ကျေးဇူး အထူးတင်ရှိတယ်လို့လည်း ဆိုပါတယ်။
MK-003