မဲခေါင်၊ အောက်တိုဘာ ၂၈
ကရင်နီပြည်နယ် အခြေစိုက်၊ Fight for Justice -JPDF တပ်ဖွဲ့ တည်ထောင်မှု ၂ နှစ်ပြည့် အခမ်းအနားကို အောက်တိုဘာလ ၂၇ ရက်နေ့မှာ ပြုလုပ်ခဲ့တယ်လို့ တပ်ဖွဲ့တာဝန်ခံ ကိုသော်ဇင်က ပြောပါတယ်။
“စစ်ရေးပြတွေတော့ မလုပ်ဖြစ်ဘူး။ ပွဲကတော့ အကျဥ်းချုံးပဲပေါ့။ရဲဘော်တွေကို ကျေးဇူးတင်တာက ကျွန်တော်တို့က အတူ ဖြတ်သန်းလာတာလည်း ကြာပြီပေါ့နော်။ အကုန်လုံးကလည်း ဒီအချိန်ထိ ကြိုးစားပေး ကြသလို အရွေ့တစ်ခုရောက်ဖို့ အခုထိ တောင့်ခံနေတုန်းပဲပေါ့။ တော်လှန်ရေးမှာလည်း အားမလျော့သွားဘဲ ခုထိလည်း ကြိုးစားနေတုန်းပဲပေါ့” လို့ သူက ပြောပါတယ်။
တပ်တည်ထောင်ခြင်း ၂ နှစ်ပြည့်နေ့မှာ နောက်တန်း ရဲဘော်တွေ စုစည်းပြီး မိန့်ခွန်းပြောတာ၊ အလံ အလေးပြုတာ၊ သစ္စာအဓိဌာန်ရွတ်ဆိုတာ၊ တော်လှန် မီးပုံးပျံ လွှတ်တင်တာ၊ ရဲဘော်တွေအတွက် တူညီဝတ်စုံ ပေးအပ်တာ၊ အစားအသောက် ကျွေးမွေးတာတွေ ပြုလုပ်ခဲ့တယ်လို့ သိရပါတယ်။
JPDF တပ်ဖွဲ့ဟာ ပြည်သူက ပေါက်ဖွားလာတဲ့ ရဲဘော်တွေဖြစ်တဲ့ အတွက် ပြည်သူနဲ့အတူ ရပ်တည်ကာ စစ်အာဏာရှင်စနစ် ပျက်သုဥ်းတဲ့အထိ ဆက်လက် တော်လှန်သွားမယ်လို့ ဆိုပါတယ်။
JPDF တပ်ဖွဲ့ ၂ နှစ် ကာလအတွင်း တိုက်ပွဲပေါင်းများစွာကို ကာကွယ်ရေးတပ်တွေနဲ့အတူ ပူးပေါင်း တိုက်ခိုက်ခဲ့ရာ တပ်ဖွဲ့ဝင် ၄ ဦးဟာ တိုင်းပြည်အတွက် အသက်ပေးခဲ့ရတယ်လို့ သိရပါတယ်။
JPDF တပ်ဖွဲ့ဟာ ကရင်နီပြည်နယ် မယ်စဲ့တိုက်ပွဲ၊ ကုန်းသာတိုက်ပွဲ၊ ဒီးမော့ဆို တိုက်ပွဲ၊ ရှမ်းပြည်နယ် မိုးဗြဲ တိုက်ပွဲနဲ့ ဖယ်ခုံ တိုက်ပွဲတွေမှာ ပါ၀င်တိုက်ခိုက်ခဲ့တယ်လို့ သိရပါတယ်။
CJ-004
#MeKongNews
#JPDF
#ကရင်နီပြည်နယ်
#တိုက်ပွဲ
